1 Maʌ̃be israelerãra Moab drua jewed̶a b̶ʌmaa wãbʌrʌsid̶aa. Mama Jordaʌ̃ do caita duanesid̶aa. Wa quĩrãrẽ ãdjirã quĩrãpe Jerico puruda b̶asia.

2-4 Maʌ̃ ewarid̶e Zipor warra Baláda moabitarã boro basía. Maʌ̃ Balába cawasia israelerãba amorreorãda poyad̶aped̶a ãdji druara jãrĩsid̶ada. Idjira, jũma moabitarã sid̶a bio ne waya duanesid̶aa israelerã cãbana panʌ bẽrã. Maʌ̃ carea moabitarãba Madiaʌ̃nebema dji dromarãa jarasid̶aa:

–Naʌ̃ israelerãra cãbana panʌ bẽrã dadjirã druara jũma jãrĩnia pacaba chirua jũma cobari quĩrãca.–

5 Maʌ̃ bẽrã moabitarã boro Balába ʌ̃cʌrʌ diabuesia Beor warra Balaaʌ̃ trʌ̃ne. Maʌ̃ Balaaʌ̃ra Amav druad̶e b̶abadjia Petor purud̶e. Petor purura Euprate do icawa b̶asia.*Amav druad̶e b̶abadjia…Euprate do icawa b̶asia. Hebreo bed̶ead̶e nãwã b̶ʌ́ b̶ʌa: “Petor purud̶e b̶abadjia. Maʌ̃ra do icawa b̶asia idji puru warrarã druad̶e.” Balába nãwã jarabisia: “Egiptod̶eba israelerãda mʌ̃ druad̶e cãbana duanane zesid̶aa. Ãdjirãba mʌ̃ druara ab̶ed̶a birasia. 6 Ãdjirãra dairã cãyãbara ʌb̶ʌara panʌa. Maʌ̃ bẽrã ãdjirã biẽ́ jara b̶ʌd̶e zedua. Mãwã mʌ̃a ãdjirãra poyaped̶a mʌ̃ druad̶ebemada ãyã jʌrecuaisicada. Mʌ̃a cawa b̶ʌa bʌa bariduada bia jara b̶ʌibʌrʌ, maʌ̃gʌra bia b̶ebaria. Idjab̶a bariduada biẽ́ jara b̶ʌibʌrʌ, maʌ̃gʌra biẽ́ b̶ebaria.”

7 Moab druad̶ebema dji dromarãra, Madiaʌ̃nebema dji dromarã sid̶a Balaaʌ̃maa wãsid̶aa. Paratada Balaaʌ̃a diad̶i carea edesid̶aa israelerã biẽ́ jara b̶ʌd̶e zemãrẽã. Balaaʌ̃ma jũẽsid̶ad̶e jũma Balába jarabid̶ada nẽbʌrʌsid̶aa. 8 Balaaʌ̃ba jarasia:

–Nama cãĩnadua. Nubʌrʌ mʌ̃a bãrãa jaraya Ãcõrẽba mʌ̃ra idu wãbida wa idu wãbiẽ́da.–

Mãwã jarad̶a bẽrã Moab druad̶ebema dji dromarãra mama cãĩsid̶aa.

9 Maʌ̃ diamasi Ãcõrẽra Balaaʌ̃ma odjaped̶a nãwã iwid̶isia:

–¿Ẽberãrã bʌ ded̶e panʌra cairãda jãwã panʌ?

10 Balaaʌ̃ba Ãcõrẽa panusia:

–Naʌ̃ ẽberãrãra moabitarã boro Zipor warra Balába nãwã jarad̶amãrẽã diabuesia: 11 “Egiptod̶eba ẽberãrãda cãbana mʌ̃ druad̶e jũẽsid̶aa. Mʌ̃ druara maʌ̃ ẽberãrãba ab̶ed̶a birasia. Maʌ̃ carea ãdjirã biẽ́ jara b̶ʌd̶e zedua. Mãwã mʌ̃a ãdjirãra poyaped̶a mʌ̃ druad̶ebemada poya ãyã jʌrecuaisicada.”–

12 Ãcõrẽba Balaaʌ̃a jarasia:

–Naʌ̃ ẽberãrã ume wãrãdua. Ãdjia jara panʌ ẽberãrãra biẽ́ jara b̶ʌrãdua mʌ̃a ãdjirãra careba b̶ʌ bẽrã.–

