गलातिया
गलातिया विस्वासुल्कुंक पौलुसना सिट्टि
इद सिट्टिता बारेमते गिचचो परिचयम
रासतोना पोरोल: पौलुस
रासता कालम: इसवि सन 48-55
इद सिट्टि गलातिया इनना एरियाते मनना विस्वासुल्कुंक पौलुस रासतोर. इद एरिया दक्सिन आसियाते वांता. इद सिट्टि पौलुस गलातियाते मनना विस्वासुल्कुंक बारि रासतोर इत्ते, अगाटा विस्वासुल्क तप्पुड बोदां केंजसि निजम विस्वासमताल लक्कु आतुर. ओर्कुन मर्रा निजम विस्वासमते तर्रानाहाटीं पौलुस इद सिट्टि रासतोर.
पौलुसुन प्रेरित इंचि बोर मनकालोर पेर्रा हिल्लुर गानि कुद्दु पेने ओन येसु किरिस्तुना कबळहाटीं पेरता. पौलुसना उद्देसमगुडा यहुदि आयवोर लोप्पो होंचि किरिस्तुना बारेमता बेसता कबुर वेहनद मत्ता.
इद सिट्टिते पौलुस इंका इल्हा रासतोर गदा, दुनियातोर अंटोर पापम कीसि पेनदा पावरमताल लक्कु आतुर. गानि येसु किरिस्तुनपोर्रो विस्वासम कीसि मर्रा पेनदुक दग्गेरा आयावच्चु. येसु किरिस्तुन पोर्रोटा विस्वासमहेंदाल पेनदा पावरम मनकंक दोर्कंता. दीनहेंदाल ओरा कबाह्कगुडा बेस जर्गंतां.
बगा बतल मंता
जोहार आनि परिचयम 1:1-10
पौलुस प्रेरित आंदुर इंचि रुजुव कीसि हुप्संतोर 1:11–2:21
पेनदा कुर्पाता बारेमता बेसता कबुर 3:1–4:31
विस्वासुल्कुना जिम्मेदारि 5:1–6:10
आकिरता बोदां 6:11-18
1
गलातियाता विस्वासुल्कुंक पौलुसुनहेंदाल जोहार
1 नना येसु किरिस्तुना वरोर प्रेरितुन*प्रेरित इद पोरोल्क “पेन लोहचीतोर” इंचि अर्तम. येसु पन्नेंड मंदितुन पेरकुत्तोर ओरे प्रेरितुल्क आंदुर. आंदुन, नावा पोरोल पौलुस. नना प्रेरित इंचि मनकालोराहेंदालो हिलाकोंटे बोरो वरोर मनकल नाकुन कीताहेंका आया हिल्लेन, गानि कुद्दु येसु किरिस्तु आनि ओन हामुरताल मर्रा जीवाते तेहता आ पेनबाबाले नाकुन केयतोर. 2 इद सिट्टि गलातिया इनना एरियाते मनना कलिसियानोर्क, इत्ते मीवाहाटींगे नना नावातोनि मनना दादालोराहेंदाल रासतन.
3 मना पेनबाबाल आनि मना सामि येसु किरिस्तुनहेंदाल मीकु कुर्पा, सांति दोर्कि. 4 मनम मनना ई पापि दुनियाताल मनाकुन पिसागोटना इंचि मना पेनबाबाना इच्चा मत्ता. अदुनहाटीं येसु किरिस्तु मनाहाटीं ओना जीवा हीसि पेनबाबाना इच्चातुन पूरा कीतोर. 5 दुनियाता लोकुल्क युगा-युगाल्कुनदाका ओनदे कदर किय्यिर, आमीन.
निजमाता बेसता कबुर उंदे आंदु
6 बद पेन अय्ते येसु किरिस्तुना कुर्पाहेंदाल मीकुन दग्गेरा कीकुत्ता, असोंटा पेनदुन इच्चोन बिराना होळसिसि, बदो वेरे बेसता कबुरतेके तिरियतिर. इदुन केंजसि नाकु वेल्लेन इचंत्रम आसंता. 7 असल निजम बतल इत्ते, वेरे बदे बेसता कबुर हिल्ले. गानि इच्चुर लोकुल्क मंतुर ओर मीकुन गयबेत कीसि किरिस्तुना बारेमता बेसता कबुरतुन बदलांचलय हूळसंतुर. 8 ओक्कला मोमोट आयि स्वर्गमताल वाता पेनदा दूता आयि, मोमोट मीकु वेहता बेसता कबुर तप्पा इंका वेरे कबुर वेहानय्ते, असंटोर्कुन पेन नासडेम कीसि पोहि. 9 मोमोट मीकु मुन्ने वेहता पोल्लेतुन इंकुंदि मल्का वेहचंतोम बेस केंजट. बोरे आयिर, मिमेट मुन्ने नम्मुता बेसता कबुर तप्पा वेरे कबुरगिंटा वेहानय्ते पेन ओन नासडेम किय्यि.
