1 ई मेल्किसेदेक सालेम सहरता राजाल आनि अन्‍निटकन्‍ना पेद्‍दा पेनदा पेर्मल मत्‍तोर. अब्राहाम वेरे राजालोरतोनि लडाइ कीसि ओर्कुन गेल्सि, मल्सि वायनेंके मेल्किसेदेक ओन्क कलियसि आसिर्वाद हीतोर. 2-3 अस्‍के अब्राहाम लडाइते गेल्सि तत्‍ता पूरा दनम-संपत्‍तितुन तूस कीसि, पदोव तूस मेल्किसेदेकुंक हीतोर. मेल्किसेदेक इनना पोरोल्कु अर्तम, “नीतिता राजाल” इंका इब्रानि बासाते सालेम इनना पोरोल्कु “सांति” इंचि अर्तम आंद. इत्‍ते ओन सुकमता राजाल इंचिगुडा इनावच्‍चु. मेल्किसेदेकुना तल्‍लुर-बाबो बोर आंदुर, ओना तम्मुह्‍क-तादालोर बोर आंदुर, ओना पुट्‍कु-हामुरता बारेमतेगुडा दर्मसास्‍त्रमते बतले रासि हिल्‍ले. पेनदा मर्रिनलेह्का ओरगुडा बस्‍केळ्‍ताहाटीं पेर्मल आसि मनंतोर.

4 ई मेल्किसेदेक इत्‍ते बच्‍चोन पेद्‍दा मनकालो मनमे विचारम कियाना मंता. मना मोदोलता मनकल अब्राहाम पगातोरहेंदाल गेल्सता बेसता मालुना पदिताल उंदि तूस ओन्क हीतोर. 5 मूसाना नियमते उंदि आदेस मंता. अद बतल इत्‍ते, लेवि वंसंमताल पेर्मालोर आतुर, वेरे वंसंमता लोकुल्‍क ओर अब्राहामुना वंसंमतोर आयिना ओरा तम्मुह्‍क-तादालोर, ओरा कमयता पदिताल उंदि तूस पेर्मल आतोर्कु हिय्युडे गावाले.*लेविना बाबो याकोब आंदुर. ओनागटाले इस्राएलतोर अंटोर पुट्तुर. अब्राहाम याकोबना मातिर दादाल आंदुर.✡गिनति 18:21-28

6 गानि मेल्किसेदेक लेविना वंसंमतोर आयोर. अय्नागानि मेल्किसेदेक, बोन्क अय्ते पेन पोल्‍ले हीसि मत्‍ता आ अब्राहामुनाहेंदाल पदि तूसकुनाल उंदि तूस येतकुंचि ओन्क आसिर्वाद हीतोर.†मेल्किसेदेकुना कालमते लेवि पुट्‍टा हिल्‍लोर.✡उत्‍पत्‍ति 14:19-20 दीनहेंदाल मेल्किसेदेक पेद्‍दोड आंदुर. 7 इंदके पेद्‍दोड सिन्‍नोंक आसिर्वाद हींतोर इत्‍ता पोल्‍लेपोर्रो बतले अनमानम हिल्‍ले.‡मेल्किसेदेक वय्सुने अब्राहामुंकन्‍ना पेद्‍दोड आंदुर.

8 लेविना वंसंमताल पेर्मालोर आतोर पदिताल उंदि तूस येतंतुर. गानि ओर अय्ते उंदि रोज हायना मनकालोरे आंदुर. गानि बस्‍केळ्‍क पिस्सि मनना मेल्किसेदेकगुडा पदिताल उंदि तूस येतंतोर इंचि गवाइ वेहताप दर्मसास्‍त्रमते रासि मंता.

9 अल्हा हूळते, पदिताल उंदि तूस येताना लेविगुडा अब्राहामुनाहेंदाल, पदिताल उंदि तूस मेल्किसेदेकुंक हीतोर इंचि इनावच्‍चु. 10 अद बल्हा इत्‍ते, अब्राहाम मेल्किसेदेकुंक कलियसि पदोव तूस हीतस्के, लेवि पुट्‍टा हिल्‍लोर, अय्नागानि ओर ओना तादो-बाबो अब्राहामुना मेंदुल्ते जीवा पेळेतालेसीं मत्‍तोर. ✡उत्‍पत्‍ति 14:18-20

11 मूसाना नियमते, लेविना वंसंमतोरे पेर्मालोर्क आयाना इंचि रासतद मंता. अय्ते ओर कियाना कबाह्कुनहेंदाल लोकुल्‍क पुरागा नीतिमंतुल्क आया पर्सि मत्‍ते, हारूननसोंटोन वरोन पेर्मन पेन लोहचि मनवळ. गानि मेल्किसेदेकुना रीतिते वरोर पेर्माना अव्‍सरम बतल मत्‍ता? 12 बारित्‍ते पेर्माना कबळ मारियतस्के, मूसाना नियमगुडा मारिया पींता. 13 इवन्‍नि पोल्‍लें इंदके वेरे कानदानते पुट्ता येसुना बारेमते वेहासेक मंतां. ई कानदानते पुट्तोर बोरेगुडा मोक्‍कु हिय्यना जेगातगा सेवा किया हिल्‍लुर. 14 मना सामि यहुदाना वंसंमते पुट्तोर. ई कानदानतोर पेर्मालोर आयाना बारेमते मूसाल बग्‍गेन बतल रासा हिल्‍लोर, इंचि अंटोर्क तेळियसे मंता.✡उत्‍पत्‍ति 29:34-35

