इपीसि
इपीसि विस्वासुल्कुंक पौलुसना सिट्‍टि
इद सिट्‍टिता बारेमते गिचचो परिचयम
रासतोना पोरोल: पौलुस
रासता कालम: इसवि सन 60
पौलुस इद सिट्‍टितुन जेलने मत्‍तास्‍के रासतोर. पौलुस येसुना बारेमता बेसता कबुर वेहालय रोंडो मल्का पय्‍नेम होत्‍तास्‍के ओर ई इपीसि सहरतेगुडा होंचि मत्‍तोर. ओर ई सहरते मोदाला होत्‍तस्के वेल्‍ले रोजकु मनाहिल्‍लोर गानि ओना मूडोव मल्का पय्‍नेम होत्‍तस्के अगा कोन्‍नि वर्सनदाका मत्‍ताप प्रेरितुल्कुना कबाह्‍क पुस्तकमते मनाकु तेळियसि दांता.
पेनदा लोप्पो अंटोर विस्वासुल्‍कु उंदासि पेनदा उद्‍देसमतुन एरपाट कीसि पिसागोम, अल्‍हेने कलिसिया इत्‍ते उंदि मेंदुललेसीं मंता. दान्क किरिस्‍तु तल्‍लालेसीं मंतोर. अय्ते मनम विस्‍वासुल्‍कुम आ मेंदुल्ता बागाल्‍कुम आंदुम. मेंदुल्ता बागाल्क बल्हा उंदान्‍क-उंदि बेस कलियसि मनंतंगो अल्हेन मनमगुडा मत्‍ते, पेन दाना उद्‍देसम परकारम मनाकु पिस्वरतुन हींता. पेनदा पोल्‍लेतुन इपीसि सहरता विस्वासुल्कुंक वेहनाहाटीं पौलुस इद सिट्‍टि रासतोर. अचोने आयाका वरोर विस्वासि किरिस्‍तुना लोप्पो बल्हा मनना, मुत्‍तो-मुय्दो, मालक-दासुड, तल्‍लुर-बाबो मर्क-मियाह्क बल्हा मनना इवन्‍नि अवसरमाता पोल्‍लेंगुडा पौलुस इद सिट्‍टिते रासतोर.
बगा बतल मंता
जोहार आनि परिचयम 1:1-2
किरिस्‍तु आनि कलिसिया 1:3–3:21
किरिस्‍तुन विस्वासम कीसि दुनियाते पूना पिस्वर पिसमळ 4:1–6:20
आकिरता बोदां 6:21-24
1
जोहार
नना पौलुसुन, पेनदा इच्‍चा परकारम, किरिस्‍तु येसुना प्रेरितुन आतन. इपीसि सहरते मनना किरिस्‍तु येसुन विस्वासम कियाना पेनदा लोकुल्‍कुंक नना इद सिट्‍टि रासेक मंतन. मना पेनबाबानहेंदाल आनि सामि येसु किरिस्‍तुनाहेंदाल मीकु कुर्पा, सांति दोर्किकांटी.
किरिस्‍तुनहेंदाल दोर्काना आसिर्वादाल्‍क
मना सामि येसु किरिस्‍तुना पेनबाबांक दन्यवाद. ओर किरिस्‍तुनाहेंदाल, मना बक्‍तिकु संबंदिस्‍तव स्वर्गमते मनना अन्‍नि आसिर्वादाल्‍क मनाकु हीसीतोर. अद बल्हा इत्‍ते, मनम पेनदा नदरते पवित्र आनि दोसेम हिलाकोंटा मंदना इंचि, पेन ई दुनियातुन पुट्‍सकामुन्‍नेन अद मनाकुन किरिस्‍तुना लोप्पो पेरकुत्‍ता. पेनदा पावरमता पिलान परकारम, येसु किरिस्‍तुनाहेंदाल मनम दाना पिलाल्क आयाना इंचि अद मनाकुन मुन्‍नेन पेरता. ई पिलान पेनदा इच्‍चा परकारम मत्‍ता इंचि पेनदुक इल्‍हा कियमळते कुसि दोर्कता. दाना पावरमगल्‍ला मर्रि मनाहाटीं कीतदुन पीसि, अद मनापोर्रो लेक्‍का परवच्‍चोन कुर्पातुन पुक्‍कटते कुम्मरिच्‍ता. अदुनहाटीं मनम पेनदा महिमाता स्‍तुति कीकोम.
