1 हनन्या पोरोलतोर वरोर मनकल अल्‍हेने ओना मुत्‍तो सपीरा, ईर इव्वुर कूळसि ओरदे इच्‍चो बूमितुन अमतुर. 2 वाता कोत्‍तानाल इच्‍चुं कोत्‍तां इरकुत्‍तोर इंचि ओना मुत्‍तोंक एर्के मत्‍ता, कडमता कोत्‍तां ओसि प्रेरितुल्कुंक हीतोर.

3 अदुन हूळसि पत्रु, “हनन्या! निमे बूमि अमता कोत्‍तानाल इच्‍चुं कोत्‍तां इरकुत्‍तिन. अय्ते पवित्र आत्मातोनि आबद्‍दम वळकालय नीवा मनसुने देय्यम बारि होळियता? 4 आ बूमि अम्मका मुन्‍ने नीवदे मत्‍ता गदा! अम्मुतंकागुडा वाता कोत्‍तन पोर्रो नीवदे अदिकारम मत्‍ता. अय्नागानि पेनदुक इस्‍टम हिलवद कबळ कियालय नीवा मनसुने बल्हा वाता? निमे मनकलोरतोनि आयो गानि पेनतोनि आबद्‍दम वळ्‍कतिन,” इंचि इत्‍तोर.

5 ई पोल्‍लें केंजतारित्‍तेन हनन्‍याल हिळु अर्सि जीवा होळ्‍सतोर. अचोने आयका ई पोल्‍लें केंजतुर अंटोर्क पेद्‍दा वेर्रे दल्‍गता. 6 अस्‍के लेय्युर्क तेदसि ओन्क कपडि हुट्‍सि*कपडि हुट्‍सि अद कालमते हाता मनकन कपडि हुटसि बोंदा दोसुंदुर. पलाते ओसि बोंदा दोस्तुर.

7 दग्‍गेर-दग्‍गेरा मूड गंटां आतंका ओना मुत्‍तो लोप्पो वाता. अगा बतल जर्गुता दान्क तेळिया हिल्‍ले. 8 अस्‍के पत्रु अद वातद हूळसि, “मीवा बूमि इच्‍चोट्‍के अमतिरा वेहा!” इंचि तल्कतस्‍के, “आ इच्‍चोट्‍के अमतोम,” इंचि अद इत्‍ता.

9 पत्रु दान मर्रा, “मिमेट इव्वुर सामिना आत्माता परिक्‍सा बारि हूळालय दल्‍गतिर? हूळा नीवा मुय्दोन बोंदा दोसतोर गलमातगेन एवतुर, ओर नीकुन इंका अल्‍हेने ओयानुर.” इंचि इत्‍तोर. 10 ओर अल्हा इत्‍ता इन्‍मळे अद ओना काल्‍कुन मुन्‍ने अर्सि अल्हेन जीवा होळसीता.†अल्हेन जीवा होळसीता हनन्‍याल आनि सपिरल बूमि अमता कोत्‍तां पूरा हीतोम इंचि आबद्‍दम वळ्कतुर इंचि सिक्‍सा दोर्कता. पजा दाना मुय्दोन बोंदा दोस्ता लेय्युर्क लोप्पो वासि हूळतस्‍के अद मुरतळ हासि दिसता. ओर दान इंका तेहकुंचि ओसि दाना मुय्दोना पक्‍काते बोंदा दोस्तुर. 11 अस्‍के येरुसलेमता कलिसियातोर अंटोर, ई पोल्‍लें बोर अय्ते केंजतुरो ओर अंटोर बागा वेरियतुर.

