1 Jisasame loma soo etapala, baanya disaipolo dupa-pipa Kidrone duu dokonya omotena, ee mende sia dokonya pao pyakameami. 2 Paa longosa Jisasa baanya disaipolo dupa-pipa ee dokonya kambu pyata pingima dokonyana, yandapipi dupanya kinginya Jisasa maiya akali Judasa dokome ee doko kandatae. 3 Matyu 26:47-56; Make 14:43-50; Luku 22:47-53Kandatae dokonyana, Judasame Roma tange amiipi, prisa mupa dupanya yanda singipi, Parasi dupanya yanda singipi, dupa lanyepala, lama kaiyapaepi, kipali kaiyapaepi, yanda yandatepi dupa minao epeami. 4 Epeaminopa Jisasame baa-kisa pyaamino dupa pitaka masetala, epeami dokonya tengesa pupala dokaita lamaiyoo, “Nyakamame api kutilyamipi?” lea. 5 Dokopa dokaitame baanya pii yanu pyakamaiyoo, “Nasarete tange Jisasa doko kutilyamanona” leami. Dokopa Jisasame dokaita lamaiyoo, “Namba akali dokona” lea. (Yandapipi dupanya kinginya Jisasa maiya akali Judasa doko akali dokaita-pipa kateami.) 6 Jisasame “Namba akali dokona” leamopa, dokaita maita-konakoname pilyetala yuunya pyapae siami. 7 Dopa piaminopa baame dee dokaita tipa pyoo, “Nyakamame api kutilyamipi?” lea. Dokopa dokaitame lao pituu, “Nasarete tange Jisasa doko kutilyamanona” leami. 8 Dopa leaminopa Jisasame lao pituu, “Akali kutilyamino doko nambana lao nyakama langitalo. Nyakamame namba kutatamino doko, akali datupa pena kaeyalapa” lea. 9 Jisasame wamba loma soo pituu, “Embame endakali namba ditae dupanya mendaipi mende alu pina lao yakinala naeyapuna” lea pii doko angi jina lao, “Akali datupa pena kaeyalapa” lea. 10 Dokopa Saimone Pitame konjuwa mende mandea doko kolanyetala, prisa mupa dokonya kalai akali dokonya kale tolaetena lyanya nepea. (Kalai akali dokonya kenge doko Malakusa lenge.) 11 Matyu 26:39; Make 14:36; Luku 22:42Dokopa Jisasame Pita lamaiyoo, “Nambanya Takangeme kenda paleta kapo mende namba dia doko nambame nala naeyapengepe? Embanya konjuwa doko palenge andanda dokonya mandi” lea.

12 Matyu 26:57-58; Make 14:53-54; Luku 22:54-55Dokopa Roma tange amiipi, dupanya isingi mupa dokopi, Juu dupanya yanda singipi, dupame Jisasa minatala anjiami. 13 Anjetala baa laminao wambao Anasa katea dokonya peami. Anasa doko baa Kaeyapasanya imange. Kaeyapasa baa ee kana dokonya prisa mupa katea. 14 Jone 11:49-50(Kaeyapasa dokome wamba Juu dupa lamaiyoo, “Naima tata dupa pitaka kumala naena lao, akali mendai mendeme naimanya panda nyoo kumatamo dokome naima nisetana” lea.)

15 Dokopa Saimone Pitapa, disaipolo mende dokopa, dolapome Jisasa watao peambi. Disaipolo mende doko prisa mupa dokome kandenge dokonyana, Jisasapa tole pao prisa mupa dokonya anda kamapu dokonya pyakameambi. 16 Matyu 26:69-72; Make 14:66-69; Luku 22:56-58Dokopa Pita baa kamaka lome kambu dokonya katea. Kateamopa prisa mupa dokome kandenge disaipolo doko kamaka pyakalyetala, kalai wanaku lome kambu isoo petenge dokome Pita laminao andakote epena lamaiya. 17 Dokopa kalai wanaku lome kambu isoo petenge dokome Pita lamaiyoo, “Emba apata akali dokonya disaipolo dutupanya mende daape?” lea. Dokopa baame lao pituu, “Namba dutupanya mende daana” lea. 18 (Kalai akalipi, Juu dupanya yanda singipi, dupa kupa kaeyapala, ita yangatala endo soo kateami dokonya Pita apata endo soo kateaka.)

19 Matyu 26:59-66; Make 14:55-64; Luku 22:66-71Dokopa prisa mupa dokome Jisasa tipa pyoo, “Embanya disaipolo dupa apitupape, embame aipa lao mana lengepe?” lea. 20 Dokopa Jisasame baanya pii yanu pyakamaiyoo, “Juu dupa kambu pingi lotuu anda dupanyapi, lotuu anda nee nyetae kamapu dokonyapi, nambame koteaka lao mana lamaiyo. Nambame pii mende yalo pyoo naleo. Isa yuu dakenya endakali dupa pitakame sina lao nambame panao leo. 21 Dopana, aipuma embame namba tipa pilyi? Nambame pii lamaiyopa siami dupame dopa leana lao masilyaminona, embame dokaita tipa pyoo sepe” lea. 22 Dopa lateamopa Juumanya yanda singi dupanya mende, tengesa dosa katea dokome lao pituu, “Embame dopa lao prisa mupa dokonya pii yanu pyakamaingipi?” lea. Dopa latala baame Jisasanya lenge-lyaapinya kingi kapeme toka lao nyia. 23 Dokopa Jisasame baa lamaiyoo, “Nambame pii kopeta mende lato doko, pii doko kopeta lalenona lao embame panao laa. Nambame pii tolao lato doko, aipuma embame namba pilyipi?” lea. 24 Dopa lateamopa, Jisasa kendeme anjiamili petae doko Anasame prisa mupa Kaeyapasa katea dokonya pena lea.

