35
Ãcõrẽba Jacobo bia jara b̶ʌd̶a
1 Mãwãnacarea Ãcõrẽba Jacoboa jarasia:
–Piradrʌped̶a Beteld̶aa b̶ad̶e wãdua, bʌ djaba Esaú wayaad̶eba mĩrũ wãsid̶e mʌ̃ bʌma odjad̶amaa.* Genesi 28:10-22. Mama mõgarada pã buedua mʌ̃́a bia bed̶eai carea.–
2 Ara maʌ̃da Jacoboba idji ẽberãrãa, waabema idji ume duanʌ́a bid̶a jarasia:
–Bãrãba jʌwaba od̶a ãcõrẽda eropanʌbʌrʌ, jũma b̶atacuad̶adua. Maʌ̃be cuid̶aped̶a cacuad̶e jʌ̃bada tãtod̶ada jʌ̃nadua Ãcõrẽ quĩrãpita bia b̶ead̶i carea. 3 Maʌ̃bebʌrʌ Beteld̶aa wãnia. Mama mʌ̃a mõgarada pã bueya Ãcõrẽa bia bed̶eai carea. Mʌ̃ nẽbʌrad̶e b̶asid̶e idjia mʌ̃ra carebasia idjab̶a mʌ̃ wãbʌrʌza mʌ̃ ume b̶abaria.–
4 Ara maʌ̃da jũma ãdji jʌwaba od̶a ãcõrẽra Jacoboa diasid̶aa. Ãdji cʌwʌrʌd̶e pĩrũ jʌ̃ panʌ sid̶a ẽrãnaped̶a Jacoboa diasid̶aa.† Ãdjia crĩchabadjid̶aa maʌ̃ pĩrũba ãdjira wagabarida idjab̶a carebabarida. Maʌ̃ bẽrã ãdji cʌwʌrʌd̶e jʌ̃badjid̶aa. Jũma maʌ̃gʌra Jacoboba Siqueʌ̃ puru caita bacuru droma nũmʌ edre jou b̶ʌsia. 5 Mãwãnacarea Jacobora, ẽberãrã idji ume panʌ sid̶a wãsid̶aa. Wãbʌdad̶e Ãcõrẽba jũma mama b̶ea purua ãdjirãra bio wayabisia. Maʌ̃ bẽrã ãdjirãba Jacobo ẽberãrã biẽ́ od̶i carea caid̶u ẽpẽnaẽ́ basía.
6 Canaaʌ̃ druad̶e nĩne Jacobora jũma idji ẽberãrã ume Luz purud̶e jũẽsid̶aa. Luz purura idjab̶a Betel abadjid̶aa. 7 Mama Jacoboba mõgarada pã buesia Ãcõrẽa bia bed̶eai carea. Maʌ̃ mõgara pã bued̶ara trʌ̃ b̶ʌsia El-Betel, idji djaba carea mĩrũ wãsid̶e mama Ãcõrẽra idjima odjad̶a bẽrã.‡ Hebreo bed̶ead̶e El-Betel trʌ̃ba jara b̶ʌa “Betel Ãcõrẽ.”
8 Maʌ̃ Beteld̶e Deboráda jaid̶asia. Deborára Jacobo papa Rebeca wagabari basía. Jacoboba Deborára tʌb̶arisia Betel caita, bacuru droma nũmʌ edre. Maʌ̃ bacurura trʌ̃ b̶ʌsia Alon-Bacut.§ Alon-Bacut trʌ̃ba jara b̶ʌa: “Bacuru droma nũmʌma jĩãna.”
9-10 Jacobo Padan-Araʌ̃ druad̶eba jẽda zesi ewarid̶e Ãcõrẽra idjimaa waya zesia. Maʌ̃ ewarid̶e Ãcõrẽba idjira nãwã bia jara b̶ʌsia:
–Bʌ trʌ̃ra Jacobo abadaa baribʌrʌ bʌra waa Jacobo ad̶aẽ́a.* Genesi 32:28. Ãtebʌrʌ bʌ trʌ̃ra Israel ad̶ia.–
Mãwã Ãcõrẽba Jacobora trʌ̃ b̶ʌsia Israel.
11 Ãcõrẽba mãwã trʌ̃ b̶ʌped̶a jarasia:
–Mʌ̃ra ne jũma poya b̶ʌ Ãcõrẽa. Warrada zocãrã yõdua. Bʌd̶eba puruda zocãrã yõnia. Idjab̶a bʌd̶eba ẽberãrã bororãda yõnia. 12 Mʌ̃a naʌ̃ druara Abrahaʌ̃a, Isaa bid̶a diasia. Idjab̶a mʌ̃a bʌ́a, bʌd̶eba yõbʌdarãa bid̶a diaya.–
13 Mãwãped̶a Ãcõrẽra Jacobo ume bed̶ea b̶ad̶ada wãsia. 14 Mãwãnacarea Jacoboba Ãcõrẽ ume bed̶ea b̶ad̶ama mõgarada ʌ̃ta nũmʌsia. Maʌ̃ mõgara ʌ̃rʌ̃ uva b̶ada, nedraga sid̶a Ãcõrẽa wea diasia. 15 Maʌ̃ne Jacoboba Ãcõrẽ ume bed̶ea b̶ad̶ama trʌ̃ b̶ʌsia Betel.† Genesi 28:18.
