1 “मिमेट विस्वासमताल पजोळ्क आयामन्‍नि, इंचि मीकु इव पोल्‍लें वेहतन. 2 विस्वासम कियवा पेद्‍दाल्क मीकुन दर्मसास्‍त्रम कराहना लोहकुनाल पेच्‍हांतुर. इंका मीकुन हव्कना हरेक मनकल, नना पेनदा सेवा कीसंतन, इंचि इनकुनना कालम वायाना मंता. 3 बाबाल आनि नना बोर आंदुम, ओर्क तेळियो, अदुनहाटीं ओर मीकुन अल्हा कींतुर. 4 अद कालम वातस्के, नना वेहता पोल्‍लें मीकु मति वायाना इंचि, इव पोल्‍लें नना मीकु वेहचंतन. इव पोल्‍लें नना मीकु मुन्‍ने वेहा हिल्‍लेन, बारित्‍ते नना मीतोने मत्‍तन.”

5 “नना अय्ते इंदके नाकुन लोहतोनगा मल्सि होंचंतन. गानि निमे बगा दांतिन इंचि मीवा लोप्पोटाल वरोरगुडा नाकुन पूसकीसेक हिल्‍लिर. 6 नना इव पोल्‍लें मीकु वेहताहेंका, मिमेट वेल्‍लेन दुक्‍कमते मंतिर. 7 अयना नना मीकु निजम-निजम वेहासेक, नना मिहागटाल होत्‍ते, मीके पायदा आयार. बारित्‍ते नना होनाकोंटे सहायम कियानोर मिहगा वायोर. नना होनानय्ते ओन मिहगा लोहंतन. 8 ओर वातस्के पापम बारेमते, सत्‍तेम बारेमते आनि न्‍यायम बारेमते लोकुल्‍कुन ओप्‍संतोर. 9 ओर नापोर्रो विस्वासम इर्रका पापम कीतुर, इंचि सहायम कियानोर ओर्क हुप्‍संतोर. 10 नना बाबानाहेके होंचंतन, मर्रा मिमेट नाकुन हूळा परिर. अदुनहाटीं सहायम कियानोर सत्‍तेमता बारेमते लोकुल्‍कुंक तेळियागोट्‍सि वेहंतोर. 11 इंका इद दुनियापोर्रो राज्येम एलाना अदिकारिना न्‍यायम अय्ते मुन्‍नेन आसि मंता. अदुनहाटीं सहायम कियानोर न्‍यायमता बारेमते लोकुल्‍कुंक तेळियागोट्‍सि वेहंतोर. 12 मीकु वेहालय नहगा इंका वेल्‍लेन पोल्‍लें मंतां, गानि अवुनंता इंदके ओर्सुकुना परिर. 13 गानि सत्‍तेम आत्मा वातस्के, अद मीकु पूरा सत्‍तेमतुन हुप्‍सार. अद दाना मनसुंक वाताप वळ्को, गानि बतल अय्ते अद बाबानगटाल केंजंता, अदे वेहंता. इंका मुन्‍ने जर्गना बारेमतेगुडा वेहंता. 14 अद नाहगटाल तेंडकुंचि, वासि मीकु वेहंता. अल्हा कीसेके अद नाकु कदर हींता. 15 बव अय्ते बाबानवो, अव अन्‍नि नावां आंदुं. अदुनहाटींगे, अद नाहगटाल तेंडकुंचि, वासि मीकु वेहंता, इंचि नना मीकु वेहतन. 16 इंका जेरासेप आते, मिमेट नाकुन हूळा परिर, पजा इंका जेरासेपुंक, मिमेट नाकुन मर्रा हूळकिर,” इंचि येसु सिस्युल्कुंक वेहतोर.

