1 Gii mendepa, Abrakame kateamo dokonya Kamongo doko ipao panea. Etete kotaka dokonya, Mamarenya lepa ita balo makisa, Abrakame baanya sele anda kambu dokonya petea. 2 Pituu ulu kandalyiamopa, tengesa akali tepoma kalyu piamino kandea. Kandatala baa yapa kamaka pyakalyetala, akali dutupa mambo pyao lanyala pea. Pupala akali dutupanya enombanya luma lakapala, langalu yuunya sia. 3 Sakatatala nyakama lamaiyoo, “Nambanya akali andake, namba embanya kalai akali dake yakinatala napaale. 4 Nambame endaki kamuo nyekena latoo. Nyakamanya moko wasa pyapala, ita tenge dakenya koto nyalapale. 5 Koto nyetaminopa, nyakamanya kalai akali namba katapu dokonya ipamini-lamo dokonya, nambame nee mendatupa nyepakatopa, nyakama napala, kyeto nyepala, nyakamanya patami dupanya pupale” lea. Dopa leamopa, nyakamame baa lamaiyoo, “Etete auu pyoo leeno, dopa pii” leami.

6 Dokopa, Abrakame alo pyao, sele andaka kolandatala, Sara lamaiyoo, “Embame palao epe longo nyepala, yapa betesa wasoo yangakamai!” lea. 7 Lamaitala, baa bulumakao kamenya pupala, bulumakao yakane epe mende nyoo, baanya kalai akali dupame pupae yangakamaina lea. 8 Yangapeaminopa, Abrakameme bulumakao yangapaepi, susu kamupaepi, batapi, dupa minao pao, akali dupa peteamisa setakamaiya. Dopa petala, nyakama nena latala, baa pao ita tenge mendenya katea.

9 Nyakama nee napala, Abrakame tipa pyoo, “Embanya etanenge Sara doko anja pilyape?” leami. Dopa leaminopa, Abrakameme pii yanu pyao, “Baa sele andaka pilyamona” lea. 10 Dokopa, akali aiyomba joo epeamo dokome baa lamaiyoo, “Kana kalyamano dakenyaka, ee kana mende omonya, embanya etanenge Sara wane ane mende mandyuu setao, pititamopa ipatona” lea. Pii leambino dupa Sarame andaka kambusa pituu sia. 11-12 Pii sepala, baame masoo pituu, “Namba enda wambake joo etapae. Nambanya akali andake doko lyanga joo etapaeyaka. Nambame dee auu kaeyao akalingipa tole pyapengepe?” lao masetala, baanya mona andaka gii kaeya. 13 Gii kaeyamo kandatala, akali aiyomba joo epeamo dokome Abrakame lamaiyoo, “Sarame aipuma gii kaeyao, 'Namba enda wambake dakeme kapa wane manditupi' lelyape? 14 Namba Kamongo dokome dopale mende pyaanya nongo pingipi? Nambame gii setelyo dokonya, ee kana omonya, wane ane mende mandipatamopa, ipatona” lea. 15 Dokopa, Sara baa paka kaeyapala, yapae pyoo, “Nambame gii nakaeyalona” lea. Dopa leamoaka doko, Kamongome, “Kiningi, embame gii kaeyalenona” lea.

16 Gii dokopa, akali dutupa sakatao peaminopa, Abrakameme mapala pea. Pao pituu, taono Sodomo doko siamo kandanao kandeami. 17-19 Dokopa, Kamongome masoo pituu, “Nambame mende Abrakame-kisa pituna leo doko pitoo lao masilyo. Baanya wanepi, palupi, dupame nambanya pii sepala, watao minao tolao katapenge. Baame nyakama mana lamaina lao, nambame baa yapao nyio. Baa tata dupa andake jetala, pupu lapae joo palitaminopa, yuunya endakali palitamino dupa pitaka nyakama-kisa nisepae nyetami. Nambame mende Sodomo-kisa pyaanya pelyo doko, Abrakameme sina lamaitoo” lao masia. 20 Dopa lao masetala Kamongome Abrakame lamaiyoo, “Taono Sodomo Gomorapi tange dupame koo pilyamino lapae sipu 21 dokonya, nambame kiningipi lao kanja pelyona” lea.

22 Dokopa, Abrakame baa Kamongopa kateambinopa, akali dolapo Sodomo peambi. 23 Pateambinopa, Kamongonya enomba dokonya Abrakame katapala, baa tipa pyoo, “Embame endakali koo pingi dupa etasoo pyateno dokopa, tolatae katatamino dupa apata pyatepe? 24 Endakali 50 tolatae katatamino dutupa masetala, embame yuu doko yakinatepe, pande dupa apata pyatepe? 25 Embame endakali koo pingi dupa etasoo pyateno dokopa, endakali tolatae dupa apata pyateno doko, mana epe daa. Endakali koo pingipi, tolataepi, lapota makande mendai dokoaka minateno doko, auu napita-lumu. Endakali koo pingipi, tolataepi, dupa pyasoo pyala naeyape. Yuu dakenya emba jasa dokome mana tolatae dokonya pyaapenona” lea. 26 Dokopa Kamongome baa lamaiyoo, “Sodomo tange endakali 50 tolatae katatamino kandato doko, dutupa masetala, nambame yuu doko mende napitoana” lea.

27 Dokopa Abrakameme pii yanu pyao, “Namba koo kenge nasingi dokome, Akali Andake, emba pii langitoo. 28 Embame endakali 45 tolatae katatamino kandao doko, pyatepe?”

“Nambame endakali 45 tolatae katatamino kandato doko, pyala naeyato.”

29 “Endakali 40 tolatae katatamino kandao doko, pyatepe?”

“Nambame endakali 40 tolatae katatamino kandato doko, pyala naeyatona” lea.

30 Dopa leamopa, deaka Abrakameme Kamongo lamaiyoo, “Akali Andake, embame namba imbu nakaeyape. Embame endakali 30 tolatae katatamino kandao doko, pyatepe?”

“Nambame endakali 30 tolatae katatamino kandato doko, pyala naeyatona” lea. 31 Dopa leamopa, Abrakameme lao pituu, “Akali Andake, nambame deaka tipa pitoo, maka nakaeyape. Embame endakali 20 tolatae katatamino kandao doko, pyatepe?”

“Nambame endakali 20 tolatae katatamino kandato doko, pyala naeyatona” lea. 32 Dopa leamopa, Abrakameme lao pituu, “Akali Andake, embame imbu kaeyapengeaka doko, mendai dake etao tipa pilyo: Embame kandatenopa, endakali 10 tolatae katatamino kandao doko, pyatepe?”

“Nambame endakali 10 tolatae katatamino kandato doko, pyala naeyatona” lea. 33 Nyakamba pii lao etapala, Kamongo doko peamopa, Abrakame baa andaka pilyia.