Raquel jaid̶ad̶a
16 Mãwãnacarea Beteld̶eba wãsid̶aa. Wad̶i Eprata purud̶e jũẽni naẽna Jacobo quima Raquelera warra pua nũmesia. Poya tocara nũmʌ bẽrã bia mĩga b̶asia. 17 Wetara pua nũmebʌrʌd̶e dji warra careba tobibari wẽrãba Raquelea jarasia:
–Wayarãdua, bʌa umaquĩrã warrada tobʌrʌa.–
18 Baribʌrʌ Raquelera beubʌrʌ basía. Wad̶i beui naẽna idji warrara trʌ̃ b̶ʌsia Benoní.‡ Hebreo bed̶ead̶e Benoní trʌ̃ba jara b̶ʌa: “Warra mʌ̃ bia mĩga b̶ʌd̶ebema.” Baribʌrʌ Jacoboba trʌ̃ b̶ʌsia Benjamiʌ̃.§ Benjamiʌ̃ trʌ̃ba jara b̶ʌa: “Mʌ̃ jʌwa araarebema warra.” Idji trʌ̃ba naʌ̃gʌrã crĩcha sid̶a dia b̶ʌa: “Mʌ̃ drõã b̶ʌba ununa warra”, “mʌ̃a erob̶ʌ jũma edaida b̶ʌ warra”, idjab̶a “boro biasi warra.”
19 Raquelera mãwã jaid̶asia. Idjira tʌb̶arisia Eprata purud̶aa wãbada o icawa. Maʌ̃ Eprata purura Beleʌ̃ abadaa. 20 Jacoboba dji quima tʌb̶arid̶ama mõgarada ʌ̃ta nũmʌsia. Id̶i ewarid̶e maʌ̃ mõgarara wad̶ibid̶a nũmʌa.
21 Jacobo, Israel abadara mamaʌba wãped̶a idji wua dera Migdal-edar puru zaque wagaa osia. 22 Israel maʌ̃ druad̶e b̶asid̶e idji warra iwina Rubeʌ̃ra idji zeza nezocawẽrã Bilha ume cãĩsia. Maʌ̃ra Israelba cawaped̶a bio quĩrũsia.*Bio quĩrũsia. Griego bed̶ead̶e mãwã b̶ʌ́ b̶ʌa. Hebreo bed̶ead̶e neẽ́a. Genesi 49:3-4.
Jacobo warrarã
Israel warrarãra doce panasid̶aa:
23 Leaba tod̶ara naʌ̃gʌrã basía: dji iwinada Rubeʌ̃, idjiare Simeoʌ̃, Levi, Juda, Isacar, Zabuloʌ̃ sid̶a.
24 Raquelba tod̶ara naʌ̃gʌrã basía: Jose idjab̶a Benjamiʌ̃.
25 Raquel nezocawẽrã Bilhaba tod̶ara naʌ̃gʌrã basía: Daʌ̃ idjab̶a Neptali.
26 Lea nezocawẽrã Zilpaba tod̶ara naʌ̃gʌrã basía: Ga idjab̶a Aser.
Jũma maʌ̃gʌrã basía Jacobo warrarã Padan-Araʌ̃ druad̶e toped̶ad̶ada.
Isa jaid̶ad̶a
27 Maʌ̃ ewarid̶e Jacobora Mamre ẽjũãnaa idji zeza Isa acʌd̶e wãsia. Mamrera idjab̶a Arbá wa Hebroʌ̃ abadaa. Mama Abrahaʌ̃ra, Isa sid̶a panabadjid̶aa. 28 Isara 180 poa b̶asia. 29 Mãwã idjira bio waraga jaid̶asia. Idji warrarã Esaúba, Jacobo bid̶a tʌb̶arisid̶aa.
*35:1 Genesi 28:10-22.
†35:4 Ãdjia crĩchabadjid̶aa maʌ̃ pĩrũba ãdjira wagabarida idjab̶a carebabarida. Maʌ̃ bẽrã ãdji cʌwʌrʌd̶e jʌ̃badjid̶aa.
‡35:7 Hebreo bed̶ead̶e El-Betel trʌ̃ba jara b̶ʌa “Betel Ãcõrẽ.”
§35:8 Alon-Bacut trʌ̃ba jara b̶ʌa: “Bacuru droma nũmʌma jĩãna.”
*35:9-10 Genesi 32:28.
†35:15 Genesi 28:18.
‡35:18 Hebreo bed̶ead̶e Benoní trʌ̃ba jara b̶ʌa: “Warra mʌ̃ bia mĩga b̶ʌd̶ebema.”
§35:18 Benjamiʌ̃ trʌ̃ba jara b̶ʌa: “Mʌ̃ jʌwa araarebema warra.” Idji trʌ̃ba naʌ̃gʌrã crĩcha sid̶a dia b̶ʌa: “Mʌ̃ drõã b̶ʌba ununa warra”, “mʌ̃a erob̶ʌ jũma edaida b̶ʌ warra”, idjab̶a “boro biasi warra.”
*35:22 Bio quĩrũsia. Griego bed̶ead̶e mãwã b̶ʌ́ b̶ʌa. Hebreo bed̶ead̶e neẽ́a. Genesi 49:3-4.