1 Gii mendatupa pateamopa, Juumanya nee andake nenge gii doko epeamopa, Jisasa lalyoo Jerusalema pea.

2 Lome kambu Sipisipi lenge mende Jerusalema singi dokonya tengesa dosa, veranda yungi singi dutupanya kainanya endaki pete tombapae, Ibru pii lao Betesada lenge mende singi. 3 Endaki pete tombapae dokonya lembanya endakali lenge mondapi, moko takyepaepi, kingi talyangapi, dopale etete longo mendapu pituu, endaki doko buli pilyape lao kandatae petengema. 4 Gotenya enjele mende ipupala endaki doko minako pilyamopa, buli pilyali pyoo, yaina pyapae dupanya mende, wambao endaki pete dokonya pyakanelya dokonya yaina doko mee jakamaingi. 5 Akali mende ee kana 38 pitaka takyepae singi doko endaki pete lemba dokonya paliu sia. 6 Paliu siamopa Jisasame kandatala, akali doko wamba-waka yaina siana lao masia. Dopa lao masetala baa lamaiyoo, “Embanya yaina doko mee jipya laka lao masilyipi?” lea. 7 Dopa leamopa akali yaina pyapae dokome baanya pii yanu pyakamaiyoo, “Akali Andake, endaki doko buli pilyamopa, endaki pete tombapae dokonya namba nyoo pyandapenge endakali mende nakatenge. Namba tangeme paanya pilyopa, waka mendeme namba nyoo maita pyatala wambao pyakanata pingina” lea. 8 Dokopa Jisasame baa lamaiyoo, “Emba sakatatala, embanya lapa toko doko nyoo soo kaita pae” lea. 9 Dopa lalu piamopa, akali dokonya yaina doko mee julu pia. Dopa peteamopa, baanya lapa toko doko nyoo soo kaita paeya.

Yaina doko Sambata gii mendenya mee jakamaiya. 10  Nia 13:19; Jer 17:21Tenge dokonya, Juu dupame akali yaina pyapae mee jia doko lamaiyoo, “Indupa Sambata dakenya embanya lapa toko doko nyoo soo paelyeno doko, loome daa latae singi doko yalelyenona” leami. 11 Dopa leaminopa baame dokaitanya pii yanu pyakamaiyoo, “Nambanya yaina mee jakalamo akali dokome namba langyoo, ‘Embanya lapa toko doko nyoo soo kaita pae’ lamona” lea. 12 Dopa leamopa dokaitame baa tipa pyoo, “Embanya lapa toko doko nyoo soo kaita pae lame-lumu akali doko apipi?” leami. 13 Panda dokonya endakali longo kambu pyao kateami dupanya-kaita Jisasa baa elyakalao kolala pateamopa, akali yaina pyapae dokome baanya yaina doko akali apimi mee jakalape lao masala naeya.

14 Maitakao Jisasame lotuu anda nee nyetae kamapu dokonya akali doko kandao nyepala baa lamaiyoo, “Indupa embanya yaina doko mee jakalamona, kenda andakele mendeme emba koeyasetana, dee koo mende napipi” lea. 15 Dokopa akali doko pupala, baanya yaina mee jakamaiya akali doko Jisasana lao Juu dupa lamaiya. 16 Jisasame Sambata dupanya kalai dopale dupa piamosa, Juu dupame tee pyao Jisasa tanda maiyoo koeyasetala, baa pyao kumasemana lao kaitini kutiami. 17 Dopa piaminopa Jisasame dupa lamaiyoo, “Nambanya Takange dokome indupapi kalai pyoaka kalyamo dokonya, nambame apata kalai pyoaka kalyona” lea. 18 Dopa leamosa, Juu dupame baa pyao kumasemana lao kyeto joo kaitini kutiami. Baame Sambatanya loo doko yalea dokonya iki daa, Gote baanya Takangena lea dokome baa Gotepa mendai dopalena leamosa, baa pyao kumasemana lao kyeto joo kaitini kutiami.

19 Dokopa Jisasame dokaita lamaiyoo, “Nambame nyakama etete kiningi langilyo: Takange dokome kalai mende pilyamopa, Ikiningi dokome kandenge dokoaka Ikiningi dokome pingi. Ikiningi dokome iki masoo kalai mende napingi. Tenge dokonya, Takange dokome kalai pingili pyoaka Ikiningi dokome pingi. 20  Takange dokome Ikiningi doko mona setenge dokonyana, baame kalai pingi dupa pitaka Ikiningi dokome kandena lao panasingi. Nyakamame walu lao kandataminopa lao, kalai etete andake mendapu Takange dokome Ikiningi doko-kisa panaseta. 21  Takange dokome endakali kumapae dupa sakatasetala lete katenge doko maingi. Dopaka pyoo, Ikiningi dokome endakali mende lete katenge doko maitoo lao masilyamo doko maingi. 22-23  Takange dokome endakali mende yapala naenge. Takange doko anda-anda semaingimali pyoo endakali dupa pitakame Ikiningi doko anda-anda semaina lao endakali dupa pitaka yapenge kalai doko Ikiningi doko maiya. Ikiningi doko anda-anda semaiya naengema endakali dupame baa epena lea Takange doko anda-anda semaiya naengemaka. 24  Nambame nyakama etete kiningi langilyo: Nambanya pii doko sepala, namba puu lea Akali doko tungi pilya endakali dokome, kumingi doko yakinatala, lete etete katenge doko nyingi. Dopa pilya dokome, Goteme tenge setapala tanda maingi doko endakali dokome wandingi.