12 अल्‍हेने प्रेरितुल्कुना कय्‍दाल वेल्‍ले चिन्‍हां, इचंत्रमता कबाह्‍क लोकुल्‍कुना मुन्‍ने आयुंदुं. विस्वासुल्‍क अंटोर गुळिते सुलेमान राजाना पंदिरतगा बस्‍केळ्‍क उंदि मनसुने जमा आयुंदुर. 13 अविस्वासुल्‍क ओरतोनि कलियालय वेरियुंदुर, गानि विस्वासुल्कुना बेस कदर कियुंदुर. 14 अयना वेल्‍लेन मंदि मुर्ताह्क-मांडसा सामिन विस्वासम कीसि ओरगा वासि कलियुंदुर, इल्‍हा एक्‍कोते एक्‍को मंदि बेरस्सेक होत्‍तुर. 15 प्रेरितुल्कुना कबाह्‍कुन हूळसि लोकुल्‍क बिमार मत्‍तोर्कुन कटुल्‍कुने, केत्‍तिने पत्रु होनना हर्दागा तच्‍चि इर्रुंदुर. पत्रु होननेंके ओना नीडाय्‍ना बिमारतोरा पोर्रो अरते ओर बेस आयनुर इंचि लोकुल्‍कुना आसे मनुंदु. 16 अचोने आयका येरुसलेम सहरता पक्‍का पीसि मत्‍ता नाहकुनाल वेल्‍लेटुर बिमार मत्‍तोर्कुन, देय्याल्क पीतोर्कुन अगा पीसि वायुंदुर. ओर अंटोर प्रेरितुल्कुना कय्‍दे बेस आयुंदुर.

17 अस्‍के पेद्‍दा पेर्माल, ओनातोनि मत्‍ता सदुकिर्क, प्रेरितुल्कुन हूळसि ओरा मनसु मसुलुंदु. 18 अदुनहाटीं प्रेरितुल्कुन पीसि जेलने वाटतुर. 19 गानि अदे नर्का उंदि पेनदा दूता वासि जेलना तल्‍पु तेंडसि ओर्कुन पलाते ओता. 20 ओसि, “होंटु, गुळिते नित्‍तिसि ई पूना पिस्वरता अन्‍नि पोल्‍लें अंटोर लोकुल्‍कुंक वेहाटु,” इंचि ओर्कु वेहता. 21 पेनदा दूता वेहतद केंजसि ओर पोळ्‍दु पेय्सतंका गुळिते होंचि लोकुल्‍कुंक कराहलय दल्‍गतुर. हीके, पेद्‍दा पेर्माल आनि ओना दंटातुर, इस्राएलता अंटोर पेद्‍दाल्कुन पंचादिते केय्‍सि, प्रेरितुल्कुन जेलनाल तायालय लोहतुर. 22 गानि सिपाइल्क जेलने होंचि हूळतस्‍के अगा प्रेरितुल्क मना हिल्‍लुर, अदुनहेंके ओर मल्सि वासि, 23 “जेलता तल्‍पुकुंक अय्ते तालम वाटसि मत्‍ता. सिपाइल्कगुडा गलमानगा नित्‍तिसि मत्‍तद मोमोट हूळतोम, गानि तल्‍पु तेंडसि लोप्पो हूळतस्‍के लोप्पो बोरे मना हिल्‍लुर,” इंचि वेहतुर.

24 गुळितगा कावेल कियानोरा अदिकारि आनि पेद्‍दा पेर्मालोर इद केंजसि, “इंदके बतल आयार” इंचि वेल्‍ले विचारम कियालय दल्‍गुतुर. 25 अस्‍के बोरो वरोर मनकल वासि, “हुळट, मिमेट जेलने वाटतुर गुळितगा नित्‍तिसि लोकुल्‍कुंक येसुना पोल्‍लें कराहसेक मंतुर.” इंचि वेहतोर.

26 अस्‍के आ अदिकारि, गुळिता कावेल कियानोर्कुन पीसि गुळितगा होत्‍तोर. होंचि, लोकुल्‍क मापोर्रो बंडां हुक्‍सि हव्कानुर इत्‍ता, वेर्रेते ओर्कुन बतले बल्‍मि कियाकोंटा पंचादितगा तत्‍तोर. 27 ओर्कुन पीसि तच्‍चि पंचादिता मुन्‍ने निलाहतोर. अस्‍के पेद्‍दा पेर्माल ओर्कुन, 28 “ई येसुना पोरोलते करुहमट इंचि मोमोट मीकु कडक आदेस हिय्‍यिना गानि मिमेट पूरा येरुसलेम अंता ओना पोरोलते कराहतिर. अचोने आयाका ओन मोमोटे हव्कतोम इंचेके मावा पोर्रो तप्पु दोसालय हूळसेक मंतिर,” इंचि इत्‍तोर.

