1 नना दासतनमताल इळबळसि हिल्‍लेना? नना प्रेरितुन आयोना? मना सामि येसुन नना हूळा हिल्‍लेना? सामिना लोप्पो नावा कबळता पलम मिमेट आयिरा? 2 नना वेरे लोकुल्‍कुनाहाटीं प्रेरित आयाकोन्‍ना गानि मीवाहाटीं अय्ते प्रेरितुने आंदुन. नना सामिन लोप्पो प्रेरितुन इंचि मिमेटे सिक्‍कालेसीं निसान आंदिट.

3 बोर अय्ते नावातोनि वाद-विवाद कियालय हूळांतुर, ओराहाटीं इद नावा जवाब आंद. 4 माकु तिनना-उनना अदिकारम हिल्‍लेना? 5 कळमता प्रेरितुल्क, सामिना तम्मुह्‍क आनि केपल (पत्रु) ईर ओरा मुत्‍तोह्‍कुन पीकुंचि तिरियताप मोमोटगुडा विस्वासि मुरतळतोनि मरमिं आसि पज्जेके पीकुंचि तिरियना अदिकारम माक हिल्‍लेना? 6 हिलाकोंटे पिस्वरहाटीं कबळ कियाकोंटा मनालय सिराप बरनाबास आनि नाके अदिकारम हिल्‍लेना? 7 बोर ओना संतम कोत्‍तां कर्स कीसि सिपाइना नौकरि कींतोर? बोर अंगुरता बगिचा कीसि अंगुर पंडिं तिनाका मनंतोर? आनि बोर गोळ्कु-गोर्रें पोसकीसि अवुना पाल उनाका मनंतोर? बोरे मन्‍नोर.

8 नना मनकना रीतिते इल्‍हा इंचेके मंताना? हिल्‍ले. 9 “कळाते बंति तिराहनेंके कोंदांक मूस्का बुट्‍टि दोहा मनि.” इद पोल्‍ले सिराप कोंदानाहाटींगे पेन वेहा हिल्‍ले, मूसाना नियमतेगुडा इल्हे रासि मंता. 10 मनाहाटींगुडा वेहता. बारित्‍ते ऊडानोर आसेतेन ऊडंतोर आनि बंति तिरहानोरगुडा पंटाते पाल गावाले इत्‍ता आसेतेन बंति तिरहंतोर.*किरिस्‍तुना सेवा कियानोर बोरगा सेवा कींतोर ओरागेन तिंदना. 11 मोमोट मीलोप्‍पो बेस आत्माता विज्‍जां वीततोम. अय्ते माक अव्‍सरम मत्‍तवुन मिमेट हीते, अवुन एतमळ बतल तप्पु आंदा? तप्पु आयो. 12 वेरेतोर्क गिंटा मीपोर्रो अदिकारम मत्‍ते, दानकन्‍ना एक्‍को माक अदिकारम मनंता. गानि किरिस्‍तुना बेसता कबुरतुन वेहनेंके मावाहेंदाल बतले अड्‍डम वायामन्‍नि इंचि मोमोट आ अदिकारम एताका अन्‍नि सहन कीसेक मंतोम. 13 मीक अय्ते एरपाटे मंता, गुळितगा सेवा कियानोर्कुंक गुळितगटाले गाटो दोर्कंता. गद्‍देतगा सेवा कियानोर्कुंक अगा अरतवुनाल तूस दोर्कंता.✡लैव्यवस्‍ता 6:16,26; व्यवस्‍ताविवरन 18:1-3 14 अल्‍हेने किरिस्‍तुना बेसता कबुर वेहानोर्कुंक, बोर अय्ते अद कबुर केंजसि विस्वास कींतुर, ओरा हेंदाले पिस्वर दोर्कागोम इंचि सामि हुकुम हीतोर.

15 गानि बोरन्‍ना नावा पेद्‍दिरकेम एर्तम कियानादानकन्‍ना नाक हायमळे बेस अनपिच्‍चंता. अदुनहाटीं नना बोनाहेंदाले पिस्वरता पाय्दा एता हिल्‍लेन, मिमेट नावाहाटीं इल्‍हा कीम्‍टु इंचिगुडा रासेक हिल्‍लेन. 16 नना बेसता कबुर वेहचि बतल पेद्‍दिरकेम कीसेक हिल्‍लेन. बारित्‍ते इद नावा जिम्मेदारि आंद, नाक बेसता कबुर वेहमळे गावाले. ओक्‍कला वेहाकोंटे नना बूळ्‍दि आकन. 17 नना ओक्‍कला नावा इच्‍चाताल इदुन कीते नाक इनाम दोर्कंता. ना इच्‍चाताल कियाकोन्‍नागानि दाना जिम्मेदारि पेन नाक अप्पजेपता. 18 अय्ते नावा इनाम बतल? नना बेसता कबुर वेहनेंके नाक दोर्कना अदिकारम एताका बेसता कबुर पुक्‍कटते वेहमळ, इदे नावा इनाम आंद. 19 बारित्‍ते, नना बोना कय्‍दा हिळु हिल्‍लेन, अय्नागानि वेल्‍लेटोर्कुन किरिस्‍तुनगा पीसि वायाना इंचि नावद-नना अंटोरा दासुन आतन. 20 यहुदिल्कुन किरिस्‍तुनगा तर्रालय नना यहुदिल्कुनालेसीं आतन. मूसाना नियमते ताकानोर्कुन किरिस्‍तुनगा तर्रालय मूसाना नियमते ताकाना अव्‍सरम हिलाकोन्‍ना गानि नियम पीसि ताकतन. 21 मूसाना नियम पीसि ताकवोर्कुन किरिस्‍तुनगा तर्रालय नियम हिल्‍वोरलेसीं आतन. इत्‍ते पेनदा नियमतुन पास्कंतन इंचि आयो, गानि किरिस्‍तुना नियम पीसि ताकानोन आंदुन. 22 विस्वासमते कमजोर मत्‍तोर्कुन किरिस्‍तुनगा तर्रालय, नना ओरालेसीं आतन. बल्हैना आयि इच्‍चुरन्‍ना पिसागोम इंचि, बोर बल्हा मंतुर, ननागुडा ओरालेसीं आतन. 23 ओरतोनि बेसता कबुरता आसिर्वादते नाकगुडा तूस दोर्कना इंचि इवन्‍नि कीसेक मंतन.

24 पंदेम वाटसि वितनेंके अंटोरे वित्‍तंतुर, गानि इनाम वरोंके दोर्कंता इंचि मीक एरपाटे मंता. मिमेटगुडा वितनेंके इनाम दोर्कनालेसीं वित्‍तट. 25 कर्सानोर अंटोर बेस करियसि ओरद-ओर तयारते मनंतुर, अदगुडा नासडेम आयाना किरिटम दोर्किच्‍कुनालय इवन्‍नि कींतुर. गानि मनम अय्ते बस्‍केने नासडेम आयवा किरिटम दोर्किच्‍कुनालय कींतोम. 26 अदुनहाटीं नना बद जेगातगळ्क अय्ते वित्‍तना, अगळ्क बेस वित्‍तंतन, ननागुडा पिळ्किलते गुद्‍सेक लडांचंतन, वळिते लडांचताप आयो. 27 नना ना मेंदुल्तुन आपकुंचि इरंतन. नना वेरेतोर्कुंक बेसता कबुर वेहचि, नावा लोप्पेने तक्‍को मत्‍ते नना बाता कबळतोन आयोन.