25 Matyu 26:73-75; Make 14:70-72; Luku 22:59-62Saimone Pita baa endo soo kateamopa, akali dosa kateami dupame baa lamaiyoo, “Emba baanya disaipolo dutupanya mende daape?” leami. Dopa leaminopa baame tanga lao, “Namba dutupanya mende daana” lea. 26 Prisa mupa dokonya kalai akali mende dosa katea doko Pitame kale lyanya nepea akali dokonya tata mende. Akali dokome Pita lamaiyoo, “Emba ee dokonya Jisasapa katambinopa nambame kanjo doko daape?” lea. 27 Dokopa Pitame dee tanga lao, “Namba doko daana” lea. Dopa lalu piamopa, yaka pauli pii mende lea.

28 Matyu 27:1-2,11-14; Make 15:1-5; Luku 23:1-5Yongama wamba Juumanya yanda singi dupame Kaeyapasa yakinatala, Jisasa lanyoo gapomanenya anda andake dokonya peami. Dokaita kaimala napitamopa, Pasopa nee doko natamana latala, gapomane anda dokonya kolandala naeyami. 29 Dopa piaminopa Pailatame kamaka pyakalyetala dokaita lamaiyoo, “Nyakamame baa-kisa tenge aipale mende setapala, kotimi laanya laminao epelyamipi?” lea. 30 Dopa leamopa dokaitame yanu pyao, “Akali dakeme koo napingi-pyali doko, naimame baa emba dyaa naipumalina” leami. 31 Dokopa Pailatame dokaita lamaiyoo, “Nyakamame baa nyepala, nyakamanya loo dupanya-kaita baa kotimi lapa” lea. Dokopa Juu dupame baa lamaiyoo, “Gapomanenya loo dokome naimame endakali mende pyao kumasalapape lapae nasingina” leami. 32 Jone 3:14; 12:32Dopa leami dokome, Jisasame baa dopa pyoo kumatona*Dopa pyoo kumatona latae kalyamo doko, Roma tange dupame baa poko itanya pyao yukutami doko lao latae kalyamo. Juu dupame poko itanya pyao yukuala naengema. lao wamba pii lea doko angi jalanya pia.

33 Pailata baa dee baanya andaka kolandatala, Jisasa epena latala lamaiyoo, “Emba Juumanya Kiŋi dokope?” lea. 34 Dopa leamopa Jisasame baanya pii yanu pyakamaiyoo, “Embame lelyeno doko, emba tangeme masoo lelyepe, pande endakali mendapuame namba dokona lao langiminopa lelyepe?” lea. 35 Dokopa Pailatame yanu pyao, “Namba Juu mendepe? Emba tatapi, prisa mupapi, dupame emba namba dyaa ipamino doko, embame aipa pipipi?” lea. 36 Dopa leamopa Jisasame yanu pyao, “Nambanya kingdom doko isa yuu dakenya-tae daa. Nambanya kingdom doko isa yuu dakenya-tae-pyali doko, Juu dupanya kinginya namba namaina lao, nambanya kalai akali dupame yanda pimili. Dopaka doko, nambanya kingdom doko isa yuu dakenya-tae daana” lea. 37 Dokopa Pailatame baa lamaiyoo, “Dopa-tamo doko, emba kiŋipi?” lea. Dokopa Jisasame yanu pyao, “Embame namba kiŋi lelyeno. Namba endangimi mandeamopa isa yuu dakenya epeo doko, kiningi pii doko lao panalanya epeo. Kiningi pii dokonya katengema endakali dupame nambanya pii doko singimana” lea. 38 Dokopa Pailatame baa lamaiyoo, “Kiningi pii doko akipi?” lea.

Dopa latala Pailata baa dee kamaka pyakalyetala Juu dupa lamaiyoo, “Nambame akali dake-kisa tenge mende kandao nanyilyo. 39 Matyu 27:15-31; Make 15:6-20; Luku 23:13-25Dopaka doko, nyakamanya mana singili pyoo, Pasopa gii dokonya nambame akali anjetae dupanya mende mokata pyekenge. Dopa pingili pyoo, nambame Juumanya Kiŋi doko mokokapili lao nyakamame masilyamipi?” lea. 40 Dokopa endakali dupa pitakame puu lao, lao pituu, “Akali doko daana, Barabasa mokoka” leami. (Barabasa doko pake nao makongao paenge akali mende.)