1 पौलुस पेद्‍दा पंचादितगा जमातोर्कुन उंदेतीर हूळसि, “नावा दादालुरिटा! नना, इय्यालादाका पेनदा मुन्‍ने बेसता मनसुने पिसतन,” इंचि इत्‍तोर. 2 अस्‍के हनन्‍याल इनना पेद्‍दा पेर्माल, “ओना तोड्‍डि पोर्रो तन्‍नाटु,” इंचि पौलुसुना पक्‍काते नित्‍तिसि मत्‍तोर्कुंक आदेस हीतोर. 3 अस्‍के पौलुस ओन, “ए चुना होकता गुरेतसंटोना! पेन नीकुन तनंता. बारित्‍ते, निमे दर्मसास्‍त्रमता नियम मत्‍ताप नावा न्‍यायम कियालय उदतिन, गानि दानकु अड्‍डम नाकुन तनालय आदेस बल्हा हीतिन?” इंचि इत्‍तोर. 4 अस्‍के पक्‍काते नित्‍तिसि मत्‍तुर, “निमे पेनदा पेद्‍दा पेर्माना अपमानम कीसंतिना?” इंचि इत्‍तुर. 5 “दादालुरिटा, ईर पेद्‍दा पेर्माल आंदुर इंचि नाकु एरपाट मनाहिल्‍ले. बारित्‍ते, ‘नीवा अदिकारिनाहाटीं सेड्‍डा पोल्‍ले वळका मन्‍नि,’✡निर्गमन 22:28 इंचि नियमते रासि मंता,” इल्‍हा पौलुस इत्‍तोर.

6 अगा यहुदिल्कुना पंचादिते उद्‍दिसि मत्‍ता लोकुल्‍कुने इच्‍चुर सदुकिर आनि इच्‍चुर परिसिल्कु मंतुर इंचि पौलुसुंक तेळियतस्के, ओरा मुन्‍ने जोरसे वरगेय्‍सि, “दादालोरिटा! नना परिसिन आंदुन. नावा तादल-बाबोगुडा परिसिल्कु आंदुर. हातोर मर्रा जीवाते तेदांतुर इत्‍ता ओरा आसेतुन नना विस्वासम कीताहाटीं मीवा मुन्‍ने निल्‍सि मंतन,” इंचि इत्‍तोर. 7 ओर इल्‍हा इत्‍तारित्‍ते परिसिल्कु आनि सदुकिर लोप्पो लोल्‍लि आसि, ओर अलग-अलग आतुर. 8 बारित्‍ते, हातुर मर्रा जीवाते तेदुर, पेनदा दूतां हिल्‍लें, आत्मां हिल्‍लें इल्‍हा सदुकिर इंतुर. गानि परिसिल्कु बारे इव अन्‍नि मंतां इंचि इंतुर. 9 अगा वेल्‍ले लोल्‍लिं आतां. अगा उद्‍दिस मत्‍ता परिसि दर्मसास्‍त्रम कराहना गुरुल्कुनाल इच्‍चुर तेदिसि, “माकु ईना लोप्पो बतल तप्पु दिस्सेक हिल्‍ले. ईनतोनि बदाना आत्मा हिलाकोंटे बदाना पेनदा दूता वळकिस मंदार,” इंचि इत्‍तुर. 10 इल्‍हा ओरा लोप्पो इच्‍चोर लोल्‍लिं आतां गदा, पौलुसुन हव्कानुर बारे इंचि सिपाइल्कुना अदिकारि वेरियतोर. पजा, “पौलुसुन ओरागटाल अलग कीसि किल्‍लाते पीसि ओम्ट,” इंचि सिपाइल्कुंक आदेस हीतोर. 11 अदे नर्का सामि पौलुसनगा वासि, “पौलुस निमे वेरियमा. बल्हा निमे येरुसलेमते नावा गवाइ हीतिन, अल्‍हेने रोम सहरते इंका नीकु नावा गवाइ हियनद मंता,” इंचि इत्‍तोर.

12 इंकुंदि रोजु हक्‍केरे पौलुसुन हव्कालय यहुदिल्कु पिलान कीसि, ओन हव्कवा मोमोट तिन्‍नोम-उन्‍नोम, इंचि ओट्‍टु तित्‍तुर. 13 इल्‍हा पिलान कीतोरु नल्‍पै मंदिकन्‍ना एक्‍को मत्‍तुर. 14 ओर पेद्‍दा पेर्मालोर्कुनगा आनि यहुदि पेद्‍दाल्कुनगा होंचि, “मोमोट बच्‍चोरदाका पौलुसुन हव्‍कोम, अच्‍चोरदाका मोमोट बतले तिन्‍नोम-उन्‍नोम इंचि गट्‍टिगा ओट्‍टु तित्‍तोम. 15 अदुनहाटीं इंदके मिमेट आनि यहुदिल्कुना पेद्‍दा पंचादितोर कलियसि सिपाइल्कुना अदिकारिनगा होंटु. अगा होंचि, पौलुसुन, इंका बेस पूसकियानद मंता, ओन महगा लोहचीम, इंचि तेडियागोटसि वेहाट. ओर मिहगा एव्‍वका मुन्‍नेने ओन हव्कालय तयारते मनंतोम,” इंचि इत्‍तुर.

