1 परिसि लोकुल्‍कुनाल*परिसि लोकुल्‍क यहुदिल्कुना उंदि गेंगुना पोरोल आंद. ई गेंगुना लोकुल्‍क मर्रा पुटमळतुन नम्मंतुर. वरोर निकोदेमस इनना मनकल मत्‍तोर, ओर यहुदिल्कुना लीडर मत्‍तोर. 2 ओर उंदि रोजु नर्कटा वेलाक येसुंक वासि कलियतोर. कलियसि, “रब्‍बी,†रब्‍बी इद इब्रानि पोल्‍ले आंद, गोंडिते दीना अर्तम गुरु आंद. निमे कियना ई अद्‍बूतामाता कबाह्‍क पेनदा तोळ हिल्वा बोरे किया परोर. दीनहेंदाल निमे पेनदाहेंदाल वाता गुरुनिंचि मोमोट तेल्‍पिचकुत्‍तोम,” इंचि इत्‍तोर. 3 अस्‍के येसु ओन, “नना निजम-निजम वेहासेक, बोरे आयिर, पूना रीतुने मर्रा पुट्‍टुवा, ओर पेनदा राज्येमतुन हूळा परोर,” इंचि वेहतोर. 4 अस्‍के निकोदेमस, “गानि वरोर मातरल आता मनकल मर्रा बल्हा पुट्‍टा परंतोर? ओर ओना यावाना पीटे होळियसि मर्रा पुट्‍टा परांतोरा?” इंचि येसुन पूसकीतोर.

5 अस्‍के येसु ओन्क इल्‍हा वेहतोर: “नना निजम-निजम वेहासेक, वरोर मनकल एताल आनि पवित्र आत्माहेंदाल पुट्‍टुवद,✡यहेजकेल 36:25-28 ओर पेनदा राज्येमते होळिया परोर. 6 मना मेंदुल अय्ते तल्‍लुर-बाबोनहेंदाल पुट्‍टा परंता, गानि आत्मा मात्रम सिराप पवित्र आत्माहेंदाले पुट्‍टा परंता. 7 अदुनहाटीं, मीकु मर्रा पुट्‍टे पींता, इंचि नना मीकु वेहतद केंजसि निमे इचंत्रम आयमा. 8 बल्हा अय्ते वळि दान इस्‍टमाताप बेके इत्‍ते हेक्‍के वित्‍तंता, दाना सप्पुडगुडा नीकु केंजा वांता, गानि अद बेंदाल वासंता, बेके होंचंता इत्‍तद मात्रम नीकु तेळियो. अल्हेन पवित्र आत्माहेंदाल पुट्ता हरेक मनकलगुडा मनंतोर,” इंचि येसु वेहतोर.

9 गानि “इद बल्हा आया परंता?” इंचि निकोदेमस येसुन पूसकीतोर. 10 अस्‍के येसु ओन्क इल्‍हा जवाब हीतोर, “निमे अय्ते इस्राएल लोकुल्‍कुंक कराहना पेद्‍दा गुरुन आंदिन. अयना इव पोल्‍लें नीकु तेळियोंगां? 11 नना निजम-निजम वेहासेक, माकु तेळियता पोल्‍लेंगें मोमोट वेहांतोम, कळ्‍कुने हूळता पोल्‍लेना गवाइ मोमोट मीकु वेहांतोम. अयना मिमेट मावा गवाइतुन ओप्‍कुंचेक हिल्‍लिर. 12 नना मीकु इद दुनियाता पोल्‍लें वेहतेने मिमेट नमसेक हिल्‍लिर. अय्ते नना स्वर्गमता बारेमता पोल्‍लें वेहते मिमेट बल्हा नम्मंतिर? 13 मनकना रूपमते पुट्तोन नना स्वर्गमताल वातन. इंका नाकु तप्‍पा स्वर्गमते वेरे बोरे होना हिल्‍लुर. 14-15 नाकुन बोर अय्ते विस्वासम कींतोर, ओन्क बस्‍केळ्‍क पिस्सना पिस्वर दोर्कगोम इत्‍ते, मूसाल बल्हा बय्‍लि बूमिते इत्‍तोळता तरासुन कोय्यापोर्रो वेलाड वाटसि मत्‍तोर,✡गिनति 21:9 अल्‍हेने मनकना रूपमते पुटतोन नाकुनगुडा वेलाड वाटमळ जर्गागोम,” इंचि येसु इत्‍तोर.