29 अदुनहाटीं पत्रु, कळमता प्रेरितुल्क, “माकु मनकालोरा पोल्‍लें आयो, गानि पेनदा पोल्‍ले केंजा पींता. 30 मिमेट येसुन क्रुस पोर्रो वेलाड वाटसि हव्कतिर गानि मावा पेद्‍दाल्कुना पेन ओन हामुरताल मर्रा तेहता. 31 हामुरताल तेहचि ओने पेन, राजाल आनि पिसागोटनोर इंचि निलाहता. मावा इस्राएलता दादालोर्कुंक मनसु मार्सकुनालय, पापाल्कुनाल मापि कियालय पेनदा तिना बाजुंक ओन कदर हीसि उपिस्ता. 32 इव अन्‍नि पोल्‍लेनहाटीं मोमोट गवाइ मंतोम. पेनदा पोल्‍लें केंजसि ताकानोराहाटीं पवित्र आत्मागुडा गवाइ मंता,” इंचि इत्‍तुर.

33 ओरा पोल्‍लें केंजसि, आ पंचादिता पेद्‍दाल्कुंक होंग वासि ओर्कुन हव्कना विचारम कीतुर. 34 गानि पंचादितगा गमलियेल पोरोलतोर वरोर परिसि, ओर मूसाना नियमता गुरुजीगुडा मत्‍तोर, ओन अंटोर कदर कियुंदुर. ओर तेदसि प्रेरितुल्कुन गडसेम पलाते ओयालय वेहतोर. 35 ओर्कुन पलाते ओतस्के, ओर पंचादिता मुन्‍ने, “मावा इस्राएलता लोकुल्‍कुनिटा! मिमेट ओर्कुन बतल कींतोम इंचंतिरो, बेस विचारम कीसि कीम्‍टु. 36 बारित्‍ते कोन्‍नि रोजकु मुन्‍ने तियुदास पोरोलतोर वरोर मनकल, ‘नना पेद्‍दोन’ इंचि वेहकुत्‍तोर. ओना पज्जो नालुं नुह्कुना मंदि इंका मत्‍तुर. गानि ओन हव्कतुर, अस्‍के ओना पज्जो ताकानोर अंटोर बेंदोर-हेके पायसि होत्‍तुर. 37 अद आता पज्जो सिरगंतिता वेलाते गालिल एरियाता यहुदल इनानोर वातोर. ओर इंका वेल्‍लेने लोकुल्‍कुन ओनाहेके कीकुत्‍तोर गानि ओन इंका हव्कतुर. ओना पज्जो ताकानोर अंटोर बेंदोर-हेके पायसि होत्‍तुर. 38 अदुनहाटीं इंदके इंका नना मीकु वेहसेक मंतन, मिमेट पीतोर्कुन बतले कियमट, ओर्कुन होळसीम्टु. ओरां विचाराल्क, ओरां कबाह्‍क मनकानव मनानय्ते मायसि दांतां. 39 गानि पेनदाहेंदाल मनानय्ते दान मिमेट आपा पर्रिर, मिमेट आपालय हूळते मात्रम पेनदुक अड्‍डम आंतिट,” इंचि इत्‍तोर.

40 अस्‍के पंचादितोर, गमलियेलना पोल्‍ले केंजतुर. पजा प्रेरितुल्कुन लोप्पो केय्‍सि ओर्कुन पोट्‍टेते तन्‍ना वेहचि, येसुना पोरोलते बग्‍गेन वेहमटु इंचि वेहचि होळ्‍सीतुर. 41 प्रेरितुल्कुन होळसीतस्के, येसुना पोरोलताहाटीं मोमोट देब्बां तित्‍तोम, इंचि बेस आनंदमते पंचादिताल पेय्सि होत्‍तुर. 42 रोज गुळितगा, लोन-लोन होंचि, येसु ईरे किरिस्‍तु आंदुर इंचि पेनदा बेसता कबुर वेहामळ, कराहमळ होळसा हिल्‍लुर.