2
Epesusa Siosa Dokonya Pepa Pyao Pyasakamaina Leamo Doko
1 “Epesusa siosa dokonya enjele kalyamo dokonya dapa lao pepa pyao pyasakamaipi: ‘Kingi tolaetename bui kalange minao, lama kaiyepae setenge golome wasepae kalange dutupanya kainanya paenge akali dokome dapa lelyamo: 2 Embanya kalai pingi dupa nambame kandenge. Embame yakinala naeyao, lekeleke tao, kyeto joo kalai pingipi, endakali koo pingi dupa-pipa nakatengepi, dupa nambame kandengeaka. Endakali mendapuame nyakama aposole kalyamanona lengema dupa kiningipi lao nyakamame makande petala, dupa sambo-lamona lao kandateami. 3 Embame nambanya kenge doko masetala, maka nakaeyao, kenda soo yakinala naeyao kalyeno. 4 Dopaka doko, emba-kisa tenge mende silyamo: Wamba embame tee pyao namba auu kaeyenoli pyoo, indupa auu nakaelyeno. 5 Dopana, emba isa pyakatala kateeno doko panda andusa katao pyakeope lao masepe. Dopa petala emba mona kapilyetala, kalai wamba piino dupa deaka pipi. Mona kapilyala naeyateno doko, namba emba katate dokonya yapa ipupala, embanya lama kaiyepae setenge doko nyoo nepato. 6 Dopaka doko, mende embame auu pilyino: Nikolaitusa tata dupanya kalai dupa nambame maka kaelyo dupa embame apata maka kaelyenoaka. 7 Jen 2:9; Esek 28:13; Rev 22:2Spirita dokome siosa dupa pii lamailyamo dupa endakali kale katenge dupame sepenge. Koo pingi mana dupa ita minata endakali doko, lete katasingi ita dokonya baa dii lyao nena lato. Ita doko nambanya Gote dokonya yuu etete epe dokonya katengena’ ” lea.
Semena Siosa Dokonya Pepa Pyao Pyasakamaina Leamo Doko
8 Ais 44:6; 48:12; Rev 1:17; 22:13“Semena siosa dokonya enjele kalyamo dokonya dapa lao pepa pyao pyasakamaipi: ‘Akali mende kumapala lete kalyamo doko, wambao doko baaka, etao doko baaka. Akali dokome dapa lelyamo: 9 Embanya kalai pingipi, kenda soo katengepi, emba daa jingipi, dupa nambame kandenge. (Dopaka doko, angi emba kamongo kalyeno.) Endakali mendapuame nyakama lao nepelyamino dupa nambame kandengeaka. Endakali dokaitame nyakama Juuna lengemaka doko, dokaita angi Juu daa. Dokaita Satanenya lotuu anda dokonya petengema. 10 Dopana, emba tanda nyepenge dupanya paka nakaeyape. Nyakamanya mendapu makande pina lao Sataneme anjinya pyandalapomo. Dokopa yuu gii akalita dutupanya kenda mendapu nyakama-kisa ipapomo. Dopa pyaapomona, nyakamame Gote tungi pingi doko yakinala naeyao minatae katao, kumingi gii doko kandao nyalapape. Dopa pitaminopa, lete katenge dokonya kiŋi balu doko nambame nyakama dito. 11 Rev 20:14; 21:8Spirita dokome siosa dupa pii lamailyamo dupa endakali kale katenge dupame sepenge. Koo pingi mana dupa ita minata endakali doko, lapo pyoo kumingi dokome baa koeyasala naeyatana’ ” lea.