15 गानि मेल्किसेदेकुनसंटोर इंकावरोर पेर्मल वांतोर इत्‍तस्के, इद पोल्‍ले इंकिच्‍चो किलियर आंता. 16 उंदि कानदानतोर पेर्मालोर आयाना, इंचि मूसाना नियमते रासतद मंता. गानि येसु आ हिसाबते पेर्मल आया हिल्‍लोर. ओनगा बस्‍केळ्‍क पिस्सि मनना बलम मंता, अदे बलमते ओर पेर्मल आतोर. 17 बारित्‍ते, “मेल्किसेदेकुना रीतिते निमे बस्‍केळ्‍ताहाटीं पेर्मल आसि मंदकिन,” इंचि ओना बारेमते दर्मसास्‍त्रमते रासतद मंता.

18-19 इल्‍हा, मूसाना नियमते रासि मत्‍ता आदेसाल्‍क लोकुल्‍कुन नीतिमंतुल्क किया पर्राहिल्‍ले. अद नियम कमजोर आसि बताके ओज्‍जाकोंटा आता इंचि, पेन दान पक्‍काक इरता. दाना जेगाते, पेन दानकन्‍ना मंचि आसेतुन इरता. इद आसेतुन पीसि मनम पेनदा दग्गेर्क होना पर्रांतोम.

20-21 इंकुंदि पोल्‍ले बतल इत्‍ते, हारूनना कानदानतोर ओट्‍टु तिनाकोंटेन पेर्मालोर आतुर. गानि येसु पेर्मल आयानेंके पेन ओन इल्‍हा इत्‍ता: “निमे बस्‍केळ्‍ताहाटीं पेर्मल आसि मंदकिन इंचि पेन ओट्‍टु तित्‍ता, अद दाना पोल्‍लेतुन बस्‍केने मार्सो,” इंचि रासतद मंता. इल्‍हा पेन ओट्‍टु तित्‍ताहाटीं येसु पेर्मल आतोर. 22 अदुनहाटीं इंदके पेनदा मुन्‍नेटा पडाना करारकन्‍ना, पूना करार बच्‍चोनो बेसतद इंचि येसु गेरांटि आसि निल्तोर.

23 इंकुंदि पोल्‍ले बतल इत्‍ते, वेल्‍लेटोर लोकुल्‍क पेर्मालोर आसि मत्‍तुर, गानि हामुर ओर्कु हमेसाताहाटीं पेर्मल आसि मनालय अड्‍डम आता. 24 गानि येसुंक बस्‍केने हामुर हिल्‍ले, इंचि ओना पेर्मलतनम बस्‍केळ्‍ताहाटीं मनंता. 25 अदुनहाटीं येसु, ओनाहेंदाल बोर अय्ते पेनदागा वांतुरो, ओराहाटीं विनंति कियालय ओर बस्‍केळ्‍क जीवातेन मनंतोर. इल्‍हा येसु माकुन पुरागा पिसागोटा पर्रांतोर.

26 येसु पवित्र मत्‍तोर, ओनगा बतले कसूर मनाहिल्‍ले, ओन्क बस्‍केने पापम अंटा हिल्‍ले, पापिल्कुनाल लक्‍कु मत्‍तोर. अदुनहाटीं ओन स्वर्गमकन्‍ना एत्‍तु तेहामळ जर्गता. इसोंटा पेद्‍दा पेर्मले मनाहाटीं बेस कुदरंतोर. 27 वेरे पेद्‍दा पेर्मालोर मुन्‍नेन सतता पापाल्क मापि आयगोम इंचि मोक्‍कु हीकुंतुर आनि पज्जोटाल वेरे लोकुल्‍कुना पापाल्क मापि आयालय मोक्‍कुल्क हींतुर. इल्‍हा ओर दिन्‍नम कियुंदुर. गानि किरिस्‍तु लोकुल्‍कुना पापाल्क मापि आयानाहाटीं उंदे मल्का ओना मेंदुल्तुन मोक्‍कु हीतोर. अदुनहाटीं ओन्क वेरे पेर्मालोरलेसीं कियाना अव्‍सरम हिल्‍ले. 28 मूसाना नियम कमजोर मनकालोर्कुन पेद्‍दा पेर्मालोर इंचि निलाहंता. गानि मूसाना नियमकन्‍ना पज्जोटाल, ओट्‍टुनतोनि वाता आ पोल्‍ले, पेनदा मर्रिन पेद्‍दा पेर्मल इंचि निल्‍हाता. आ मर्रि अन्‍नि तीरकुने पुरागा मंतोर. ओर बस्‍केळ्‍ताहाटीं पेद्‍दा पेर्मल आसि मंतोर.