13 Nurẽma Balaaʌ̃ra pirab̶ariped̶a Balába diabued̶a dji dromarãa nãwã jarasia:

–Bãrã druad̶aa jẽda wãnadua. Ãcõrẽba mʌ̃ra bãrã ume idu wãbiẽ́a.–

14 Moab druad̶ebema dji dromarãra jẽda Balámaa wãnaped̶a jarasid̶aa:

–Balaaʌ̃ra dairã ume ze quĩrĩãẽ́ basía.–

15 Maʌ̃ carea Balába wayacusa dewararãda Balaaʌ̃maa diabuesia. Maʌ̃gʌrãra dji naãrã wã panana cãyãbara dji dromaara b̶easia idjab̶a cãbanaara wãsid̶aa. 16 Ãdjirãra Balaaʌ̃ma jũẽnaped̶a jarasid̶aa:

–Zipor warra Balába nãwã jarabisia: “Mʌ̃ quĩrã djuburia bʌra mʌ̃maa ze ama b̶arãdua. 17 Mʌ̃a bʌ́a paratada waib̶ʌa diaya. Idjab̶a jũma bʌa jarabʌrʌ quĩrãca mʌ̃a oya. Maʌ̃ bẽrã mʌ̃ quĩrã djuburia naʌ̃ ẽberãrãra biẽ́ jara b̶ʌd̶e zedua.”–

18 Baribʌrʌ Balaaʌ̃ba panusia:

–Balába idji de parataba idjab̶a oroba bira cob̶ʌda diabʌrʌ sid̶a mʌ̃a ni cãrẽ sid̶a oẽ́a mʌ̃ Boro Ãcõrẽba mãwã obiẽ́bʌrʌ. 19 Mʌ̃ djuburia bãrã sid̶a id̶i nama cãĩnadua. Naʌ̃ diamasi Ãcõrẽba mʌ̃́a quĩrã awara jaraisicada.–

20 Maʌ̃ diamasi Ãcõrẽra Balaaʌ̃ma odjaped̶a nãwã jarasia:

–Naʌ̃ ẽberãrãba bʌ jʌrʌd̶e ze panʌ bẽrã ãdjirã ume wãdua. Baribʌrʌ ab̶abe odua mʌ̃a bʌ́a jarabʌrʌ quĩrãca.–

21 Nurẽma Balaaʌ̃ra pirab̶ariped̶a idji burro ʌ̃rʌ̃ chũmebarira jʌ̃ped̶a Moab druad̶ebema dji dromarã ume wãsia. 22 Balaaʌ̃ nezocarãda umé idji ume wãsid̶aa. Idjira burro ʌ̃rʌ̃ nĩbasia. Baribʌrʌ idji wãbʌrʌ carea Ãcõrẽra bio quĩrũsia. Maʌ̃ bẽrã Ãcõrẽ nezoca bajãnebemada idji nocod̶aa wãrãmãrẽã o ẽsidra nũmesia. 23 Djõbada necoda idji jʌwad̶e erob̶asia. Balaaʌ̃ burroba idjira o ẽsidra nũmʌda unusid̶e o ãyã wãsia. Maʌ̃ carea Balaaʌ̃ba idji burrora ubadjia wayacusa od̶aa wãmãrẽã. 24 Nocod̶aa wãbʌdad̶e uva ẽjũãne jũẽsid̶aa. Dji ora maʌ̃ ẽjũã ẽsi wãbadjia. Orroza ẽjũãra mõgaraba aud̶u jũrã ca b̶asia. Mama pẽsua wãbadjid̶aa maʌ̃ mõgaraba aud̶u jũrã ca b̶ʌ ẽsi. Maʌ̃be Ãcõrẽ nezoca bajãnebemara wayacusa o ẽsidra nũmesia Balaaʌ̃ nocod̶aa wãrãmãrẽã. 25 Balaaʌ̃ burroba Ãcõrẽ nezoca bajãnebema unusid̶e dji mõgaraba aud̶u jũrã ca b̶ʌd̶aa catʌ ʌra nĩbad̶e wãsia. Maʌ̃ba Balaaʌ̃ jĩrũra catʌ ʌrratʌ edesia. Maʌ̃ carea Balaaʌ̃ba idji burrora wayacusa u jidasia. 26 Maʌ̃be o pẽsua wãbadad̶e Ãcõrẽ nezoca bajãnebemara ãdji nocoare nũmane wãsia. Mama poya ãyã wãẽ́ b̶asia. 27 Mama Balaaʌ̃ burroba Ãcõrẽ nezoca bajãnebema waya unusid̶e ab̶ed̶a egode tab̶esia. Maʌ̃ carea Balaaʌ̃ra bio quĩrũped̶a idji burrora bacuruba wayacusa u jidasia. 28 Maʌ̃ne Ãcõrẽba Balaaʌ̃ burrora bed̶eabisia. Dji burroba iwid̶isia:

