1 Mãwãnacarea Ãcõrẽba Sarara carebasia idjia wãrãneba jarad̶a quĩrãca. 2 Abrahaʌ̃ra bio drõãda b̶ʌmĩna Sarara b̶iogoa b̶eped̶a Ãcõrẽba jarad̶a ewarid̶e warrada tosia.* Genesi 17:15-21. 3 Saraba warra tod̶ara Abrahaʌ̃ba trʌ̃ b̶ʌsia Isa.† Hebreo bed̶ead̶e Isa trʌ̃ba jara b̶ʌa “ipid̶abʌrʌa.” Genesi 21:6; 18:10-15. 4 Idji warra Isa ocho ewari b̶ʌd̶e Abrahaʌ̃ba Isa cacuara wẽãgosia Ãcõrẽba jara b̶ʌd̶a quĩrãca. 5 Abrahaʌ̃ra cien poa b̶asia idji warra Isa tosid̶ad̶e. 6 Maʌ̃ne Saraba crĩchasia: “Ãcõrẽba mʌ̃ra ipid̶abi b̶ʌa. Bariduaba mʌ̃ warra tod̶ad̶ebemada ũrĩnibʌrʌ mʌ̃ carea b̶ʌsrid̶aba ipid̶ad̶ia.” 7 Idjab̶a jarasia: “Ni ab̶aʌba crĩchad̶aca basía mʌ̃ra warra toida. Abrahaʌ̃ra drõãda b̶ʌmĩna mʌ̃a idjía warrada to diasia.”

8 Ãdji warra Isara warisia. Ju amasid̶e Abrahaʌ̃ba b̶ʌsrid̶a ewari waib̶ʌada osia. 9 Mama b̶asia Ismael, Egiptod̶ebema nezocawẽrã Agara warrada. Mãwã b̶ʌd̶e Saraba unusia Ismaelba idji warra Isara biẽ́ ipid̶a jara b̶ʌda.‡ Ismaelba idji warra Isara biẽ́ ipid̶a jara b̶ʌda. Griego bed̶ead̶e mãwã b̶ʌ́ b̶ʌa. Hebreo bed̶ead̶e jara b̶ʌa “Ismaelera jemene b̶ʌda” baribʌrʌ ebud̶a b̶ʌẽ́a. 10 Maʌ̃ carea Saraba Abrahaʌ̃a jarasia:

–Jãʌ̃ nezocawẽrãra, idji warra sid̶a jʌretadua. Bʌ beud̶acarea bʌa erob̶ʌd̶ebemara jãʌ̃ Ismaelba mʌ̃ warra ume edaiẽ́ b̶ʌa.–

11 Maʌ̃ bed̶ea ũrĩbʌrʌd̶e Abrahaʌ̃ra bio sopua b̶esia Ismael sid̶a idji warra bẽrã. 12 Maʌ̃ carea Ãcõrẽba Abrahaʌ̃a jarasia:

–Bʌ warra Ismael carea, bʌ nezocawẽrã carea bid̶a sopuarãdua. Saraba jara b̶ʌra jũma odua, mʌ̃a warrarã diai jarad̶ara Isad̶ebabʌrʌ zed̶i bẽrã. 13 Baribʌrʌ bʌ nezocawẽrã warrad̶eba mʌ̃a puru dromada yõbiya, idjira bʌ warra bẽrã.–

14 Nurẽma diaped̶ed̶a Abrahaʌ̃ra pirab̶arisia. Maʌ̃be baidoda animarã e od̶ad̶e tʌped̶a maʌ̃ baidora paʌ̃ sid̶a Agaraa diasia. Agara equiad̶e b̶ʌped̶a dji warra Ismael sid̶a diasia. Maʌ̃bebʌrʌ ãdjira wãbisia. Maʌ̃ wãbʌdad̶e baridua nĩbasid̶aa Beersebá ẽjũã ewaraga b̶ʌd̶e. 15 Mãwã nĩnane ãdji baidora jõsia. Maʌ̃ carea Agaraba idji warrara bacuru zaque edrecare b̶eesia. 16 Nãwã crĩchasia: “Mʌ̃a unu quĩrĩãẽ́ b̶ʌa mʌ̃ warrara beubʌrʌda.” Maʌ̃ bẽrã tʌmʌa arid̶e chũmane wãsia. Mama chũmʌne idji warrara jĩgua jĩã nũmesia.§ Idji warrara jĩgua jĩã nũmesia. Griego bed̶ead̶e mãwã b̶ʌ́ b̶ʌa. Hebreo bed̶ead̶e jara b̶ʌa Agaradrʌ jĩãsida.

