21
येसु येरुसलेमते होळियतोर
(मरकुस 11:1-11; लूकाल 19:28-38; योहान 12:12-19)
1 ओर अंटोर येरुसलेम सहरता दग्गेरा जय्तुन मराकुना गुट्टापोर्रो मनना बैतपागे इनना नाटेना दग्गेरा एव्तुर. पजा येसु इव्वुर सिस्युल्कुन केय्सि, 2 ओर्क इल्हा वेह्चि नाटे लोहतोर. “मी मुन्ने दिस्सना नाटे होंट, अगा एव्ता एव्वुडे मीकु उंदि दोहाचि मत्ता गाडदि आनि दाना पोरि दिसंता. अवुन लेहकुंचि नहगा पीसि वटु. 3 ओक्कला अवुन पीसि वायनेंके बोरन्ना मीकुन बतलन्ना इत्ते, ‘सामिंक इवुना अव्सरम मंता,’ इंचि वेहट. अस्के ओर अवुन बिराना ओम्टु इंचि इंतोर.”
4 एनकटा पेनदा कबुरतोर वेहता पोल्लें निजम आयगोम इंचि इल्हा जर्गता. अद पोल्ले इल्हा मंता:
5 “सियोनुना मिय्यळ्क*सियोनुना मिय्यळ्क इत्ते येरुसलेम सहरता रहिवासि. बारित्ते येरुसलेम सहर सियोन इनना गुट्टापोर्रो मत्ता अदुनहाटीं येरुसलेम सहरता लोकुल्कुन सियोनुना मिय्यड (रहिवासि) इंतुर. वेहट गदा, हुळाट, मीवा राजाल मीहेके वासंतोर,
ओर सांत बुद्दितोनि, बर्वु कांजना गाडदि पोरिनपोर्रो उद्दिस वासंतोर.”✡जकर्याह 9:9
6 अस्के सिस्युल्क होंचि येसु वेहताप कीतुर. 7 सिस्युल्क गाडदि आनि गाडदि पोरिन येसुनगा पीसि वातुर. पजा अवुनपोर्रो ओरां कपडिं तारतुर. तारतारित्ते येसु आ गाडदि पोरिनपोर्रो उदुतोर. 8 आ गर्दिते वेल्ले लोकुल्क येसुनहाटीं ओर केर्ता कपडिं तेंडसि हर्दे तारतुर. इंकिच्चुर अय्ते मराकुना कोम्मां नर्किसि हर्दे तारतुर. 9 अचोने आयका,
“दाविद राजाना मर्रिंक होसन्ना!†होसन्ना इद पोल्ले पेनदा स्तुति कियनाहाटीं यहुदि लोकुल्क वापर कींतुर. पेनबाबाना अदिकार पीसि वायानोंक,
आसिर्वाद दोर्किकांटी! स्वर्गमता पेनबाबाना स्तुति आयिकांटी.”✡बजन संहिता 118:25-26
इल्हा वरगेयसेके येसुना पज्जो-मुन्ने लोकुल्कुना मंदा ताकसेक होनुंदुर. 10 येसु येरुसलेम सहरते होळियतोर, अस्के पूरा सहरअंता उंदे रोद्दा आता. “ईर बोर आंदुर?” इंचि अंटोर पूसकियुंदुर.
11 अस्के, “ईर गालिल एरियाता नासरेत नाटेना पेनदा कबुरतोर येसु आंदुर,” इंचि लोकुल्क वेहुंदुर.
येसु गुळिते दांतोर
(मरकुस 11:15-19; लूकाल 19:45-48; योहान 2:13-22)
12 पजा येसु अगाटा गुळिते होंचि, अगा अम्मानोर्कुन, अस्सानोर्कुन अंटोर्कुन पेच्हाचि गेदुमतोर. अचोने आयका अगा मत्ता कोत्तां अदला-बदला कियानोरा बल्लन पावरेल्क अम्मानोरा कुर्सिन मिड्हाचि वाटतोर. 13 पजा येसु ओर्कुन इल्हा इत्तोर. “नावा लोतुन, पारतना कियाना लोन इंतुर, इंचि दर्मसास्त्रमते रासि मंता, गानि मिमेट दीन दोंगाल्क मक्कना जेगा कीतिर,” इत्तोर.
