2 तिमोति
तिमोतिंकु पौलुसना रोंडो सिट्‍टि
इद सिट्‍टिता बारेमते गिचचो परिचयम
रासतोना पोरोल: पौलुस
रासता कालम: इसवि सन 67
इद तिमोतिंकु पौलुस रासता रोंडो सिट्‍टि आंदु. पेनदा बेसता कबुरतुन वेहताहेंका ओन्क जेलुंक होनापीता. जेलुंक होंचि ओर वेल्‍लेन कस्‍टाल्‍क बोगांचेक मंतोर. जेलते ओर हायनाल आतोर. अय्नागानि ओना मर्रिनसोंटा तिमोति सामिना विस्वासमते इंकिच्‍चो गट्‍टि पडना इंचि इद सिट्‍टि रासतोर.
इव आकिर रोजकु आंदुं, इव रोजकुने निमे तप्‍पुड बोदां वेहानोरगटाल, बोगमतनम कियानोरगटाल इंका सतता सुकाल्कुनाहाटींगे आसेते मनानोरगटाल जेगर्ता मन. बारित्‍ते इसोंटा लोकुल्‍क ओर्क नच्‍चुता पोल्‍लें वेहनाहाटीं कराहनोर्कुने हेळाहंतुर. अदुनहाटीं पेनदा सत्‍तेम पोल्‍लेतुन वेहालय निमे बस्‍केळ्‍क तयारते मन. इल्‍हा पौलुस इद सिट्‍टि रासि तिमोतिंकु दैरनेम हीतोर.
बगा बतल मंता
जोहार आनि परिचयम 1:1-2
स्‍तुति आनि किरिस्‍तु वेहताप पिस्‍साना बारेमते बोदां 1:3–2:13
तेल्‍पिच्‍चि वेहमळ आनि वेर्रे वेहमळ 2:14–4:5
पौलुसना सतता परिस्‍तिति 4:6-18
आकिरता बोदां 4:19-22
1
पेनदा इच्‍चाताहेंदाल किरिस्‍तु येसुना प्रेरित आता पौलुसना इद सिट्‍टि आंद. किरिस्‍तु येसुनपोर्रो विस्वासम इरते, बस्‍केळ्‍क पिस्सना पिस्वर दोर्कंता इंचि पेन पोल्‍ले हीसि मत्‍ता, इदुना बारेमते वेहनाहाटीं नाकुन लोहचियमळ जर्गता.
नावा पावरमगल्‍ला मर्रि तिमोतिंकु नना रासतन. नीकु मना पेनबाबनहेंदाल, सामि किरिस्‍तु येसुनाहेंदाल कुर्पा, दया, सांति दोर्किकांटी.
दन्यवाद आनि दैरनेम
नावा पारतनाने नीकुन बस्‍केळ्‍क मति कीसेके, ना तादो-बाबुरालेह्का नना मनसुना पोल्‍लेते, बद पेनदद अय्ते सेवा कीसंतनो, अद पेनदुक दन्यवाद वेहचंतन. नावाहाटीं निमे पोंगागोटता कांडेरतुन मति कीसि नना नर्का-पिय्यल नीकु कलियाना इंचि इच्‍चा कीसंतन, इवटेन नावा आनंदम पुरागा आंता. नीवा आ सत्‍तेम विस्वासम नाकु मति मंता. आ विस्वासम, मुन्‍ने नीवा काको लुइस आनि नीवा यावल युनिसनगागुडा मनुंदु. अदे विस्वासम निहगागुडा मंता इंचि नाकु बरोसा मंता. इदुनहाटीं नना नीकु मति कीसि हियानद बतल इत्‍ते, नना नीवा पोर्रो कय इरतस्के, पेनदाहेंदाल नीकु उंदि वरम दोर्कता. अद वरमतुन निमे बस्‍केळ्‍क एल्‍गिच्‍चि इर्रा. बारित्‍ते मनाकु पेन हीता आत्मा मनाकुन पिरकिर्क किय्यका, मनालोप्‍पो अद बलम, पावरम आनि ओप्केतुन निहंता.