25  “Nambame nyakama etete kiningi langilyo: Endakali kumapae dupame Gote Ikiningi dokonya pii dupa setamina latae gii doko indupa ipatelyamo. Baanya pii doko setami endakali dupa lete katatami. 26  Lete katenge Takange-kisa singi doko Ikiningi doko-kisa sina lao maiya. 27  Baa Akalinya Ikiningi dokonyana, endakali dupa pitaka yapena lao kyeto doko Ikiningi doko maiyaka. 28  Nambame pii lelyo datupa sepala nyakama walu laa naeyalapape. Gii doko ipatamopa, endakali malu petae dupa pitakame Akalinya Ikiningi dokonya pii doko sepala, 29  Dan 12:2malu dupa yakinatala sakatao ipatami. Mana epe minao kateami endakali dupa lete katatami. Mana koo minao kateami endakali dupa-kisa tenge setapala tanda maita.

30  “Nambanya auu kaengeme kalai mende napingi. Nambanya auu kaengeme kalai mende pitoo latala nambame kaitini kutala naenge. Namba puu lea Takange dokome kalai pii lelyali pyoo, nambame pingi. Takangeme pii dupa namba langilyamopa, baanya pii dupa nambame sepala endakali dupa yapenge. Dopa pilyo dokome, nambame endakali dupa tolao yapenge.

31  “Namba akali dokona lao namba tange iki lato doko, nambanya pii doko sambo jipyali. 32  Dopaka doko, nambanya Takange dokome nambanya lao pii mende lelyamo doko, baame kiningi lelyamona lao nambame masingi. 33  Jone 1:19-27; 3:27-30Nyakamame endakali mendapu Jone kateamo dokonya pena leaminopa, baame kiningi pii doko lao panea. 34  Namba akali dokona lao endakalimi pii lao panelyami dupanya namba kyeto nyala naenge. Dopaka doko, nyakama pyoo nyetamopa lao nambame pii dutupa langilyo. 35  Jone baa lama joo tao kateamopa, nyakama eteke pyao katamana lao masetala, gii kuki baanya tii pipae dokonya kateami. 36  Dopaka doko, Joneme namba akali dokona lao pii leamo dupa nambame kalai pilyo dupame ita minilyamo. Nambanya Takange dokome kalai mendapu pyoo etatale lao namba dia dupa nambame pyoo kalyo. Dopa pyoo kalyo dokome, nambanya Takange dokome namba puu leana lao panelyamo. 37  Matyu 3:17; Make 1:11; Luku 3:22Yuu mendaipi mende Takange doko dopale-lamo lao nyakamame nakandeami. Baame pii leamopa nyakamame nasiamiaka. Dopaka doko, nambanya Takange, namba puu lea dokome namba akali dokona lao, lao panenge. 38  Baame isa yuu dakenya epena lea akali dokonya pii doko kiningina lao nyakamame masala naelyamino dokonya, baanya pii doko nyakama-kisa nasilyamo. 39  Gotenya pii pepa pyapae singi dupanya-kaita nyakamame lete etete katenge doko nyetamape lao masetala, pii dutupaka aipa lao pepa pyapae silyape lao yapao katengema. Gotenya pii pepa pyapae silyamo dupame namba lao pepa pyapae silyamo. 40  Dopaka doko, nyakamame namba-kisa lete katenge doko nyala naepenya tuu pilyamino. 41  Namba endakalimi lalyina lao nakalyo. 42  Gote auu kaenge doko nyakama-kisa nasilyamona lao nambame kandenge. 43  Nambanya Takangenya kenge dokonya namba ipupupa, nyakamame namba maita dilyamino. Dopaka doko, endakali mende baa tangenya kenge dokonya ipatamopa, nyakamame baa lanyetami. 44  Gote mendai iki dokome nyakama kenge andake dina lao kaitini kutala naenya, nyakama-lapo kenge andake mai-mai pyoo katengema dokome, aipa petala nyakamame namba tungi pyatami? 45  Nambanya Takangenya enombanya nambame nyakama-kisa tenge setatena lao masala naeyalapape. Mosesame nyakama nisetana lao nee kaeyao malisoo kalyamino dokomeaka nyakama-kisa tenge setata. 46  Mosesanya pepa pyapae silyamo dupame namba lao pepa pyapae silyamo. Pepa pyapae dupa kiningina lao nyakamame masimili doko, nambanya pii lelyo dupa kiningina lao masimiliaka. 47  Dopaka doko, Mosesanya pepa pyapae silyamo dupa nyakamame kiningina lao masala naelyamino dokome, aipa petala nambanya pii dupa kiningina lao masetamipi?” Jisasame lea.