8
विस्वासुल्कुंक कस्टाल्क वांता
1 अवे रोजकुनाल येरुसलेमता कलिसियातोरपोर्रो पेद्दा कस्टाल्क वायालय सुरुव आता. प्रेरितुल्कुन होळसि कळमातोर अंटोर विस्वासि लोकुल्क यहुदिया, सामरिया एरियाता नाहकुने बेकेटोर हेके सिल्लर-सल्लर आतुर. 2 बोरो इच्चुर विस्वासुल्क स्टिपनुन गति कीसि ओनाहाटीं वेल्ले दुक्कमते मत्तुर. 3 साऊल बारे कलिसियातोर्कुन तकलिप हियमळ सुरुव कीतोर. ओर लोन-लोन होंचि मुर्ताह्क इनाका मांडसा इनाका अंटोर्कुन इग्गिसि ओसि जेलने वाटालय दल्गुतोर. 4 गानि सिलर-सिलर आसि होत्ता विस्वासि लोकुल्क मात्रम बगा-बगा अय्ते होत्तुरो अगा-अगा ओर लोकुल्कुंक पेनदा बेसता कबुर वेहुंदुर.
पिलिपुस सामरियाते होंचि येसुना बारेमते वेहांतोर
5 पिलिपुस इनना वरोर बक्तुड सामरिया सहरते होंचि अगाटा लोकुल्कुंक किरिस्तुना*किरिस्तु इत्ते अबिसेकम आतोर, इंचि अर्तम. बारेमते वेहामळ सुरुव कीतोर. 6 पिलिपुस कीता चिन्हां हूळसि लोकुल्क ओर वेहाना पोल्लेन मनसु ताससि केंजतुर. 7 वेल्लेन मंदिक देय्याल्क पीसि मत्तां, आ देय्याल्क इंका इरगा मोत्कुंचेके पलाते पेय्सि विततां. अचोने आयका अगा वेल्लेन मंदि कुंटोर्क, कय-काल्क अरसोनना रोगमतोरगुडा मत्तुर, ओर अंटोरगुडा बेस आतुर. 8 अदुनहाटीं अद सहरते आनंदमे आनंदम मत्ता.
9 अद नाटे सिमोन पोरोलतोर वरोर मनकल मनुंदुर. ओर होदें-मंत्राल्कुना बलमते इचंत्रमाता कबाह्क कीसि, नाके एक्को तेळियंता, इंचि वेहकुंचेके सामरिया सहरता लोकुल्कुन इचंत्रमते अरहुंदुर. 10 सिन्नाल्क, पेद्दाल्क अंटोर, “पेनदा पेद्दा ताकत इत्ते ईरे आंदुर,” इनकुंचि, ओना पोल्लें केव ताससि केंजुंदुर. 11 बारित्ते ओर वेल्ले रोजकुनाल ओना मंत्राल्कुना बलमते अंटोर लोकुल्कुन इचंत्रमते अरहचि मत्तोर. दानहाटींगे लोकुल्क ओर बतल वेहिना नम्मुंदुर. 12 गानि पेनदा राज्येम आनि येसु किरिस्तुना पोरोलता बारेमते पिलिपुस वेहता बेसता कबुर केंजसि मुर्ताह्क-मांडसा नम्मिसि बापतिस्मागुडा एततुर. 13 कुद सिमोन इंका नम्मिसि बापतिस्मा एततोर. इल्हा ओर पिलिपुस बेके होत्ते हेके होंचेके ओनतोने मनालय दल्गुतोर. पजा पिलिपुस कियना चिन्हां, अद्बूताल्क हूळसि इचंत्रमते अर्रुंदुर.
