14
येसुन हव्कना आयडिया कींतुर
(मत्तयाल 26:1-5; लूकाल 22:1-2; योहान 11:45-53)
1 रोंडु रोजकुना पजा दाटसि होनना पंडुगु आनि होयवा हारिना पंडुगु आयाना मत्ता. अस्के येसुन दोकाते दोर्का पीसि हव्ककोम इंचि पेर्मालोर्क, दर्मसास्त्रम कराहना गुरुल्क आयडिया कीसेक मत्तुर. 2 गानि, “पंडुगु रोजकुना लोप्पो हव्का मनि, अल्हा कीते लोकुल्क गडबड किया परांतुर,” इंचि ओर इनकुत्तुर.
येसुना तलापोर्रो अत्तेरनिय वडियमळ
(मत्तयाल 26:6-13; योहान 12:1-8)
3 अद वेलाते येसु बेतानिया नाटे मुन्ने कुस्टरोगमते आसि मत्ता सिमोनुना लोते गाटो तिनालय उद्दिस मत्तस्के, उंदि मुर्तळ तेल्लाटा बंडा गुर्गिते जटामासि* जटामासि पोर्रोलता उंदि सेंट मरा. मराताल तयार कीतद, पिव्वर आनि वेल्ले दरातद अत्तेरनिय पीसि वाता. अद गुर्गिता बुच्चातुन पेयाहचि येसुना तलापोर्रो वडियता. 4 अदुन हूळसि, अगा मत्तोर्क इच्चुर्कु होंग वासि, “इद अत्तेरनिय अट्टिदे बारि नासडेम कीतिन? 5 इदुन अम्सि मत्ते मूड नुह्कुना एक्को एंडि रूपें (देनारि) वायवह्कु, अवुन गरिब लोकुल्कुंक हिय्या वायवह्कु,” इंचि दान तेराहतुर. 6 गानि येसु ओर्कुन, “दीन बतल इनमट, मिमेट दीन बारि तकलिप कीसंतिर? इद नावाहाटीं बेसे कीता. 7 गरिब लोकुल्क मीवातोनि बस्केळ्क मनंतुर आनि मिमेट बस्के इनकुत्ते अस्के ओर्क बेस किया परांतिर, गानि नना मीवातोनि बस्केळ्क मन्नोन. 8 नावा मेंदुल्तुन बोंदा दोस्साका मुन्नेने अद मुर्तळ नाक निय होकता. अद किया परतच्चोन कीता. 9 नना मीक निजम वेहासेक मंतन. पूरा दुनियाते बगाबगाय्ते पेनदा बेसता कबुर वेहमळ जर्गंतनो, अगा इदुना मतिते, इद कीता कबाटा बारेमते वेहानुर,” इंचि इत्तोर.
इस्करियोत नाटेना यहुदल येसुन पीसि हींतन इंचि ओप्पकुनमळ
(मत्तयाल 26:14-16; लूकाल 22:3-6)
10 अद आता पजा, पन्नेंड सिस्युल्कुनाल वरोर इस्करियोत नाटेना यहुदल येसुन पीसि हियालय पेर्मालोर्कनगा होत्तोर. 11 अद केंजसि ओर कूस आतुर आनि ओन्कु कोत्तां हींतोम इंचि पोल्ले हीतुर. अदुनहाटीं ओर येसुन पीसि हियालय मोका हूळसेक मत्तोर.
सिस्युल्कु पंडुगुना गाटो तयार कियमळ
(मत्तयाल 26:17-25; लूकाल 22:7-14,21-23; योहान 13:21-30)
12 होयवा हारिना पंडुगुना मोदाटा रोजुने, दाटसि होनना पंडुगुना गोर्रे पोरिन मोक्कु हियुंदुर. अदे रोजुने ओना सिस्युल्कु, “मोमोट बगा होंचि नीवाहाटीं दाटसि होनना पंडुगुना गाटो तिनालय तयार कीकोम इंचि नीवा मनसु मंता?” इंचि ओन पूसकीतुर. 13 येसु ओना इव्वुर सिस्युल्कुन केय्सि, “मिमेट सहरते होंट. अगा वरोर मनकल अळ्कते येर पीसि ओयानेंके कलियंतोर, ओना पज्जोने होंट. 14 ओर बद लोन अय्ते होळियंतोर, अदे लोता मालकुनतोनि, ‘नना नावा सिस्युल्कुनतोनि दाटसि होनना पंडुगुना गाटो तिनना अर्रा बगा मंता? इंचि गुरु पूसकीतोर,’ इल्हा इंटु. 15 ओर मीकु मिद्दे पोर्रोटा पेद्दा अर्रा सजांचि तयार कीसि मत्तद हूप्सानुर, अगाने पंडुगुना गाटो मनाहाटीं तयार कीम्टु,” इंचि इत्तोर. 16 सिस्युल्कु अगटाल पेय्सि सहरते होत्तुर, ओर बल्हा वेहतोर अल्हेने अगा हूळतुर आनि ओर दाटसि होनना पंडुगुना गाटो तयार कीतुर. 17 पोळ्द होत्तारिते, येसु ओना पन्नेंड मंदि सिस्युल्कुनतोनि अगा वातोर. 18 ओर गाटो तिंचेके मत्तुर अस्के येसु ओर्कुन, “नना मीक निजम वेहसेक मंतन, मीवा लोप्पोटाल वरोर नाकुन पीसि हींतोर, ओर नावातोनि उद्दिस गाटो तिंचेके मंतोर,” इंचि इत्तोर. 19 अद केंजसि ओर्क वेल्ले दुक्कम अनपिस्ता, ओर वरोन पजा वरोर, “ओन नना आंदुना?” इंचि येसुन पूसकियालय दल्गतुर. 20 येसु ओरतोनि, “ओर पन्नेंड मंदिताल वरोर आंदुर, ओर नावातोनि गिन्नेते हारि मुळाह्चि तिनानोरे. 21 बारित्ते, मनकना रूपमते पुटतोना बारेमते दर्मसास्त्रमते रासि मत्ता परकारामे ओर हांतोर. गानि बोरय्ते ओन पीसि हींतोरो, आ मनकल पुट्टका मत्तेने ओनाहाटीं बेस आसि मनवळ,” इंचि इत्तोर.
