1 अस्‍के बल्हा लोकुल्‍कुना नड्‍डुम आबद्‍दम कबुरतोर मत्‍तुर, अल्‍हेने मीवा नड्‍डुमगुडा आबद्‍दम कराहनोर मंदानुर. नासडेम कियाना नियमकुन ओर मक्‍किस पीसि वांतुर आनि बोर सामि अय्ते ओर्कुन अस्तोर, ओनगुडा ओर ओप्‍कुन्‍नुर. इल्‍हा ओरद-ओरे नासडेमतुन बिराना ओरापोर्रो तरकुंतुर. 2 वेल्‍ले लोकुल्‍क ओरा सिग्गु हिल्वा कबाह्‍कुन हूळसि ओरालेह्केन कियानुर. ओरसंटोराहाटींगे सत्‍तेमता हर्रि बदनाम आंता. 3 आबद्‍दम कराहनोर, आस्तिताहाटीं तिय्यटा पोल्‍लें वेह्‍चि मीकुन ओरा पायदाहाटीं वाळकुंतुर. ओर्क हीता सिक्‍साता आदेस मुन्‍नेटाल मंता, ओरा नासडेम कूर्कसेके हिल्‍ले.

4 बारित्‍ते, बस्के अय्ते पेनदा दूतां पापम कीतां, अस्‍के पेन अवुनगुडा होळसा हिल्‍ले. न्‍यायमता रोजु वायानादाका अवुन नरकमते हीकटता पोक्‍काने वाटसि इरता. 5 अचोने आयाका पेन एनकटा कालमता दुनियातुनगुडा होळसा हिल्‍ले, अद कालमते बक्‍ति हिल्वा लोकुल्‍कुना दुनियापोर्रो पेद्‍दा कम्मुळतुन वायागोटता. गानि सत्‍तेमता पोल्‍लें वेहता नोहानतोनि एडुरकुन पिसागोटता. 6-7 अल्‍हेने सदोम, गमोरा सहरकुने लोत इनानोर वरोर नीतिमंतुड मत्‍तोर. ओर आ सहरता दुस्‍ट लोकुल्‍कुना दुस्‍ट कबाह्‍कुनाहेंका वेल्‍ले दुक्‍कमते मनुंदुर. अदुनहाटीं पेन ओन सिक्‍साताल पिसागोटसि, आ सहरकुन बूळ्‍दि कीसि पोहता. इल्‍हा बोर अय्ते बक्‍ति हिलाका पिसंतुर ओर्कु इसोंटा सिक्‍सा वांता इंचि उदाहरनलेसीं हुपिस्‍ता. 8 आ नीतिमंतुड ओरा नड्‍डुम मत्‍ताहाटीं ओर कियाना रोता कबाह्‍क हूळसि, ओरा पोल्‍लें केंजसि, ओना जीवाक रोज-रोज इरगा बादा अनपिच्‍चुंदु. 9 इल्‍हा, बक्‍तिगल्‍लोर्कुन परिक्‍सानाल बल्हा कापाळना आनि बक्‍ति हिल्वोर्कुन न्‍यायमता रोजुनदाका सिक्‍साते बल्हा वाटसि इर्राना इत्‍तद सामिंक तेळियसे मंता. 10 कास कीसि, बोर अय्ते पापमते अल्हेन मेंदुलता आसेता अदिकारमते मंतुर, ओर इरगा गर्रा आनि जिद्‍दिते निंडसि मत्‍ताहेंका स्वर्गमकु संबंदिंचि मत्‍तोर्कुनगुडा तेराहलय वेरियुर. 11 पेनदा दूतां अय्ते ओरकन्‍ना एक्‍को ताकत, बलम मत्‍तव आंदुं, अयना सामिना मुन्‍ने ओरा बारेमते तेराहनसोंटा पोल्‍लें वळ्‍किसि ओरपोर्रो दोसेम दोस्‍सों. 12 गानि ईर ई लोकुल्‍क ओर्क तेळियवा पोल्‍लेना बारेमते तेराहसेक मनांतुर, दोर्कापीसि हव्कानाहाटीं पुटता बुद्‍दि हिल्वा जिवरासिनसंटोर ईर आंदुर. अवुनालेसीं ईरगुडा नासडेम आंतुर. 13 ओरा तप्‍पुड कबाह्‍कुन पीसि ओर्कु पलम दोर्कंता. पोद्‍दला तिनुळ-उनुळ कियमळतेन वेल्‍लेन कुसि मंता इनकुंतुर. ओर मीवातोनि कलियसि गाटो तिननेंकेगुडा अल्हेन कीसि ओर ओरा मजां येतसेके मनंतुर. अदुनहाटीं ओर मीवा नड्‍डुम उंदि डाग आनि कलंक आंदुर. 14 ओरा कळ्‍क बोगमतनमते निंडिस मंतां. ओर पापम कियाका मन्‍ना पर्रुर. विस्वासमते गट्‍टिगा हिल्वोर्कुन नळेह कीसि पापमते अरहंतुर. ओरा मनसु आस्तिक अलवट आसि मंता. ओर सापनेमते मत्‍तोरा मर्क आंदुर, 15 ओर सवरटा हरदाल तप्‍सोत्‍तोर आंदुर, बोअरना मर्रि बिलाम इननोना हर्रि पीतुर. बिलामुंकु कराब कबाह्‍कुना कूलि पसंद मत्‍ता. 16 गानि ओर कीता कराब कबाह्कुनाहाटीं ओनकु तेळियागोट्‍सि वेहमळ जर्गता. वळ्का वायवा उंदि गाडदि मनकना लेंगुने आ पेनदा कबुरतोना मुर्कतनमतुन आपता. 17 ओर एर हिल्वा कुहिं आनि दुमारम तेह्‍कुंचि ओयाना मब्बु तेर्पे आंदुर. ओराहाटीं बस्‍केळ्‍क हीकट मनना उंदि जेगा तयार कीसि मंता. 18 ओर बत्‍तक ओज्जुवा पोंगुळ पोल्‍लें वळ्कसेके मनंतुर, तप्‍पुड हर्रि ताकानोरव्टेटाल तपिच्‍कुंचि इंदके-इंदकेने बेसता हर्दे वातोर्कुन, ओर ओरा मेंदुल्ता रोता आसेना हेंदाल बोगमतनमते अरहंतुर. 19 ओर कुद्‍दे कराब कबाह्‍कुना दासुल्क आसि, इंकावरोन असोंटा गतिताल तेंडांतोम इंचि पोल्‍ले हींतुर. बारित्‍ते वरोर मनकन बतलय्ते गेल्संतोरो, ओर अदुना दासुड आसि मनंतोर. 20 ओरगिंटा मना सामि मुक्‍ति हियना येसु किरिस्‍तुना तेल्‍विता हेंदाल दुनियाता कराब कबाह्कुनाल पलाते अरतंका, मर्रा अवे कराब कबाह्‍कुने हिरकिसि अवुना लोप्‍पोने ताकते, ओना गति मुन्‍नेटा गतिकन्‍ना आकिरता गति वेल्‍ले कराब मनंता. 21 बारित्‍ते ओर सत्‍तेमता हरदुन एरपाट कीसि, ओर्क हीता पवित्र आदेसताल तप्‍सि होनमळकन्‍ना, अद हर्रि ओर्कु तेळियका मनमळे बेस मत्‍ता. 22 इद ओरा बारेमते, “नय अद कक्‍कुतदुन तिनालय मर्रा मल्‍लंता, बेस नोरता पद्‍दि मर्रा बुर्दातेन पोर्लंता,” इनना निजम सात्रम परकारम जर्गता.