14 गुळिते येसुनगा गुड्डोर्क, कुंटोर्क वातुर, ओर्कुन अंटोर्कुन येसु बेस कीतोर. 15 गुळितगा येसु कीता पेद्दा-पेद्दा इचंत्रमता कबाह्क हूळसि “दाविद राजाना मर्रिंक होसन्ना” इंचि पिलाल्कुना मोत्कुन्मडतुन केंजसि अगा मत्ता पेद्दा पेर्मालोर दर्मसास्त्रम कराहना गुरुल्क इरगा होंगुंक वातुर.
16 अस्के ओर येसुन, “पिलाल्क नीकुन बतल इंचंतुर, अद निमे केंजतिना?” इंचि पूसकीतुर. अस्के येसु, “हो, केंजसंतन. ए पेनबाबा, निमे सिन्ना पिलाल्कुंक आनि पाल उनना पिलाल्कुंक स्तुति कियमळ कराहतिन,✡बजन संहिता 8:2 इंचि दर्मसास्त्रमते रासि मंता. अद मिमेट बस्केने हदवा हिल्लिरा?” इंचि ओर्कुन इत्तोर.
17 पजा येसु ओर्कुन अग्गेन होळसि, सहरता पलाते बेतानि सहर होंचि, अद नर्का अग्गेन मत्तोर.
कायां हादवा अंजिर मराकु येसु सापनेम हीतोर
(मरकुस 11:12-14; 11:20-24)
18 हक्केरे येसु वापस सहरताहेके होननेंके ओन्क कर्वेस्ता. 19 अस्के हर्दा पक्काते उंदि अंजिर मरातुन हूळसि आ मरातगा होत्तोर. गानि आ मराकु आकिं तप्पा बतांगे मनाहिल्लें. अस्के, “इंका नीकु बस्केने कायां हादा मन्नि,” इंचि येसु आ मरातुन इत्तोर. अल्हा इत्ता इन्मळे आ मरा वतसि होत्ता.
20 अल्हा आतद हूळसि सिस्युल्कुंक इचंत्रम आता. अस्के ओर, “अंजिर मरा इच्चोर बिराना बल्हा वतसि होत्ता?” इंचि येसुन इत्तुर.
21 अस्के येसु ओर्कु इल्हा जवाब हीतोर. “नना मीकु निजम वेहांतन, ओक्कला मीकु बतले अनमानम हिलाकोंटा पेनदापोर्रो विस्वासम मनानय्ते, नना बल्हा अंजिर मरातुन कीतनो अल्हा मिमेटगुडा किया परांतिर. अचोने आयो इद गुट्टातुन, ‘इग्गेटाल तेदसि समुद्रमते होंचि अर्रा,’ इंचि इनानय्ते, अद होंचि समुद्रमते अर्रंता. 22 मिमेट विस्वासमतोनि पारतनाते बतल तल्किना अद मीकु दोर्कार,” इत्तोर.
पेद्दाल्क येसुना अदिकार तल्कतुर
(मरकुस 11:27-33; लूकाल 20:1-8)
23 पजा येसु गुळिते होळियसि पेनदा पोल्लें कराहसेके मननेंके, अगा पेद्दा पेर्मालोर आनि यहुदिल्कुना पेद्दाल्क ओनगा वातुर. वासि, “निमे ई कबाह्क बद अदिकारमते कीसंतिन? नीकु ई अदिकारम बोर हीतोर?” इंचि पूसकीतुर.