–¿Mʌ̃a cãrẽda od̶a bẽrã bʌa mʌ̃ra jãwã b̶arima ũbea usí?–

29 Balaaʌ̃ba panusia:

–Jãwã o b̶ʌa bʌa mʌ̃ra mĩã sẽ b̶ʌ bẽrã. ¡Necoda mʌ̃ jʌwad̶e erob̶ʌbara ara nawena bʌra beatacasia!–

30 Maʌ̃ne burroba jarasia:

–Mʌ̃ra bʌ burroa. Bʌa mʌ̃ edad̶a ewarid̶eba mʌ̃ ʌ̃rʌ̃ nĩbabaria. Bʌa bio cawa b̶ʌa naʌ̃ naẽna mʌ̃ra bʌ ume jãwã nĩbaca basida.–

Balaaʌ̃ba jarasia:

–Wãrãda mãwã b̶ʌa.–

31 Maʌ̃be Ãcõrẽba idji nezoca bajãnebemara o ẽsidra nũmʌda Balaaʌ̃a unubisia. Djõbada neco idji jʌwad̶e erob̶ʌ sid̶a unusia. Maʌ̃ne Balaaʌ̃ra chĩrãborod̶e b̶arru cob̶esia. 32 Ãcõrẽ nezoca bajãnebemaba Balaaʌ̃a jarasia:

–¿Bʌa cãrẽ cãrẽã bʌ burrora b̶arima ũbea usí? Mʌ̃abʌrʌ ora jũãtrʌ erob̶ʌa bʌ nocod̶aa wãrãmãrẽã. Bʌa od̶e wãbʌrʌra mʌ̃a quĩrĩãẽ́a.†Bʌa od̶e wãbʌrʌra mʌ̃a quĩrĩãẽ́a. Hebreo bed̶ead̶e maʌ̃ra ebud̶a b̶ʌẽ́a. 33 Bʌ burroba mʌ̃da b̶arima ũbea unuped̶a mʌ̃ caita zeẽ́ basía. Mʌ̃ caita zed̶abara mʌ̃a bʌra beacasia baribʌrʌ bʌ burrora zocai b̶ʌcasia.–

34 Balaaʌ̃ba panusia:

–Mʌ̃a cadjiruada osia. Adua b̶asia bʌdrʌ o ẽsidra nũmʌda mʌ̃ nocod̶aa wãrãmãrẽã. Bʌmaarã mʌ̃da Balámaa wãida biẽ́ b̶ʌbʌrʌ, jẽda wãya.–

35 Ãcõrẽ nezoca bajãnebemaba jarasia:

–Naʌ̃ ẽberãrã ume bʌra wãida b̶ʌa, baribʌrʌ ab̶abe mʌ̃a jarabi b̶ʌdrʌ jaradua.–

Ara maʌ̃da Balaaʌ̃ra Balába diabued̶a dji dromarã ume wãsia.

36 Balába Balaaʌ̃ zebʌrʌ cawasid̶e Ar purud̶aa audiab̶arid̶e wãsia. Ar purura Arnoʌ̃ do icawa b̶ʌa Moab drua daucha. 37 Balaaʌ̃ jũẽsid̶e Balába idjía jarasia:

–Mʌ̃a bʌ naãrã trʌ̃bisid̶e ¿cãrẽ cãrẽã isabe zeẽ́ basi? ¿Mʌ̃a paratada waib̶ʌa poya diaẽ́da crĩcha b̶asica?–

38 Balaaʌ̃ba panusia:

–Bʌa trʌ̃bued̶a bẽrã mʌ̃ra nama b̶ʌa. Baribʌrʌ mʌ̃a bariduada jaracara b̶ʌa. Ab̶abe Ãcõrẽba jarabi b̶ʌdrʌ jaraida b̶ʌa.–

39 Maʌ̃be Balaaʌ̃ra Balá ume Quiriat-huzot purud̶aa wãsid̶aa. 40 Mama Balába pacada, oveja sid̶a beaped̶a dji dragada Ãcõrẽa babue diasia. Dji djarada Balaaʌ̃a, idji ume panʌ dji dromarãa bid̶a cod̶amãrẽã diasia. 41 Nurẽma diaped̶ed̶a Balába Balaaʌ̃ra eya Bamo-baal abadad̶e ʌ̃taa edesia. Mamaʌba israelerã caitaara panʌra unusia.