10 अय्ते नना इंदके लोकुल्क नाकुन मेच्चुकुनगोम इंचि हूळसंतना मरि पेनदा आसिर्वाद दोर्कगोम इंचि हूळसंतना? हिलाकोंटे लोकुल्कुन कूस कियानसंटोना? ओक्कला नना लोकुल्कुन कूस कियानसंटोन आसि मत्ते किरिस्तुना सेवाकुन आयाकोन्नेन.
पौलुस वेहना बेसता कबुर पेनदागटाल वाता
11 विस्वासुल्कुनिटा, नावा पोल्ले बेस केंजट! नना वेहता बेसता कबुर मनकनहेंदाल आयो, इद मिमेट मतिते तासकुंटु. 12 इंका इद नाकु बोर मनकालोरहेंदालगुडा दोर्काहिल्ले आनि बोर मनकल नाकु कराह हिल्लोर. इदु नाकु कुद्दु येसु किरिस्ते कुल्ला कीसि वेहतोर.
13 नना यहुदि रिवाजते पिसनेंके नावा पिस्वर बल्हा मत्ता मीकु एरपाटे. अस्के नना पेनदा कलिसियातुन इरगा तकलिप कीतन, ओर्कुन नासडेम कियालय बस्केळ्क ओरा पज्जो अरसि मनुंदुन. 14 यहुदिल्कुना रीति-रिवाजकुने ताकमळते नना नावा वय्सुनोर्कन्ना उंद अळ्गु मुन्नेन मनुंदुन. नावा तादो-बाबुरहेंदाल दोर्कता रीति-रिवाजकुन पोर्रो ताकमळ नाकु वेल्लेन इस्टम मत्ता.
15 गानि पेन मात्रम नना यावाना पीटे मननेंकेन नाकुन पेरता. पजा दाना कुर्पाते नाकुन केय्सि, दाना मर्रि येसु किरिस्तुना बारेमते तेळियागोट्सि वेहता. 16 अदुनहाटीं नना यहुदि आयवा लोकुल्कुन लोप्पो होंचि दाना मर्रिना बारेमता बेसता कबुरतुन वेहा परतन. इल्हा जर्गतस्के नना बोरे मनकंक होंचि कलिया हिल्लेन बोने बतल पूसकिया हिल्लेन. 17 नाकन्ना मुन्ने आता प्रेरितुल्कुंक कलियना इंचि येरुसलेमगुडा होना हिल्लेन. दाना बदुल, अस्केटद अस्केन नना अरब इनना देसेम होंचि, पजा दमिस्क सहरतेन मल्सि वातन.
18 पजा मूड वर्सां आतंका नना केपांक†केपा पत्रुन केपा इंचिगुडा केयुंदुर. कलियालय येरुसलेम होंचि, ओनतोनि पदहेन रोजकु मत्तन. 19 गानि याकोब इनना सामिना तम्मुंक तप्पा इंका बोरे प्रेरितुंक कलिया हिल्लेन. 20 नना पेनदा मुन्ने निल्सि वेहचंतन, बतल अय्ते नना मीकु रासेक मंतन, अव्टे गिचचोगुडा आबद्दम हिल्ले. 21 पजा नना सिरिया, किलिकिया इनना एरियाने होत्तन.
22 गानि यहुदिया एरियाते मनना कलिसियानोर अय्ते नाकुन बस्केने हूळा हिल्लुर. 23 ओर नाकुन एरपाट कियाकोन्ना, “बोर मनकल अय्ते मना लोकुल्कुन मुन्नेटा कालमते तकलिप कीसि नासडेम कियालय हूळुंदुर, ओरे इंदके किरिस्तुना बारेमता बेसता कबुरतुन वेहचंतोर,” इंचि वेरेतोर वळ्कानेंके मात्रम केंजतुर. 24 इल्हा इंचेके ओर नावाहेंदाल पेनदुन तल्सकुनुंदुर.