अदुनहाटीं मना सामिना बारेमते आयि, ओनाहाटीं जेलने मनना नावा बारेमते आयि वेरेतोर्क गवाइ वेहालय बस्‍केने सिग्गु अरमा. दानकु बदुल, बेसता कबुरतुन वेहनाहाटीं पेन हीता बलमते निमे नातोनि तकलिप्क सहन कियालय तयार मन्‍नु. पेन मनाकुन कापाळसि, दाना पवित्र पोल्‍लेते केयता. इदंता मना कबाह्कुनहेंदाल जर्गाहिल्‍ले गानि सिराप ओना पिलान परकारम आनि ओना कुर्पाहेंकेन जर्गता. ई दया-मायातुन पेनबाबाल मनाकु ई दुनिया पुट्‍टका मुन्‍नेन किरिस्‍तु येसुनाहेंदाल हीतोर. 10 गानि इंदके इद पोल्‍ले, मनाकुन कापाळना किरिस्‍तु येसु वाताहेंका मनाकु तेळियसोत्‍ता. ई किरिस्‍ते हामुरतुन रद्‍द कीसि, बेसता कबुरताहेंदाल पिस्वरतुन आनि बस्‍केळ्‍क जीवाते मनानदुन पलाते अरहतोर. 11 इदे बेसता कबुरतुन प्रचार कियनाहाटीं प्रेरित अल्हेन कराहनोर इंचि नाकुन निलाहमळ जर्गता. 12 इदुनाहाटींगे नना इद जेलते तकलिप्क बोगांचेक मंतन. अय्नागानि नना सिग्गु अर्रोन. बारित्‍ते नना बोनपोर्रो विस्वासम इरतन ओर नाकु एर्के. इंका ओर नाकु बतल अय्ते अप्पजेपतोरो*बद अय्ते नना ओन्क अप्पजेपतनो. अदुन, मल्सि वायाना आ रोजु वायनदाका कापाळा परांतोर इंचि नाकु बरोसा मंता. 13 किरिस्‍तु येसुना लोप्पो मनना विस्वासम आनि पावरमताहेंदाल निमे बव सत्‍तेम पोल्‍लें अय्ते नाहेकेटाल केंजतिनो, अवुन पीसि वेरेतोराहाटीं मन्‍नु. 14 मनालोप्‍पो मनना पवित्र आत्माता बलमतोनि, नीकु अप्पजेपता मंचितनमतुन निमे कापाळकुन.
15 आसिया राज्येमते मनानोर अंटोर नाकुन होळसि होत्‍तुर इत्‍ता पोल्‍ले नीकु एरपाटे. अव्टे पुगिलुस आनि हिरमुगिनेसगुडा मंतुर. 16 नावा कय्‍कुंक बेडीं वाटसि मंतां इंचि सिग्गु अर्राकोंटा, उनेसिपुरुस इनानोर, नाकु ऊके-ऊके कलियसि नाकु वेल्‍लेन दैरनेम हीतोर. सामि ओना कुटुंबमपोर्रो दया हुप्‍सिरकांटी. 17 अचोने आयका ओर रोम सहरते वातस्के, नना दोर्कनदाका नाकुन मनसु तासि पह्कसेक मत्‍तोर. 18 नना इपीसि सहरते मननेंके, ओर नाकु वेल्‍लेन रकाल्कुना सहायम कीतोर नीकु अय्ते बेस तेळियसि मंता. सामिना मल्सि वायाना आ रोजुने, ओनपोर्रो दया हुप्‍सालय पेन सहायम किय्यि इंचि नना कोरसेक मंतन.

*1:12 बद अय्ते नना ओन्क अप्पजेपतनो.