24 अस्के येसु ओर्क इल्हा जवाब हीतोर. “ननागुडा मीकुन उंदि सवाल पूसकींतन, मिमेट जवाब हियानय्ते, नना बद अदिकारमते इव कबाह्क कीसंतन इत्तद वेहंतन. 25 अय्ते वेहट, योहानुंक बापतिस्मा हियाना अदिकारम बगाटाल दोर्कता? स्वर्गमताला हिलाकोंटे मनकालोराहेंदाल दोर्कतना?” इत्तोर.
अस्के ओर ओरे इल्हा वळ्ककुनालय दल्गतुर. “ओक्कला स्वर्गमताल दोर्कता इंचि मनम इनानय्ते, ‘योहानुन बारि विस्वासम किय्यिर?’ इंचि इनानुर. 26 ओक्कला मनकालोराहेंदाल दोर्कता इनानय्ते, लोकुल्कुना वेर्रे! बारित्ते योहान पेनदा कबुरतोर आंदुर इंचि लोकुल्क नम्मंतुर.” 27 अदुनहाटीं ओर, “माक एर्का हिल्ले,” इंचि इत्तुर.
अस्के, “अल्हा अय्ते, इव कबाह्क बद अदिकारमते कीसंतनो, ननागुडा मीकु वेहोन,” इंचि येसु इत्तोर.
इव्वुर मर्कुना वेसुडि
28 केंजट, नना उंदि सिन्ना वेसुड वेहंतन, दान केंजसि मिमेट बतल इनकुंतिरो वेहट. वरोर मनकंक इव्वुर मर्क मत्तुर. उंदि मल्का आ मनकल ओना पेद्दा मर्रिनगा होंचि, “कोको, निमे इय्याला अंगुर बगिचाते होंचि कबळ कीम,” इंचि वेहतोर.
29 अस्के आ पेद्दा मर्रि “नना होनोन” इत्तोर गानि पज्जो ओर विचारम कीसि बगिचाते होत्तोर.
30 पजा आ मनकल ओना इंकावरोर मर्रिनगा होंचि, “कोको, इय्याला निमे अंगुर बगिचाते होंचि कबळ कीम” इंचि वेहतोर. अस्के आ मर्रि, “सरे दांतन बाबा!” इत्तोर, गानि ओर होनेन हिल्लोर. 31 अय्ते आ इव्वुर मर्कनाल बा मर्रि बाबोना पोल्ले केंजताप? इंचि येसु ओर्कुन पूसकीतोर. अस्के ओर, “पेद्दा मर्रि केंजतोर,” इंचि इत्तुर.
“नना निजम वेहंतन, बोगामोताह्क आनि कर वसुल कियानोर मीकन्ना मुन्ने पेनदा राज्येमते दांतुर. 32 योहान मीकु सत्तेमता हर्रि हुप्सालय वातोर, ओन मिमेट नम्मा हिल्लिर. गानि बोगामोताह्क, कर वसुल कियानोर बारे ओन नमतुर, इद मीकु एर्के. अय्नागानि मीवा मनसु बदलांचि योहानुन नम्मालय मिमेट तयार आया हिल्लिर,” इंचि येसु इत्तोर.
बटाइतोना वेसुडि
(मरकुस 12:1-12; लूकाल 20:9-19)
33 पजा येसु इल्हा इत्तोर. केंजट, इंकुंदि वेसुडि वेहांतन, वरोर मनकल मत्तोर. ओर उंदि अंगुर तोटा कीतोर. आ तोटा सुट्टु गूरे दोहाचि तोटाता लोप्पेन अंगुर पंडिना पानकम तेंडालय उंदि पोक्का तव्सि गानगु तयार कीतोर. दाना दग्गेरेने कावेलहाटीं उंदि मंडा वाटतोर. पजा तोटातुन वेरेतोर्क बटाइक हीसि, वेरे देसेम होत्तोर. 34 अंगुर पंडिं कोय्याना वेला वाता, अस्के पालुनाहाटीं ओना दासुल्कुन बटाइतोरहेके लोहतोर. 35 अस्के बटाइतोर दासुल्कुन दोर्कापीसि, वरोन तंतुर, वरोन हव्कतुर, वरोनपोर्रो बारे बंडां हुक्तुर. 36 इद केंजसि बगिचाता मालक इंका एक्को दासुल्कुन लोहतोर. ओरतोनिगुडा बटाइतोर मोदाला कीतापे कीतुर. 37 आकिरते, “नावा मर्रिन बेस कदर कियानुर,” इनकुंचि ओना मर्रिन ओरहेके लोहतोर.