किरिस्‍तु ओना सतता नेत्‍तुरतुन पोंगागोटताहेंका मना पापाल्क मापि आसि मनाकु मुक्‍ति दोर्कता. इल्‍हा पेन दाना वेल्‍लेन कुर्पातुन मनापोर्रो कुम्मरिच्‍ता. अद मना बुद्‍दिक, तेल्‍विक हालानाल दाना दया हियमळ जर्गता. पेन मुन्‍नेने निरनायम कीता, दाना इच्‍चा परकारम मत्‍ता मर्ममता पिलानतुन, मनाकु किरिस्‍तुनाहेंदाल कुल्‍ला कीसि वेहता. 10 अद बतल इत्‍ते, पेन दाना पिलान परकारम इन्‍कुत्‍ता वेला एवतस्‍के, स्वर्गमते मत्‍तव, बूमिपोर्रो मत्‍तव अन्‍निगुडा उंदगा कीसि अवुन किरिस्‍तुना अदिकारम हिळु हियमळ गावाले. 11 पेन अन्‍निटवुन दाना इच्‍चा मत्‍ताप पिलान कीसि ताकसंता. अदे पिलान परकारम मनाकुन पेनदा लोकुल्‍क इंचि मुन्‍नेने किरिस्‍तुना लोप्पो पेरमळ जर्गता. 12 मनम बोर अय्ते मुन्‍नेटाले किरिस्‍तुनपोर्रो आसे इरतोम, दाना महिमातुन तल्‍सकुनागोम इंचि दाना विचारम मंता. 13 मीकु मुक्‍ति हीता बेसता कबुर सत्‍तेम आंद अदुन मिमेटगुडा केंजतिर. केंजसि किरिस्‍तुना लोकुल्‍क आयानाहाटीं ओनपोर्रो विस्वासम इर्तिट. अस्‍के पेन हीता पोल्‍ले परकारम पवित्र आत्माता सिक्‍का मीपोर्रो वाटमळ जर्गता. 14 पेन बोर्कुन अय्ते अस्‍कुत्‍ता ओरा मुक्‍तिहाटीं, दाना पवित्र आत्मातुन वारसान हक्‍कता उंदि इसारालेसीं मनागा इरता. अदुनहाटीं लोकुल्‍क दाना महिमातुन तल्‍सकुंतुर.
इपीसि विस्‍वासुल्‍कुनाहाटीं पौलुसना पारतना
15-16 अदुनहाटीं बस्केटाल अय्ते नना, सामि येसुना पोर्रोटा मीवा विस्वासम बारेमते आनि पवित्र लोकुल्‍कुन मिमेट बेस पावरमते हूळांतिर इत्‍तदुना बारेमते केंजतन, अस्‍केटाल नना नावा पारतनाते मीकुन मति कीसेके, मीवाहाटीं पेनदुक बस्‍केळ्‍क दन्यवाद वेहासेक मनंतन. 17 अचोने आयाका मना सामि येसु किरिस्‍तुना पेन, इत्‍ते महिमाते निंडिस मत्‍ता पेन बाबल, ओना बारेमते मिमेट इंका बेस एरपाट कियानाहाटीं ओना पवित्र आत्माहेंदाल मीकु बुद्‍दि आनि बेस तेल्‍पिचकुननाहाटीं तेल्वि हिय्यिर इंचि पारतना कीसेक मंतन. 18 अल्‍हेने, पेन मीकुन बद आसेताहाटीं केयता? दाना पवित्र लोकुल्‍कुंक अद हिय्याना वारसानहक्‍कताल दोर्काना महिमाता दनम बल्हा मंता? इदुना बारेमते तेळियानाहाटीं मीवा मनसुना वेळसि एल्‍गागोट्‍टि. 19-20 अचोने आयाका किरिस्‍तुन हामुरताल मर्रा जीवाते तेहाचि स्वर्गमते दाना तिना बाजुंक उपिच्‍नेंके पेन दाना पेद्‍दा ताकततुन हुपिस्‍ता. अय्ते मनम किरिस्‍तुन विस्वासम कियानोरम उंदि आयालयगुडा अदे पेद्‍दा ताकत दानागा मंता. पेनदा ताकत बस्‍केन मारो, इदुन पेन मीकु तेळियागोट्‍टि इंचि नना विनंति कीसेके मंतन. 21 इद कालमतेन आयो गानि, मुन्‍ने वायाना कालमतेगुडा किरिस्‍तुनलेसीं कदर आनि अदिकारम मत्‍तोर बोरे मन्‍नोर. इल्‍हा किरिस्‍तु दुनियाते मनना राज्येम कियाना अदिकारिल्‍क, वेरे अदिकाराल्‍क, कळ्‍कुंक दिस्‍सुवव अन्‍नि ताकतकु आनि इंका अन्‍निटवुंकन्‍ना पेद्‍दोड आंदुर. 22 पेन इव अन्‍निटवुन किरिस्‍तुना काल्कुना हिळु कीसि, इव अन्‍निटवुनपोर्रो ओन्क अदिकारम हीता. हीसि ओरे अन्‍निटवुना मुक्‍यल आयागोम इंचि ओन कलिसियाकु हीसीता. 23 कलिसियातोर इत्‍ते किरिस्‍तुना मेंदुल आंदुर. ओना मेंदुल्तुन ओर अन्‍नि तीरकुने, अन्‍नि पोल्‍लेने पुरागा निह्‍चि अन्‍निटतुन पुरागा कियानोरगुडा ओरे आंदुर.