17 इद पोल्‍ले केंजसि, ओना इच्‍चुर सिस्युल्क वरोंक-वरोर पूसकीसेक, “इंका जेरासेप आते, मिमेट नाकुन हूळा परिर, पजा इंका जेरासेपुंक, मिमेट नाकुन मर्रा हूळकिर, बारित्‍ते नना बाबानगा दांतन, इल्‍हा मनाकु येसु बारि वेहचंतोर मरि? 18 इंका जेरासेप आते इनना पोल्‍लेक अर्तम बतल? असल ओर इनानद बतलो मनाकु अर्तमे आसेक हिल्‍ले,” इंचि वळ्ककुनालय दल्‍गतुर. 19 सिस्युल्क ओन पूसकींतुर इंचि येसुंक तेळियता. अस्‍के येसु ओर्क इल्‍हा वेहतोर, “इंका जेरासेप आते, मिमेट नाकुन हूळा परिर, पजा इंका जेरासेपुंक, मिमेट नाकुन मर्रा हूळकिर, इत्‍ता नावा पोल्‍लेता बारेमते मिमेट वरोंक-वरोर बतां पूस कीकुंचंतिर? 20 नना निजम-निजम वेहासेक, मिमेट मोत्‍कुंचि-मोत्‍कुंचि अळकिर, गानि दुनियातोर कुसिते मनानुर. मीकु दुक्‍कम वासि अळकिर, गानि मीवा दुक्‍कम कुसिते मारियंता. 21 उंदि मुरतळ दाना एरपूराना वेला एवतस्‍के, नोप्‍पिं वासि वेल्‍लेन दुक्‍कमते मनंता. गानि दान्क पेडालो-पेगिडो पुटतस्के, उंदि जीवा दानहेंदाल इद दुनियाते वाता इत्‍ता कुसिते, मुन्‍ने बोगांच्‍ता तकलिपकु मर्रा दान्क मतिगुडा मन्‍नों. 22 इदगुडा अल्हेन! इंदके दुक्‍कम वांता, गानि नना मीकु मर्रा कलियंतन अस्‍के, मिमेट वेल्‍लेन कूस आकिर. अद कुसितुन मिहागटाल बोरे तेंडकुना परुर. 23 अद रोज मिमेट नाकुन बदे तल्किर. गानि नना निजम-निजम वेहासेक, मिमेट नावा पोरोल्ते बाबान बतल तल्किनागानि ओर मीकु अदुन हींतोर. 24 इदवेरदाका मिमेट ना पोरोल्ते बतले तल्का हिल्‍लिर. तल्‍कट मीकु दोर्कार, अस्‍के मीवा कुसि पूरा आयार.”

25 “इव पोल्‍लें नना मीकु उदाहरनकु हीसि वेहतन. गानि मुन्‍ने इंका बस्‍केने उदाहरनकु हीसि वेहोन. बाबाना बारेमते बल्हा मत्‍तद अल्हा कुल्‍ला कीसि वेहना वेला वायनद मंता. 26 अद रोज मिमेट नावा पोरोल्ते ओन तल्ककिट. अस्‍के नना मीवाहाटीं बाबांक विनंति कींतन इंचि मीकु वेहासेक हिल्‍लेन. 27 बारित्‍ते मिमेट नाकुन पावरम कीतिर, नना पेनदागटाल वातन इत्‍ता पोल्‍लेतुन विस्वासम कीतिर, अदुनहाटीं कुद्‍दु बाबाले मीकुन पावरम कीसंतोर. 28 नना बाबानगटाल इद दुनियाते वातन. इंदके मर्रा इद दुनियातुन होळसि बाबानाहेके होंचंतन,” इंचि येसु वेहतोर.

29 अस्‍के सिस्युल्क, “हूळा! इंदके निमे उदाहरन हीसि वळ्कसेक हिल्‍लिन, कुल्‍ला-कुल्‍ला वळ्‍कसंतिन. 30 नीकुन बोरे बतल पूसकियना अव्‍सरम हिल्‍ले. नीकु अन्‍नि तेळियंता इंचि माकु एर्का मंता. दीनहेंदाल, निमे पेनदागटाल वातिन, इंचि मोमोट विस्वासम कींतोम,” इंचि येसुन इत्‍तुर. 31 अस्‍के येसु, “इंदके अयना मिमेट विस्वासम कींतिरा? 32 हुळाट, नाकुन वरोने होळसि, मिमेट बेकेटोर हेके आसि बोना लोन ओर होनना वेला वायनद मंता, अद वासे मंता. अयना नना वरोन हिल्‍लेन, नातोनि बाबाल मंतोर. 33 नाहगटाल मीकु सांति दोर्कि, इंचि इव पोल्‍लें मीकु वेहतन. दुनियाते मीकु तिप्‍पल्‍क-कस्‍टाल्‍क वायनुं, गानि नना दुनियाता ताकततुन गेल्सतन, अदुनहाटीं मिमेट बेस दैरनेमते मंटु,” इंचि येसु वेहतोर.