सामरिया सहरते पत्रु आनि योहान
14 सामरिया सहरता लोकुल्क पेनदा पोल्लेन स्विकार कीतुर इंचि बस्के अय्ते येरुसलेमते प्रेरितुल्कुंक तेळियतनो, अस्के ओर पत्रुन आनि योहानुन सामरिया एरियाक लोहचीतुर. 15 पजा ओर अगा वासि अगाटोर्कुंक पवित्र आत्मा दोर्कना इंचि पारतना कीतुर. 16 बारित्ते दीनकन्ना मुन्ने ओरा बोरापोर्रेन पवित्र आत्मा वाया हिल्ले. ओर्कु सिराप येसु सामिन पोरोलते बापतिस्मा दोर्कुता अचोने. 17-18 पजा पत्रु आनि योहान ओरापोर्रो कय इरता इर्रुडे ओर्कु पवित्र आत्मा दोर्कुता. इदुन सिमोन हूळसि, प्रेरितुल्कुनगा होत्तोर. 19 होंचि, “नना मीकु कोत्तां हींतन, गानि नना बोनपोर्रो अय्ते कय इर्रंतनो ओन्क पवित्र आत्मा दोर्कागोट्टना ई बलमतुन नाकुगुडा हीम्टु,” इंचि इत्तोर.
20 अस्के पत्रु ओन, “निमे कोत्ताने पेनदा वरमतुन अस्सा परांतन इंचि इनकुत्तिन. अदुनहाटीं नीवा कोत्तां नीतोने नासडेम आंतां. 21 पेनदा नदरते नीवा विचारम बेसतद आयो, इंचि ई सेवा कबाह्कुने नीकु पोत्तु हिल्ले, पालु हिल्ले. 22 निमे कराब विचाराल्क कियमळ होळसिसि मनसु मार्सकुंचि पेनदुक पारतना कीम. अस्के नीवा इसोंटा विचाराल्कुनहाटीं नीकु मापि दोर्का पर्रार. 23 नना नीकुन बेस हूळसंतन, नीवा लोप्पो वेल्लेन विसम निंडिस निमे पुरागा तप्पुड कबाह्कुनतोनि दोहाचि मंतिन,” इंचि इत्तोर.
24 अस्के सिमोन, “मिमेट इत्तद बद्दे पोल्ले नापोर्रो वायामन्नि इंचि मिमेट सामिंक नाहाटीं पारतना कीम्टु,” इंचि इत्तोर.
25 पजा पत्रु आनि योहान सामिना बारेमते बतल अय्ते केंजतुर, हूळतुर अदुना गवाइ हीतुर. पजा सामि वेहता पोल्लेन वेहचि येरुसलेम मल्सि होनालय पेय्स्तुर. ओर होननेंके सामरिया नाहकुने वेल्लेन जेगाने पेनदा बेसता पोल्लें वेहचेके होत्तुर.
पिलिपुस आनि इतोपिया देसेमता मनकल
26 अस्के सामिनद उंदि पेनदा दूता पिलिपुसुंक वेहता गदा, “निमे तयार आसि, येरुसलेमताल बद हर्रि अय्ते गाजा सहरताहेके दांता, अदे हर्रि पीसि दक्सिनतेके होन्नु, आ हर्रि बय्लि जेगाताल दांता.” 27-28 पजा ओर तयार आसि होत्तोर. होननेंके हर्दे ओन्क इतोपिया देसेमतोर वरोर आडिगुंल्ला मनकल कलियतोर. ओर इतोपिया देसेमता रानि कंदाकेनगा कोत्ताना लेक्का हूळना पेद्दा अदिकारिनलेहका कबळ कियुंदुर. दाना पूरा कजाना ओना कय्दा हिडे मत्ता. ओर आरादनाहाटीं†आरादना इत्ते निजम पेनदुक मोळ्कमळ. उदा. पाटां पारमळ, स्तुति कियमळ, पारतना कियमळ, बायबल हदुवमळ ई. येरुसलेम वासि, मल्सि होननेंके रतमते उदसि यसायाह इनना पेनदा कबुरतोना पुस्तकम हदविसेके मत्तोर. 29 अस्के पेनदा आत्मा, “निमे आ रतम दग्गेर्क होंचि दानतोनि ताका,” इंचि पिलिपुसुंक वेहता.