17 Mãwã b̶ʌd̶e Ãcõrẽba dji warrara jĩã b̶ʌda ũrĩsia. Maʌ̃ne bajãneba Ãcõrẽ nezocaba Agarada trʌ̃ jarasia:

–Agara, ¿sãwãsi? Wayarãdua. Ãcõrẽba bʌ warra jĩã b̶ʌda ũrĩ b̶ʌa. 18 Piradrʌdua. Bʌ warrara piradrʌ edaped̶a sobiabidua. Mʌ̃a idjid̶eba puru dromada yõbiya.–

19 Maʌ̃be Ãcõrẽba Agaraa unubisia egorod̶eba baidoda ʌ̃taa bogadrʌ nũmʌda. Ara maʌ̃da wãped̶a animarã e od̶ara bira tʌ edasia. Maʌ̃be Ismaelea dawasia.

20 Ãcõrẽba Ismaelera carebabadjia. Maʌ̃ba Ismaelera wariped̶a bio cha drʌ cawa b̶esia idjab̶a ẽjũã põãsa ewaraga b̶ʌd̶e b̶abadjia. 21 Maʌ̃ ẽjũãra Paraʌ̃ abadjid̶aa. Mãwã b̶ʌd̶e dji papaba Egiptod̶ebema wẽrãda diasia idji quima bamãrẽã.

22 Maʌ̃ ewarid̶e Abimelera idji djõbadarã boro Picol ume wãsia Abrahaʌ̃ ume bed̶ead̶e. Abimeleba Abrahaʌ̃a jarasia:

–Bʌa ne jũma obʌrʌza Ãcõrẽba bʌra carebabaria. 23 Maʌ̃ carea mʌ̃a quĩrĩã b̶ʌa bʌa Ãcõrẽ quĩrãpita wãrãneba jaraida bʌa mʌ̃ra, mʌ̃ warrarãra, ãdjirãneba yõbʌdarã sid̶a cũrũgaẽ́da. Bʌra drua ãĩbemamĩna mʌ̃a bʌra bia o b̶ʌa. Maʌ̃ bẽrã wãrãneba jaradua bʌa bid̶a mʌ̃ra idjab̶a mʌ̃ druad̶ebemarã sid̶a bia o b̶aida.–

24 Abrahaʌ̃ba panusia:

–Mʌ̃a wãrãneba jaraya bãrãra bia o b̶aida.–

25 Maʌ̃ ewarid̶e Abrahaʌ̃ba baido juebada uriada coro erob̶asia. Baribʌrʌ maʌ̃gʌra Abimele nezocarãba jãrĩsid̶aa. Maʌ̃nebemada Abrahaʌ̃ba Abimelea jarasia. 26 Maʌ̃ne Abimeleba panusia:

–Mʌ̃a adua b̶ʌa caiba mãwã osida. Id̶ibe mʌ̃a maʌ̃nebemada ũrĩbʌrʌa, bʌa mʌ̃́a jaraẽ́ b̶ad̶a bẽrã.–

27 Maʌ̃ ewarid̶e ãdji umérãba bed̶ea b̶ʌsid̶aa. Maʌ̃ne Abrahaʌ̃ba ovejada, paca sid̶a zocãrã eneped̶a Abimelea diasia. 28 Maʌ̃be oveja wẽrãda siete awara b̶ʌsia. 29 Maʌ̃ carea Abimeleba Abrahaʌ̃a iwid̶isia:

–¿Cãrẽ cãrẽã za panʌ oveja wẽrãra siete awara b̶ʌsi?–

30 Abrahaʌ̃ba panusia:

–Naʌ̃ siete oveja mʌ̃a diabʌrʌda bʌa edaibʌrʌ, cawabiya mʌ̃abʌrʌ maʌ̃ baido juebada uriara corosida.–

31 Umérãba bed̶ea b̶ʌped̶ad̶a bẽrã maʌ̃ baido juebada uria trʌ̃ra Beersebá b̶esia.* Hebreo bed̶ead̶e Beersebá trʌ̃ba jara b̶ʌa “wãrã bed̶ea b̶ʌped̶ad̶a” idjab̶a “siete panʌnebema.”

32 Beersebád̶e bed̶ea b̶ʌped̶ad̶acarea Abimelera idji djõbadarã boro Picol ume jẽda wãsid̶aa ãdji panabadamaa pilisteorã druad̶e. 33 Maʌ̃be Beersebád̶e Abrahaʌ̃ba tamarisco bacuruda u b̶ʌsia. Mama Ãcõrẽ beucaa ewari iwid̶isia. 34 Abrahaʌ̃ra pilisteorã druad̶e dãrã b̶esia.