1 Matyu 13:1-9; Luku 8:4-8Luku 5:1-3Jisasame endaki pete lemba dokonya endakali dupa deaka tee pyao mana lamaiyoo kateamopa, endakali longo mendapu ipao baa katea dokonya kambu piami. Dopa piaminosa, endaki pete dokonya sipi sia dokonya baa pyakalyetala peteamopa, endakali kambu doko pitaka endaki pete lemba dokonya kateami. 2 Kateaminopa Jisasame mana longo mendapu kongalimi endakali dupa lamaiya. Baanya mana lamaiya dokonya lao pituu, 3 “Salapape! Ee pokenge mendeme baanya ee wai lyandala pea. 4 Pupala lyandeamopa ee wai yangi dupa kaitininya pao sia. Sia dupa yaka dupa ipupala nao eteami. 5 Ee wai yangi dupa kana-kisa yuu kuki singi dupanya pao sia. Sia dupa yuu kuki singi dokonya pupae langa lea. 6 Langa leaka doko, pingi auu pyoo napiamosa, niki popo pyoo tea dokome dupa sapupala kumia. 7 Ee wai yangi dupa lyiki tenge palenge dupanya pao sia. Sia dupa langa leaka doko, lyiki tambetambe andapala kui pyambeamopa, dii namandea. 8 Ee wai yangi dupa yuu epe dupanya pao sia. Sia dupa langa lao andapala dii mandea. Yangimi dii 30 lao mandea. Yangimi dii 60 lao mandea. Yangimi dii 100 lao mandeana” lea. 9 Dopa latala baame lao pituu, “Nambame pii lelyo dutupa endakali kale katenge dupame sepengena” lea.

10 Matyu 13:10-17; Luku 8:9-10Jisasa baa iki kateamopa, 12 disaipolo dutupapi, endakali mendatupa tole kateamipi, dupa ipupala, kongali pii dokonya baa tipa piami. 11 Dokopa baame dokaita lamaiyoo, “Gotenya kingdom dokonya pii tenge yalo petae doko masalapale lao nyakama ditilyamo. Dopaka doko, endakali kamalya katenge dupa kongaliaka lao lamailyo. 12 Ais 6:9-10Dupa mona kapilyetaminopa dupanya koo dupa Goteme kunao nepakamaitame-latala kongaliaka lao lamailyo. Dupame lengeme kandatamiaka doko, tenge angi doko kandao nanyoo, pii kaleme setamiaka doko, tenge angi doko soo nanyoaka pina lao kongaliaka lelyona” lea.

13 Matyu 13:18-23; Luku 8:11-15Dopa latala Jisasame dokaita lamaiyoo, “Nyakamame kongali pii lalo dakenya tenge doko nyala naelyamipi? Nyala naelyamino doko, aipa petala kongali pii waka dupa pitakanya tenge dupa soo nyetami? 14 Ee pokenge dokome Gotenya pii doko ee wai joo lyandea. 15 Ee wai yangi kaitininya lyandeana lalo dokonya tenge doko dake: Endakali yangimi pii doko sulu pilyaminopa, Satane doko ipupala, endakali dupanya monanya Goteme pii ee wai joo lyandelya doko nyoo nepenge. 16 Ee wai yangi kana-kisa yuu kuki singi dupanya lyandeana lalo dokonya tenge doko dake: Endakali yangimi pii doko sepala, auu kaeyao yapa nyepala, 17 gii kuki mendatupa auu pyoo katengema. Dopaka doko, pii doko mambele kenda dupa epelyamopapi, endakali waka dupame dokaita tanda maiyoo koeyasilyaminopapi, pii doko dokaita-kisa pingi pyala naenge dokonyana, dokaita pupae isa pyakengema. 18 Ee wai yangi lyiki tenge palenge dupanya lyandeana lalo dokonya tenge doko dake: Endakali yangimi pii doko singimaka doko, 19 muni putiti kaenge mana dokome dokaita minakasilyamopa, yuu dakenya nee kaengepi, oapi longo setapu laka lao masingipi, dupame pii doko kui pyapala, dokaita-kisa dii namandenge. 20 Ee wai yangi yuu epenya lyandeana lalo dokonya tenge doko dake: Endakali yangimi pii doko soo nyepala, yangimi dii 30 lao mandenge, yangimi dii 60 lao mandenge, yangimi dii 100 lao mandengena” lea.