Pegamuma Siosa Dokonya Pepa Pyao Pyasakamaina Leamo Doko
12 “Pegamuma siosa dokonya enjele kalyamo dokonya dapa lao pepa pyao pyasakamaipi: ‘Konjuwa yangi-yangipa lapota nenge katapae miningi akali dokome dapa lelyamo: 13 Embanya kalai pingipi, Satanenya kiŋi toko singi dosa katengepi, dupa nambame kandenge. Akali Antipasa lenge dokome yakinala naeyao nambanya kenge doko lao panao kateamopa, Satane katenge panda dokonya, akali mendapuame nyakamanya kainanya baa pyao kumasiami. Dopa piaminopapi, embame nambanya kenge doko minakondape petala, namba tungi pingi doko yakinala naeye. 14 Nambaa 22:5,7; 25:1-3; 31:16; Diut 23:4Dopaka doko, emba-kisa tenge kuki mende silyamo: Embanya siosa dokonya petenge endakali mendapuame akali Balamenya mana dupa minilyamino. Balameme akali Balake doko mana lamaiyamopa, Israele dupa kaita lyokao, gotena lao wasepae dupa kundi maitae nee dupa napa, kepo kolata pina lao Balakeme mapusia. 15 Dopaka pyoo, embanya siosa dokonya petenge mendapuame Nikolaitusa tata dupanya mana lelyamino dupa wata-minao kalyaminoaka. 16 Dopana, emba mona kapilyepe. Dopa napitino doko, namba emba katate dokonya yapa ipupala, nambanya nenge-kaita konjuwa pyakalyetae kalyamo dokome endakali dokaita yanda pimaito. 17 Eks 16:14-15,33-34; Ais 62:2; 65:15; Jone 6:48-50Spirita dokome siosa dupa pii lamailyamo dupa endakali kale katenge dupame sepenge. Koo pingi mana dupa ita minata endakali doko, manaa nee yalo petae dokonya mendatupa nambame maitala, kana kyeo lapae mende maitoaka. Kana dokonya baanya kenge enenge doko pepa pyatae katata. Kenge pyatae doko endakali mendeme nakandata. Kana doko nyeta endakali dokome iki kandatana’ ” lea.
Taeyataita Siosa Dokonya Pepa Pyao Pyasakamaina Leamo Doko
18 “Taeyataita siosa dokonya enjele kalyamo dokonya dapa lao pepa pyao pyasakamaipi: ‘Gotenya Ikiningi, baanya lenge dolapo itate yuli jepae, moko dolapo aene boronjame kai pyatae joo polepole pingi dokome dapa lelyamo: 19 Embame kalai pingipi, endakali auu kaengepi, Gote tungi pingipi, endakali nisingipi, kenda soo maka nakaengepi, dupa nambame kandenge. Embame kalai indupa pilyino dupame kalai wamba piino dupa ita minilyamo doko nambame kandelyoaka. 20 1 Kiŋi 16:31; 2 Kiŋi 9:22,30Dopaka doko, embanya etanenge Jesebele baa tangeme propetana lenge doko siosanya petena kaeyapinosa, baame nambanya kalai akali dupa minakasoo mana lapya dokome, dokaitame kepo kolao, gotena lao wasepae dupa kundi maitae nee dupa nao pina lapya. Tenge dokonya emba-kisa tenge silyamo. 21 Nambame baa mona kapilyina lao gii mendatupa petena kaeyapu. Dopaka doko, baanya kepo kolenge mana doko yakinatala, mona kapilyala naeyatoo lao masilyamo. 22 Sepe! Tanda nao yaina pyapae singi toko dokonya enda doko nyoo pyale lato. Enda doko-pipa kepo kolengema dokaita mona kapilyetala, enda dokonya mana koo dupa yakinala naeyatamino doko, dokaita etete tanda andake mendenya katena lao nyoo pyale latoaka. 23 Sam 7:9; 62:12; Jer 17:10Dopa petala, enda dokonya wane dupa apata kumina lao nambame pyao kumasotoaka. Dopa pitopa, endakalinya monapi, masingipi dupa kandenge akali doko namba-lamo lao siosa dupa pitakame masetami. Dokopa nambame nyakama mendai-mendai lao kalai pitamili pyoo yole pito. 24 Nyakama Taeyataita tange yangi dupame Satanenya mana yalo petae dupa kanja naeyao, enda dokonya mana dupa wata-minala naeyaowaka pingima dupa nambame dapa langilyo: Nyakama-kisa kenda waka mende nambame setala naelyo. 25 Dopana, nyakamame mana epe minilyamino dupa minakondape pyoo minao katao, namba ipato gii dokonya tuu lapape. 26 Sam 2:8-9Endakali mendeme koo pingi mana dupa ita minatala, nambanya kalai doko yakinala naeyao pyoaka katao, yuu etata gii dokonya tuu latamo doko, akali tata dupa pitaka baame isoo katena lao nambame baa kyeto maito. 27 Nambanya Takange-kisa kyeto nyio doko endakali doko maitopa, penge yuu nongeaneme wasepae mende pyao tambengeli pyoo, baame aene pangali mende minao akali tata dupa pyapapu isoo katata. 28 Dokopa, yuu yongelyamopa bui katenge doko nambame baa maito. 29 Spirita dokome siosa dupa pii lamailyamo dupa endakali kale katenge dupame sepengena,’ ” akali dokome lea.