1 बल्हा अय्ते किरिस्‍तु मेंदुल्ते मत्‍तस्के तकलिप बोगांचतोर, मिमेटगुडा ओनसोंटा मनसु इर्सि दान मीवा विस्रेलेसीं वाळकुंटु. बारित्‍ते, बोर अय्ते तकलिप बोगांचंतोर, ओर पापमतुन होळसींतोर. 2 ओर वायाना रोजकुने मेंदुल्ता इच्‍चाना परकारम आयो गानि पेनदा इच्‍चा परकारम पिस्संतोर. 3 मोदाला मिमेट यहुदि आयवोरा इच्‍चाना परकारम बोगमतनम कियमळ, जोसते मनमळ, कल्‍लु उनमळ, पार्टिं कियमळ, रिम्मा आयमळ, नियमकु विरोदमते ताकमळ, बतक ओज्जुवा बोम्मन मोळ्कमळ इल्‍हा कियिंदिर, इद वेल्‍लेने आता.

4 इंदके मिमेट असोंटा पेद्‍दा बोगमतनाल्कुने ओरतोनि कलियसेके हिल्‍लिर इंचि ओर इचंत्रम आसेक मंतुर. अदुनहाटीं ओर मीकुन बदनाम कीसंतुर. 5 गानि हातोरा, पिस्तोरा न्‍यायम कियालय तयार मनना पेनदुक ओरा पिस्वरता लेक्‍का हियापींता. 6 मेंदुल्ते मत्‍तास्‍के न्‍यायम मनकालोरा इच्‍चातुन पीसि आयिनागानि, आत्मा मात्रम पेनदा इच्‍चा परकारम पिस्‍साना इंचि बोर अय्ते हासि मत्‍तुर, ओर्कगुडा बेसता कबुर वेहमळ जर्गता.

7 इंदके दुनियाते मनना अन्‍निटवुना आकिर रोजकु दग्‍गेरा एवतां. अदुनहाटीं मिमेट पारतना कियानेंके बेस विचारमते, तेल्‍विते मंटु. 8 अन्‍निंकन्‍ना पेद्‍दा पोल्‍ले बतल इत्‍ते, वरोंक-वरोर एक्‍को पावरम कीम्‍टु, अल्हा कीते वेल्‍लेने पापाल्कुन मापि किया परकिर. 9 बतले गुल्‍गाकोंटा वरोंक-वरोर हेडमितोरलेसीं बेस हूळकुंटु.

10 अंटोर्क वेरे-वेरे वरम दोर्कता, अदुनहाटीं वरोंक-वरोर सेवा कियालय पेनदा तीरतीराता कुर्पा दोर्कता बेसता दिवांजिनलेसीं अदुन वाळकुंटु. 11 बोन्क अय्ते पेनदा पोल्‍ले वेहाना वरम दोर्कता, ओर पेन वेहतापे वळ्कना. बोर अय्ते सेवा कींतोर, ओर पेन हिय्यना बलमतेने कियाना. अन्‍नि पोल्‍लेने येसु किरिस्‍तुनाहेंदाल पेनदुके महिमा दोर्काना. महिमा आनि ताकत युगा-युगाल्‍कुनदाका पेनदादे आंद. आमीन.

12-13 नावा पावरमगल्‍लोरिटा! मीवा परिक्‍सा कियानाहाटीं मीवापोर्रो तळमितसोंटा तकलिपकु वांतां, अस्‍के मिमेट “बस्‍केने जर्गवद जर्गना मंता” इंचि, परेसान आयमटु. गानि मोमोटगुडा किरिस्‍तुना दुक्‍कमते पोत्‍तु आतोम इंचि कुसिते मंटु. किरिस्‍तु मल्सि वासि ओना पेद्‍दातनमतुन हुपिस्तस्के मिमेट वेल्‍ले कूस आकिट. 14 मीकुन ओक्‍कला बोरन्‍ना किरिस्‍तुना पोरोलताहेंदाल अपमानम कीते, मिमेट आसिर्वाद दोर्कतोरे आंदिर. बारित्‍ते पेनदा महिमाता आत्मा मीपोर्रो मंता. 15 गानि मीवा लोप्पोटोर बोरे आयिर, हव्कताहेंका, दोंगातनम कीताहेंका, तप्‍पुड कबळ कीताहेंका, वेरेतोरा कबळते कय वाटताहेंका दुक्‍कम बोगांचा मन्‍नि. 16 ओक्‍कला मीलोप्‍पो बोरन्‍ना किरिस्‍तुनोर आताहाटीं तकलिपकु बोगांचनय्ते, ओर सिग्गु अर्रानायो, गानि किरिस्‍तुना पोरोल दोर्कताहाटीं पेनदुक महिमा हियागोम. 17 बारित्‍ते न्‍यायम कियाना वेला एवता. पेन मनातोने न्‍यायम सुरुव कींता अय्ते, बोर अय्ते पेनदा बेसता कबुरतुन केंजुर ओरा गति बतल आयार?

18 ओक्‍कला नीतिमंतुके मुक्‍ति दोर्कुळ कस्‍टम आयानय्ते, दुस्‍टुल्क आनि पापिल्कुनद बतल आयार?

19 अदुनहाटीं बोर अय्ते पेनदा इच्‍चा मत्‍ताप तकलिप अरसेक मंतुरो, ओर बेसता कबाह्‍क कीसेके, मनाकुन पुटिस्ता विस्वासमल्‍ला पेनदुक ओरा आत्मानु अप्पजेप्पना.