1 योहान
योहान रासता मोदाटा सिट्‍टि
इद सिट्‍टिता बारेमते गिचचो परिचयम
रासतोना पोरोल: योहान
रासता कालम: इसवि सन 85-95
येसुना वरोर प्रेरित योहान इद सिट्‍टि विस्‍वासुल्‍कुनाहाटीं रासतोर. अदुनहाटीं ओर येसुनतोनि मत्‍तास्‍केटा ओना अनुबवमतुन इद सिट्‍टिते रासि वेहतोर.
येसु किरिस्‍तु पुरागा पेन आनि पुरागा मनकलगुडा आंदुर. ओनापोर्रो विस्वासम इरतेने, मना पापाल्क मापि आसि मनाकु बस्‍केळ्‍क पिस्‍साना पिस्वर दोर्कंता. पडाना रीति-रिवाज्‍कुन पीसि मनम ताका पर्रोम, इंचि अवुनाहेंदाल मनाकु बस्‍केळ्‍क पिस्‍साना पिस्वर दोर्का पर्रो.
बोर अय्ते किरिस्‍तुनपोर्रो विस्वासम कीतुर, ओर अंटोर वरोंक-वरोर पावरम कीसेके बेस कलियसि मंदना, अर्तम हिलुवा नियमाल्‍कुन होळसिसि किरिस्‍तु हुपिस्‍ता हरदेन ताकाना. इसोंटा पोल्‍लें इद सिट्‍टिते योहान रासतोर.
बगा बतल मंता
जोहार आनि परिचयम 1:1-4
वेल्‍गु आनि हीकटा 1:5–2:29
पेनदा पिलाल्क आनि देय्यमता पिलाल्क 3:1-24
सत्‍तेम आनि आबद्‍दम 4:1-6
पावरमता कबळ बतल 4:7-21
गेल्‍सना विस्वासम 5:1-21
1
पिस्वर हिय्यना पोल्‍ले
मोट्‍टा मोदोल्ताल बोर अय्ते मत्‍तोर, ओना बारेमते मोमोट मीकु वेहचंतोम. ओन मोमोट केंजतोम, ओन मावा कळ्‍कुने हूळतोम, मंचिगा हूळसि मावा कय्‍कुने ओन इट्तोम. पिस्वर हिय्यना पोल्‍ले ओरे आंदुर. आ बस्‍केळ्‍क पिस्‍साना पिस्वर हिय्यना पोल्‍ले मोदाला पेनबाबानतोनि मत्‍तोर. ओन पेन मनकाना रूपमते मारियागोटसि बूमिते लोहताहेंका मोमोट ओन हूळतोम, इंचि गवाइ वेहांतोम. अल्‍हेने आ बस्‍केळ्‍क पिस्‍साना पिस्वरता बारेमता कबुर मीकु वेहांतोम.
मोमोट अय्ते पेनबाबानतोनि ओना मर्रि येसु किरिस्‍तुनतोनि कलियसि उंदासि पिस्सेक मंतोम, अदुनहाटीं मोमोट बतल अय्ते हूळतोम, केंजतोम, अदुना बारेमते मीकुगुडा वेहासेक मंतोम. दीनहेंदाल मिमेटगुडा मातोनि कलियसि मनम उंदासि मंदकोम. मिमेट मातोनि कलियसि मावा आनंदम पुरागा आयाना इंचि मोमोट इव पोल्‍लें मीकु रासेक मंतोम.
पेन वेलगु आंद
येसुनाहेंदाल मोमोट बद कबुर अय्ते केंजतोमो, अदे कबुर मीकु वेहांतोम. अद बतल इत्‍ते, पेन वेलगु आंद, दानागा गिचचोगुडा हीकट हिल्‍ले. ओक्‍कला मनम पेनतोनि कलियसि मंतोम इंचि वेहचि, हीकटते ताकानय्ते मनम आबद्‍दम वळ्‍कंतोम, सत्‍तेमते ताकसेक हिल्‍लोम. गानि पेन बल्हा वेलगुने मंता, अल्हा मनमगुडा वेलगुने ताकानय्ते, मनम वरोनतोनि वरोर कलियसि उंदासि मत्‍ताप मनंतोम. अस्‍के पेनदा मर्रि येसुना नेत्‍तुर, मनाकुन मना अन्‍नि पापाल्कुनाल पुरागा बेस साप कींता.
ओक्‍कला मनमगिंटा, महगा बदे पापम हिल्‍ले इंचि वेहकुनानय्ते, मनद मनमे पसांचकुंचंतोम, मनालोप्‍पो सत्‍तेम हिल्‍ले. गानि पेन नीति आनि विस्वासमगल्‍लद आंद. अदुनहाटीं ओक्‍कला मनम मना पापाल्कुन दाना मुन्‍ने ओपकुनानय्ते, अद मना पापाल्कुन मापि कीसि, मनाकुन मना अन्‍नि तप्‍पुड कबाह्कुनाल बेस साप कींता.बजन संहिता 32:5; नीतिवचन 28:13 10 ओक्‍कला, “मोमोट पापम किया हिल्‍लोम” इंचि मनम इनानय्ते, मनम पेनदुन आबद्‍दम हिळु अरहंतोम. दाना पोल्‍ले मनालोप्‍पो हिल्‍ले.

1:9 बजन संहिता 32:5; नीतिवचन 28:13