38 गानि बटाइतोर, ओना मर्रि वायानद हूळसि, “ईर अय्ते वारसदार आंदुर, दट ओन हव्किसि, ओना जाय्दाद मनम एतकुनकोम,” इंचि ओर ओरे इनकुत्तुर. 39 पजा ओन दोर्कापीसि तोटाता पलाते ओसि हव्कतुर. 40 अय्ते आ तोटाता मालक वायानय्ते, आ बटाइतोर्कुन बतल कियानुर?
41 ओर येसुन इत्तुर, “असोंटा दुस्टुल्कुन तंचि-तंचि हव्कानुर आनि बोर अय्ते पंटा पेय्स्तस्के ओन्क वेलापोर्रो तूस हींतोरो, ओन्क बटाइक हिय्यानुर,” इत्तुर.
42 पजा येसु ओर्कुन इल्हा इत्तोर. “मिमेट दर्मसास्त्रमते बस्केन हदवा हिल्लिरा? बद बंडातुन अय्ते मिस्त्रिल्क कबळ्क ओज्जो इंचि हय्सा हिल्लुर, अदे बंडा सेंकु मूलाता पुनादि बंडा‡पुनादि बंडा लोन दोहकामुन्ने लोन गट्टिगा मननाहाटीं लोतुक बंडातोनि पुनादि दोहांतुर. इगे पुनादि बंडा येसु आंदुर. आता. इद सामि कीता कबळ आंद, इद मना नदरते इचंत्रमाता कबळ आंद,” इत्तोर.✡बजन संहिता 118:22-23 43 “मिमेट निजम इत्तिर. केंजट, दाना अर्तम इल्हा मंता. पेन मीकु हियना स्वर्ग राज्येमतुन तेंडसि, मीवा जेगाते दाना पोल्लेपोर्रो तिरियना वेरे जाति लोकुल्कुंक हींता. 44 बोर अय्ते इद बंडापोर्रो अर्रंतुर, ओर तुकडां-तुकडां आयनुर, गानि अद बंडा बोरपोर्रो अय्ते अर्रंता, ओर पिच्चि-पिच्चि आयानुर,” इंचि इत्तोर.
45 पेद्दा पेर्मालोर्क आनि परिसिल्क येसु वेहता वेसुडिं केंजसि, येसु ओरा बारेमतेन वळ्कसंतोर इंचि एरपाट कीतुर. 46 पजा ओर येसुन दोर्का पियालय हूळतुर, गानि लोकुल्कुन हूळसि वेरियतुर. बारित्ते लोकुल्क येसुन पेनदा कबुरतोर आंदुर इंचि नमतुर.
*21:5 सियोनुना मिय्यळ्क इत्ते येरुसलेम सहरता रहिवासि. बारित्ते येरुसलेम सहर सियोन इनना गुट्टापोर्रो मत्ता अदुनहाटीं येरुसलेम सहरता लोकुल्कुन सियोनुना मिय्यड (रहिवासि) इंतुर.
✡21:5 जकर्याह 9:9
†21:9 होसन्ना इद पोल्ले पेनदा स्तुति कियनाहाटीं यहुदि लोकुल्क वापर कींतुर.
✡21:9 बजन संहिता 118:25-26
✡21:16 बजन संहिता 8:2
‡21:42 पुनादि बंडा लोन दोहकामुन्ने लोन गट्टिगा मननाहाटीं लोतुक बंडातोनि पुनादि दोहांतुर. इगे पुनादि बंडा येसु आंदुर.
✡21:42 बजन संहिता 118:22-23