1 Abrakameme enda mende dee nyia, dokonya kenge doko Ketura lenge. 2 Enda dokome wane ane 6-pela mandeamo dutupa: Simarane, Jokasane, Medane, Midiane, Isabake, Suapi lengema. 3 Jokasane baa Seba, Dedanepi takange. Dedanenya yumbange dokaita akali tata Asua, Letusa, Leumapi lengema. 4 Midianeme wane mandeamo dokaita: Epa, Epea, Anoka, Abida, Elidapi lengema, dutupa pitaka Keturanya aputingi.

5 Abrakame baa katao pituu, oapipi tata dupa pitaka kandimi Aisake maiya. 6 Dokopaka mendatupa baanya enda maitakao nyiamo dolaponya wane mandeambino dokaita maiya. Maitala dokaita Aisake-pipa nakatena lao, nyakama niki pyakaenge dokaita-kaita pena lea.

7 Abrakame ee kana 175 yuu dakenya katea. 8 Katapala baa etete lyanga jetala, kumia. Kumateamopa, nyoo yumbange takangepi katenge panda dokonya kateami. 9-10 Abrakameme akali tata Itai dokonya Soa ikiningi Eprone-kisa kananda mende sambapala, Sara malu piamo dokonya Aisake Isamalepame takange malu piambi. Kananda doko yuu Makapela singi. Yuu Makapela doko Mamare tengesa singi. 11 Abrakame kumateamopa, Aisake baa yuu Bilaro dokonya katea. Dokonya kateamopa, Goteme baa minao auu pisia.