16 गानि पौलुसुन हव्कालय कोरसंतुर इंचि पौलुसुना हेलटा मर्रि केंजतोर. अस्‍के ओर किल्‍लाते होंचि पौलुसुंक पूरा वेहतोर. 17 वेहतारित्‍ते पौलुस वरोन दरोगान केय्‍सि, “ई लेय्योन सिपाइल्कुना अदिकारिनगा ओम, ईर ओन्क बतलो वेहंतोर अले,” इंचि इत्‍तोर. 18 अस्‍के दरोगाल सिपाइल्कुना अदिकारिनगा ओसि, “जेलने मनना पौलुस ईन मीहेके तायालय नाकुन विनंति कीतोर. ईर नीकु बतलो वेहंतोर अले,” इंचि इत्‍तोर. 19 पजा आ सिपाइल्कुना अदिकारि ओना कय पीसि, बोरे हिल्वगा ओसि, “वेहा, नावातोनि बतल वळकानद मंता?” इंचि पूसकीतोर. 20 अस्‍के लेय्योड, “यहुदिल्क उंदि आसि, पौलुसुन इंका बेस गट्‍टिगा पूसकियाना बहानाते नाडि यहुदिल्कुना पेद्‍दा पंचादिते केयागोटनाहाटीं, नीकुन विनंति कींतुर. 21 गानि निमे ओरा पोल्‍लें केंजमा. बारित्‍ते, नल्‍पैकन्‍ना एक्‍को लोकुल्‍क पौलुसुन हव्कवा मोमोट तिन्‍नोम-उन्‍नोम इंचि ओट्‍टु तित्‍तुर. निमे ‘ओन ओम्टु’ इंचि आदेस हियानद एदुर हूळसंतुर,” इंचि वेहतोर.

22 वेहतस्के, आ सिपाइल्कुना अदिकारि, “निमे नाकु इव पोल्‍लें वेहतिन इंचि बोर्के वेहमा,” इंचि आ लेय्योन लोहचीतोर.

23 अस्‍के आ सिपाइल्कुना अदिकारि ओना इव्वुर दरोगालोर्कुन केय्‍सि, “रोंडु नुह्कु सिपाइल्क, डेब्बै मंदि गुर्राल्कुनपोर्रो उद्‍दिस होनानुर, रोंड नुह्कु गोर्कां पियानोर्कुन नर्काटां तोम्मिद एगानेंके कैसरिया सहरते होनालय तयार इर्रट. 24 पौलुसुन ओयालय गुर्राल्कुन तयार इर्रट. ओन बेस कापाळसि पिलिक्‍स राज्यपालनगा ओम्टु,” इंचि वेहतोर. 25 ओर उंदि इल्‍हा सिट्‍टि रासतोर.

26 “महाराज पिलिक्‍स राज्यपाल नीकु, कलादियुस लुसियाना हेंदाल जोहार. 27 यहुदिल्क ई मनकन पीसि हव्कसेक मत्‍तुर, गानि ईर रोम रहिवासि इंचि नना केंजतस्के सिपाइल्कुन पीसि होंचि ओरागटाल ओन पिसागोटतन. 28 ओना तप्पु बतल आंदु, इदुन एरपाट कियालय ओन ओरा पेद्‍दा पंचादिते ओतन. 29 अगा ओर, ओनपोर्रो तप्पुक दोसतव अन्‍नि ओरा दर्मसास्त्राल्कुना हेंदाले मत्‍तां. अदुनहाटीं ओन हव्कनसोंटा हिलाकोंटे ओन जेलने वाटानसोंटा तप्पु ओनगा दिसा हिल्‍ले. 30 गानि ओन बोरो हव्कना मंता इंचि नाकु तेळियतस्के, ओन बिराना नीहेके लोहचीतन. ओनपोर्रो तप्पु दोस्सानोर बोर अय्ते मंतुर ओर नीवा मुन्‍ने वासि ओना तप्पु बतलो नीकु वेहगोम इंचि ओर्क आदेस हीतन,” इंचि सिट्‍टि रासतोर.

31 सिपाइल्कुंक बल्हा आदेस हीतोर, अल्‍हेने पौलुसुन पीसि नर्कटद-नर्केन अंतिपत्रि सहरते ओतुर. 32 इंकुंदि रोजु गुर्राल्कुनपोर्रो होनानोर्कुन ओनतोनि होनालय होळसि, कळमातोर किल्‍लाते तिरियसि वातुर. 33 ओर कैसरिया सहरते एवतारित्‍ते राज्यपालुंक सिट्‍टि हीसि पौलुसुन ओना मुन्‍ने निलाहतुर. 34 राज्यपाल सिट्‍टि हद्‍विसि, “निमे बद एरियातोन,” इंचि पौलुसुन पूसकीतोर. ओर किलिकिया एरियातोर इंचि तेळियतारित्‍ते, 35 “नीवा पोर्रो तप्पु दोस्सानुर इगे वातारित्‍ते नीवा न्‍यायम कींतन,” इंचि ओर इत्‍तोर. पजा पौलुसुन, हेरोद राजाना किल्‍लाते मनना जेलने इर्सि, ओना पहारा कीम्‍टु, इंचि आदेस हीतोर.