21 Luku 8:16-18Matyu 5:15; Luku 11:33Dopa latala baame dokaita lamaiyoo, “Endakali mendeme lama kaiyepae mende nyepala, penge mendenya koko pyandengepe, pande palenge toko mendenya pundipundi setenge? Lama kaiyepae doko toko-kisa panao setala naengepe? 22 Matyu 10:26; Luku 12:2Yame pyatae silyamo dupa pitaka gii mendepa lopapae seta. Yalo petae silyamo dupa pitaka gii mendepa panapae seta. 23 Endakali mende kale katenge-tamo doko, nambame pii lelyo dutupa baame sepengena” lea.

24 Matyu 7:2; Luku 6:38Dopa latala baame dokaita lamaiyoo, “Nyakamame pii setamili pyoo Goteme nyakama pii langita. Pii setami endakali dupa baame pii mendatupa apata konda pyoo langita. Dopana, nyakamame pii silyamino dupanya tenge dupa masokondape pyepape. 25 Matyu 13:12; 25:29; Luku 19:26Aipumape, longo lao singi endakali doko baa konda pyoo maita. Nasingi endakali doko-kisa kuki seta dutupa baa-kisa nasina lao tange nyokonyetana” lea.

26 Dokopa baame lao pituu, “Gotenya kingdom doko akali mendeme yuunya ee wai lyandenge dopale. 27 Baame lyandatala, kuka luu palipa, yongama sakatata pingi. Dokopa ee wai doko tange langa latala andenge. Dopa pilyamopa, aipa petala langa lao andelyape lao baame nakandenge. 28 Yuu dokome tange pilyamopa, ee wai doko dii mandenge. Wambao ee wai doko langa lenge. Langa latala yoko pingi. Yoko petala mange dokonya dii lyoo wambu pingi. 29 Joele 3:13Dii dupa wambu petelyamopa, wambu pingi gii doko ipatelyamona lao masetala, ee pokenge dokome konjuwame dii dupa lyao mandengena” lea.

30 Matyu 13:31-32; Luku 13:18-19Dokopa baame lao pituu, “Naimame Gotenya kingdom doko aipalena lama? Aki mendepa makande pima? 31 Gotenya kingdom doko masete dii dopale. Yuunya ee wai dupa pitakanya masete dii doko etete yakane. Dopaka doko, endakali mendeme masete dii doko yuunya lyandelyamopa, 32 andao yale jetala, ee wai pokatae waka dupa pitaka ita miningi. Dokonya wangya dupa andake mandelyamopa, lumba nelya dupanya yaka ketae paenge dupame anda pipenge jingina” lea.

33 Matyu 13:34Kongali dopale longo mendapuame wai pii epe doko endakali dupame sepengeli pyoo baame lamaiyoo katea. 34 Baame pii lamaiya dupanya mende mee lamaiya naeyao, kongaliaka lao lamaiya. Dopaka doko, baanya disaipolo dupa-pipa iki katao, kongali dupa pitakanya tenge dupa dokaita lamaita pia.

35 Matyu 8:23-27; Luku 8:22-25Gii dokopa yuu kuiyala epeamopa, Jisasame baanya disaipolo dupa lamaiyoo, “Naima endaki pete omotena mua” lea. 36 Dokopa dupame endakali kambu doko yakinatala, Jisasa petea sipi dokonya baa lanyoo peami. Sipi yakane waka mendatupa apata baa-pipa peamiaka. 37 Peaminopa poo yale mende lao sakatea dokome, endaki buli pyapala, tandyoo sipi dokonya kolandea. Dopa piamopa sipi doko endakimi tumbalanya pia. 38 Dokopa Jisasa baa sipi dokonya maita-kaita sanda setapae mendenya luu paleamopa, disaipolo dupame baa pyale tatala lamaiyoo, “Mana Lenge, naima kumalamane-lamo doko, embame naima nee nakaelyepe?” leami. 39 Dopa leaminopa Jisasa sakatatala, poo doko kaena latala, endaki buli pia doko lamaiyoo, “Emba yatu laa! Ema napinya mee saa!” leamopa, poo doko yatu lao, endaki doko emapi mende napyoaka pia. 40 Dokopa baame dokaita lamaiyoo, “Aipuma nyakama paka kaelyami? Aipa petala nyakama Gote tungi napilyamipi?” lea. 41 Dopa leamopa, disaipolo dupa etete paka kaeyapala nyakama-lapo laloo pyoo, “Endakipa, poopa dolapome apata baanya pii lapyali pilyambino doko, akali dake api laa-kanjemape?” leami.