30 अस्के पिलिपुस वितसि होंचि आ रतमतुन अंदकुत्तोर. रतमते उदिस मनना मनकल यसायाहल रासता पुस्तकम हदवानदुन हूळसि, “निमे बतल अय्ते हदविसंतिनो अदुना अर्तम नीकु तेळियसेके मंतना?” इंचि ओर आ मनकन पूसकीतोर.
31 “इदुना अर्तम बतलो, बोरन्ना वेहुवद नाकु बल्हा तेळियंता?” इंचि आ मनकल इत्तोर. पिलिपुसुन रतम पोर्रो एक्किस ओना पक्काते उद्दालय वेहतोर. 32 ओर आ पुस्तकमते बतल अय्ते हदविसेके मत्तोरो अद इल्हा मंता:
“हव्कालय ओयना गोर्रेतालेसीं ओन ओतुर,
गोर्रे दाना मेंदुल्ता बूरातुन कतरिचिनेंके बल्हा सपुडदाका मनंता,
अल्हेने ओरगुडा सपुडदाका मत्तोर,
ओना तोळ्दाल उंदि पोल्लेगुडा पेय्सा हिल्ले.
33 ओना अपमानम कीसि ओनपोर्रो अन्यायम कीतुर,
बूमिपोर्रोटाल ओना पिस्वरतुन तेंडतुर, ओना वंसमतोर बोरे हिल्लुर.”✡यसायाह 53:7-8
इल्हा रासि मत्ता.
34 अस्के, “असल ई कबुरतोर बोना बारेमते वेहचंतोर? ओना सतता बारेमतेना, हिलाकोंटे मरि इंका बोरन्ना वेरेतोना बारेमतेना? दया कीसि नाकु तेळियनाल वेहा,” इंचि आ आडिगुंल्लोड पिलिपुसुन इत्तोर.
35 अस्के पिलिपुस, आ मनकल हदवुसेके मत्ता वचनाल्कुनाल मोदोल पीसि, येसुना बेसता कबुरदाका अन्नि ओन्क वेहतोर.
आडिगुंल्ला मनकल बापतिस्मा एतंतोर
36 इल्हा हर्रि पीसि होननेंके-होननेंके ओर उंदि एर मत्ता जेगातगा एव्तुर. अस्के एतुन हूळसि, “हूळा! इगे एर मंता. इंदके नाकु बापतिस्मा एतालय बतलन्ना तकलिप मंतना?” इंचि आ आडिगुंल्ला मनकल इत्तोर. 37 ‡इद वचनम कोन्नि पांडु लिपिने हिल्ले.(निमे गिंटा मनसुनाल पुरागा विस्वासम कियानय्ते बापतिस्मा एता परांतिन, इंचि पिलिपुस वेहतस्के, ओर हां, येसु सामिए पेनदा मर्रि आंदुर इंचि नना विस्वासम कींतन, इंचि जवाब हीतोर.) 38 अस्के ओर रतमतुन आपालय वेहतोर. पजा पिलिपुस आनि आ आडिगुंल्ला मनकल ईर इव्वुर एते रेयतुर. पिलिपुस आ मनकंक बापतिस्मा हीतोर. 39 ओर एताल पलाते पेय्स्तस्के पिलिपुसुन सामिना आत्मा बेकेनो ओता. आ आडिगुंल्लोड ओन मर्रा बस्केने हूळा हिल्लोर. अयना आ आडिगुंल्ला मनकल आनंदमते ओना हर्रि पीसि ओर होत्तोर.
40 इल्हा पिलिपुस अजोतु इनना सहरते दिसतोर. पजा ओर होननेंके हर्रि पीसि कलियता नाहकंता पेनदा बेसता कबुर वेहचेके कैसरिया सहरते एवतोर.