1 विस्वासुल्‍कुनिटा! पेनदा आत्मा मत्‍तोर्कुनतोनि वळ्कताप मीवातोनि वळ्का पर्राहिल्‍लेन. पेनदा आत्मा हिल्वा दुनियातोरलेसीं आनि किरिस्‍तुनलोप्‍पो इंदकेगुडा पिलाल्कुनसंटोरे इंचि मीवातोनि वळ्‍कतन. 2 नना मीक पाल उह्‍तन, गाटो तिहा हिल्‍लेन; बारित्‍ते मिमेट गाटो तिना पराकोंदिर, गानि इंदकेगुडा मिमेट गाटो तिना परानालायक हिल्‍लिर. 3 बारित्‍ते इंदकेगुडा मिमेट मेंदुल्ता इच्‍चा मत्‍तापे ताकसेक मंतिट. इंकावरोना पोर्रो कळ्‍क पोत्‍तना, जगडाल्‍क कियाना गुनम मंता. अय्ते मिमेट मनकना इच्‍चाते ताकानोर आयिरा? दुनियाता लोकुल्‍कुनालेसीं ताकसेक हिल्‍लिरा? 4 मिहगटाल वरोर, “नना पौलुसनोन आंदुन”, इंकावरोर, “नना अप्‍पुलोसनोन आंदुन” इंचि इंतिर. इल्‍हा मिमेट दुनियातोरलेसीं पेनदुन एरपाट कियवोर आतिरा बतला? 5 अप्‍पुलोस बोर आंदुर? नना पौलुसुन बोन आंदुन? मोमोट इव्वुरमगुडा पेनदा सेवाकुल्कुमे. पेन माक बतल अय्ते कबळ अप्पजेपता, अदुन वेहतोम, मिमेट विस्वासम कीतिर. 6 नना पेळे वाटतन, अप्‍पुलोस एर दोस्तोर, गानि दान बेर्सागोटनद पेने आंदु. 7 इत्‍ते, पेळे वाटनोर आयिर, एर दोस्सानोर आयिर ईर पेद्‍दोर आयुर, गानि दान बेर्सागोटनद पेने पेद्‍देदि आंदु. 8 वरोर वाटतोर, वरोर एर दोस्तोर, इल्‍हा ओरा-ओरा कबळता इसाबते ओर्क बूति दोर्कार. 9 मोमोट पेनतोनि कलियसि कबळ कियानोर्कुम आंदुम, मिमेट पेनदा नेलितसंटोर, पेनदा लोतसंटोर आंदिर.

10 नाक पेन हीता कुर्पाहेंदाल, वरोर बेसता मिस्‍त्रिनलेसीं पुनादि दोहतन, दानपोर्रो इंकावरोर रद्‍दा दोस्सेक मंतोर, इल्‍हा वरोर-वरोर दानपोर्रो दोस्सानोर बल्हा रद्‍दा दोस्सेक मंतोर, ओर बेस हूळसि दोसना. 11 येसु किरिस्‍ते पुनादि आंदुर. ओर दोहता पुनादि आयाका, इंका बोरे वेरे पुनादि दोहा पर्रुर. 12 बोरन्‍नागिंटा बंगारम, एंडि, एक्‍को दराता बंडां, कट्‍टे, जाडि, बुस्सिते पुनादि दोहना मत्‍ते, 13 किरिस्‍तु मर्रा वायाना रोजुने अंटोरा कबळ दिसंता. बारित्‍ते अद रोज ओर तळमितोनि वांतोर, बोर बतल कबळ कीतोर इंचि तळमिते परिक्‍सा कियमळ जर्गंता. 14 अद पुनादिपोर्रो दोहता कबळ निल्‍सि मनानय्ते, ओनकु इनाम दोर्कंता. 15 बोनदन्‍ना गिंटा ओर कीता कबळ वेसि होत्‍ते, ओनकु नुकसान आंता. ओर अय्ते पिस्संतोर गानि तळमिताल पेय्सताप पिस्संतोर.

16 मिमेट पेनदा गुळि आंदिर, पेनदा आत्मा मीलोप्‍पो मनंता, इद मीक तेळियोना? 17 बोरन्‍नागिंटा पेनदा गुळितुन नासडेम कियानय्ते, पेन ओन नासडेम किय्‍यार. पेनदा गुळि पवित्र मनंता, अद मिमेटे आंदिर. 18 बोरे आयिर ओनद-ओरे पसांचकुनामन्‍नि. बोरन्‍नागिंटा मिहागटाल ई दुनियाते नना तेल्वितोन इनकुनानय्ते, पेनदा नदरते तेल्वितोर आयालय, मोदाला मुर्कनलेसीं आयापींता. 19 दुनियाता तेल्वि पेनदा मुन्‍ने मुर्कतनमतद आंद. बारित्‍ते, “पेन तेल्वितोर्कुन ओरा उस्सारतनमता लोप्पो पसांचंता,”✡अय्यूब 5:13 इंचि दर्मसास्‍त्रमते रासि मंता. 20 आनि मर्रा, “तेल्वितोर्कुना विचाराल्क एर्तम आंदुं इंचि पेनदुक एरपाटे,”✡बजन संहिता 94:11 इंचिगुडा दर्मसास्‍त्रमते रासि मंता. 21 अदुनहाटीं नना ईना हेंदोन, नना ओना हेंदोन इंचि मनकालोर्कुना पोर्रो पेद्‍दिरकेम कियामन्‍नि, अन्‍नि मीवंगे आंदुं. 22 पौलुस आयिर, अप्‍पुलोस आयिर, केपाल आयिर, दुनिया आयि, पिस्वर आयि, हामुर आयि, ताकाना कालमता पोल्‍लें आयि, वायाना कालमता पोल्‍लें आयि, अन्‍नि मीवंगे आंदुं. 23 मिमेट किरिस्‍तुनोर आंदिर, किरिस्‍तु पेनदोड आंदुर.