16 पेन दुनियातोर्कुन इच्‍चोन पावरम कीता गदा, दाना वरोरे मर्रिनगुडा ई दुनियातोराहाटीं हीता. ओन नम्मना हरेक मनकल नासडेम आयामन्‍नि गानि ओन्क बस्‍केळ्‍क पिस्सना पिस्वर दोर्कना इंचि अद अल्हा कीता. 17 पेन ई दुनियातोर्क सिक्‍सा हिया वेहालय, दाना मर्रिन ई बूमिपोर्रो लोहा हिल्‍ले, गानि दुनियातोर्कुन पिसागोटालय ओन लोहचीता. 18 ओन बोर अय्ते नम्मंतुरो, ओर्क ओर सिक्‍सा हिया वेहोर. गानि बोर अय्ते ओन नम्मुरो, पेनदा वरोरे मर्रिनपोर्रो विस्वासम कियवाहेंका ओर्क पेन मुन्‍नेन सिक्‍सा हीसि इरता. 19 पेन मुन्‍नेन बारि सिक्‍सा हीसि इरता इत्‍ते, पेनदाहेंदाल उंदि वेलगु दुनियाते वाता. गानि दुनियातोर ओरा तप्‍पुड कबाह्कुनहेंका वेलगुने पिसनद होळसि हीकटते पिसमळतुने मेच्‍कुत्‍तुर. 20 तप्‍पुड हरदे ताकाना बोरे मनकल आयि, ओर वेलगुन मेच्‍कुन्‍नोर. ओना तप्‍पुड कबाह्‍क बय्यर दिस अर्रंतां इंचि ओर वेलगुने वायोर. 21 गानि सत्‍तेम हरदे ताकाना मनकल, ओर कियना कबाह्‍क पेनदा सहायमते आसंतां इनकुंचि अव अंटोर्क बय्यर दिस्‍सनाहाटीं ओर वेलगुने वांतोर.

22 ई पोल्‍लें मारतस्के, येसु, ओना सिस्युल्कु अगटाल यहुदिया राज्येमते होत्‍तुर. होंचि अगाटा लोकुल्‍कुंक बापतिस्मा हीसेक कोन्‍नि रोजकु अग्गेन मत्‍तुर. 23 सलिम इनना नाटेंक दग्‍गेरा मनना एनोन पोरोलता जेगाते वेल्‍लेन एर मत्‍ताहेंका, योहानगुडा अगा बापतिस्मा हियुंदुर. लोकुल्‍क ओना कय्‍दे बापतिस्मा एतालय अगा वायुंदुर. 24 ई गटनां योहानुन जेलने वाटका मुन्‍नेने जरगतां. 25 अस्‍के योहानुना सिस्युल्क आनि वरोर यहुदि मनकन नड्‍डुम सुद्‍दिकरन कियाना रिवाजता बारेमते रोंड-रोंड पोल्‍लें आतां. 26 दानहाटीं योहानुना सिस्युल्कु योहानुनगा वासि, “गुरु, निमे योर्दन बेरेटा हब्बेरा मननेंके नीवातोनि बोर अय्ते मत्‍तोरो, निमे बोना बारेमते अय्ते गवाइ हीसि मत्‍तिनो, ओर इंदके लोकुल्‍कुंक बापतिस्मा हीसंतोर. अंटोर लोकुल्‍क ओनहेकेन होंचंतुर,” इंचि वेहतुर. 27 अय्ते योहान ओर्क इल्‍हा जवाब हीतोर, “स्वर्गमताल पेन हियवद बोनके बतल दोर्का परो. 28 नना किरिस्‍तुन आयोन. नना सिराप ओनाहाटीं हर्रि तयार कियालय मुन्‍ने वातोन आंदुन. नना वेहता पोल्‍लेंक मिमेट गवाइ मंतिर! 29 मरमिन पेडल मत्‍तागेन मरमिन पेगिड मनंता. नना अय्ते मरमिन पेडाना पक्‍काते निलसि मनना ओना दंटागानसंटोन आंदुन. मरमिना पेडल बतलन्‍ना वेहते अद केंजसि आ दंटागाल वेल्‍लेन कूस आंतोर. ननागुडा अल्हेन, लोकुल्‍क ओनगा होननद हूळसि नना पुरागा कुसिते निंडसोत्‍तन. 30 इंदके ओना कदर वेल्‍लेन बेर्सगोम, नावा कदर वेल्‍लेन तक्‍को आयगोम अचोने!” इंचि योहान वेहतोर.

31 बोर अय्ते पोर्रोटाल वातोर, ओर अंटोर्कुंकन्‍ना पेद्‍दोड. बोर अय्ते इद दुनियाते पुटतोर, ओर इदे दुनियातोर आंदुर. अदुनहाटीं ओर ई दुनियाते जरगानवुना बारेमतेन वळ्कंतोर. गानि बोर अय्ते स्वर्गमताल वातोर ओर अंटोर्कुंकन्‍ना पेद्‍दोड आंदुर. 32 ओर अगा बतल अय्ते हूळतोर, केंजतोर अदुना बारेमतेन गवाइ वेहंतोर, गानि ओना गवाइतुन बोरे नम्मुर. 33 ओर वेहता गवाइतुन बोर अय्ते नम्मंतुरो, ओर अंटोर पेने सत्‍तेम इंचि पक्‍का कबुल कींतुर. 34 बोन अय्ते पेन लोहचीता, ओन पेन दाना आत्माते पुरागा निहता. अदुनहाटीं ओर सिराप पेनदा पोल्‍लेंगें वेहांतोर. 35 पेन बाबल ओना मर्रिन इरगा पावरम कींतोर, इंचि मर्रिना कय्‍दुक अन्‍नि अप्पजेपतोर. 36 पेनदा मर्रिन बोर अय्ते नम्मंतुरो, ओर्क बस्‍केळ्‍क पिस्सना पिस्वर दोर्कंता. गानि बोर अय्ते मर्रिना पोल्‍ले केंजुरो, ओर्क बस्‍केळ्‍क पिस्सना पिस्वर अय्ते दोर्केन दोर्को, गानि ओनपोर्रो पेन होंग पीसि मनंता.