1 विस्वासुल्‍कुनिटा! बल्हा पिसते पेनदुन कूस ईरा परांतोम इंचि मिमेट मावाहेंदाल करियतिर, अल्‍हेने मिमेट पिस्सेकगुडा मंतिट, इंकागुडा मुन्‍ने अल्‍हेने पिस्सेक होंट इंचि विनंति कीसेके मंतोम आनि येसु सामिना लोप्पो तेल्‍पिच्‍चि वेहासेक मंतोम. 2 मोमोट येसु सामिनाहेंदाल बव-बव आदेसकु हीसि मत्‍तोम, अव मीक एरपाटे. 3 बारित्‍ते मिमेट बोगमतनमताल लक्‍कु मत्‍ते पवित्र मनंतिर, इदे पेनदा इच्‍चा आंद. 4 मीवा लोप्पोटाल हरेक मनकल ओना मेंदुल्तुन*मेंदुल्तुन इग्‍गे मेंदुल्तुन इत्‍ते मुत्‍तोन इंचि अर्तम. ओप्के पीसि, पवित्र, कदर कियानालायक मनमळ गावाले. 5 लालचते मनानोर पेनदुन एरपाट किय्युर, असंटोरतोनि इल्‍हा मनमळ आयापर्रो. 6 दीना बारेमते बोरे आयिर दंटाता विस्वासिन पसांचामन्‍नि, पसांचते सामि ओर्क सिक्‍सा हींतोर इंचि मोमोट मीक मुन्‍नेने गट्‍टिगा वेहतोम. 7 बारित्‍ते पेन मनाकुन पवित्र मनालय केयता, कराब मनालय आयो. 8 अदुनहाटीं बोर अय्ते इद पोल्‍लेतुन पास्कंतोर, ओर मनकन पास्‍कोर गानि मीक पवित्र आत्मा हियना पेनदुन पास्कंतोर.

9 इंदके वरोंक-वरोर पावरम कियमळ मिमेट पेनदाहेंदाले करियतिर. अदुनहाटीं दादाल-तम्मुह्कुनालेसीं मिमेट वरोंक-वरोर पावरम कीम्‍टु इंचि रासनद अव्‍सरम हिल्‍ले. 10 मिमेट मेसिडोनिया राज्येमते मनना अंटोर विस्‍वासुल्‍कुन पावरम कीसेके मंतिट. गानि विस्वासुल्‍कुनिटा! मिमेट इंका एक्‍को पावरम कीम्‍टु इंचि मोमोट विनंति कीसेके मंतोम. 11 मोमोट मीक आदेस हीताप, सांतिते पिस्सना, बोना कबाह्‍क ओरे कियाना, बोना कयकुने ओरे कबळ कियाना कोसिस कीम्‍टु. 12 इल्‍हा मत्‍ते मिमेट विस्वासम कियवोरा मुन्‍नेगुडा कदरलायक मनंतिर, बोना पोर्रोने बर्वु आयिर.

13 विस्वासुल्‍कुनिटा! हातोरा बारेमते मीक तेळियाकोंटा मनमळ माक इस्‍टम हिल्‍ले. बदे आसे हिल्वोर दुक्‍कमते मनंतुर, गानि ओरालेसीं मिमेट मनमट. 14 बारित्‍ते येसु हासि मर्रा जीवाते तेदतोर इंचि मनम विस्वासम कींतोम, अल्‍हेने बोर अय्ते येसुन विस्वासम कीसि हातुर, ओर्कुन पेन येसुनतोनि पीसि वायार. 15 सामिना पोल्‍ले परकारम मोमोट मीक वेहानद बतल इत्‍ते, सामि मर्रा वायानस्के मनम पिस्सि मनिनागानि, हाता विस्वासुल्कुंकन्‍ना मुन्‍ने सामिनगा होना पर्रोम. 16 बारित्‍ते सामि स्वर्गमताल हिळु रेयानुर अस्‍के पेद्‍दा आवाजते आदेस हियमळ, पेद्‍दा दूताता पोल्‍लेते आनि पेनदा तूताकोमता आवाज कियमळ जर्गंता. अस्‍के बोर अय्ते किरिस्‍तुनलोप्‍पो हातुर, ओर मुन्‍ने जीवाते तेदानुर. 17 पजा ओरतोनि पिस्सि मत्‍ता मनाकुनगुडा, मब्बु तेर्पेनपोर्रो वळिते किरिस्‍तुनतोनि कलियालय तेहकुंचि ओयमळ जर्गंता. इल्‍हा मनम बस्‍केळ्‍क सामिनतोनि मनंतोम. 18 अदुनहाटीं इव पोल्‍लेनाल वरोंक-वरोर दैरनेम हीसेक मंटु.