सिस्युल्कुनातोनि आकिरता मल्का गाटो तिनमळ
(मत्तयाल 26:26-30; लूकाल 22:14-20; 1 कुरेंति 11:23-25)
22 अल्हा ओर तिंचेके मनेंकेने, येसु हारितुन येततोर, पेनदुक दन्यवाद कीसि तुकडां कीतोर. अवुन सिस्युल्कुंक हीसि, “येतसि तिंट, इद नावा मेंदुल आंद,” इंचि इत्तोर. 23 मर्रा ओर, उंदि तालिते अंगुर पानकम येततोर, पेनदुक दन्यवाद कीसि ओर्क हीतोर. अदुन ओर अंटुर उट्टुर. 24 पजा “इद करारता नावा नेत्तुर आंद, इद नेत्तुर वेल्लेटोराहाटीं पोंगागोटमळ जर्गता. 25 नना मीक निजम वेहसेक मंतन, पेनदा राज्येमते पूना रीतुने अंगुर पानकम उन्नाना रोजुनदाका, मर्रा बस्केने अंगुर पानकम उन्नोन,” इंचि वेहतोर. 26 ओर अंटुर उंदि स्तुति पाटा पार्सि, जैतुन मराकुना गुट्टातेके होत्तुर.
पत्रु अबद्दम वळ्कंतोर इंचि येसु वेहमळ
27 अल्हा होंचेके मनानेंके येसु ओर्कु, “मिमेट अंटुर नाकुन होळसि वितकिर, बारित्ते दर्मसास्त्रमते, ‘नना गोर्रें मेहानोन हव्कंतन, गोर्रें बेंदवहेके पाय्सि वित्तंतां,’ इंचि रासि मंता. 28 गानि, नना जीवाते तेदता पजा, नना मीकन्ना मुन्ने गालिलते दांतन,” इंचि येसु ओर्क वेहतोर. 29 अस्के पत्रु येसुन, “अंटुर नीकुन होळसि वित्तना गानि नना नीकुन होळसि वित्तोन,” इंचि इत्तोर. 30 येसु ओन, “नना निजम वेहासेक मंतन, इय्याला नर्कळ्क रोंडु मल्कां गोगोळ कूसाका मुन्ने, निमे नाकुन मूड मल्कां ‘एरपाट किय्योन’ इंचि इनकिन,” इंचि इत्तोर. 31 गानि पत्रु इंका जोसने, “नीवातोनि नाक हायना वेला वायाना गानि नना नीकुन एरपाट किय्योन इंचि बस्केने इन्नोन,” इंचि इत्तोर. अद केंजसि, कळमतोर इंका पत्रु इत्तापे इत्तुर.
येसु गेत्सेमनितगा पारतना कियमळ
32 अगटाल ओर गेत्सेमनि इनना जागाक होत्तुर. अगा येसु ओना सिस्युल्कुनतोनि, “नना पारतना कियानादाका इग्गेने उद्दिस मंटु,” इंचि वेहतोर. 33 वेहचि पत्रुन, याकोबुन आनि योहानुन ओनतोनि पीकुत्तोर, येसु अद वेलाते वेल्ले दुक्कमते, परेसानिते मत्तोर. 34 येसु ओर्कुन, “नावा जीवा दांता बारे इत्ताप नाक दुक्कम आसेक मंता. मिमेट इगेने आगटु, तेल्विते मंटु,” इंचि इत्तोर.
35 इच्चुर मुन्ने होंचि बोकबोर्लें अर्सि पारतना कीतोर, “आया पर्ते इद तकलिपता वेला तप्सि होन्नि. 36 बाबा! नावा बाबा, नितोनि अन्नि आया परांता, इद तकलिपता वाटीतुन लक्कु कीम. गानि नावा इच्चा मत्ताप आयो, नीवा इच्चा मत्तापे आयि,” इंचि इत्तोर. 37 अगटाल मल्सि वासि मुव्वुर सिस्युल्कु मींडसि मत्तद हूळतोर. पजा सिमोन पत्रुन, “सिमोनु, मींडसेके मंतिना? उंदि गंटामेडगुडा तेल्विते मंदा पर्रिना? 38 परिक्साते अर्रा मनि इंचि तेल्विते मंचि पारतना कीम्टु, नना वेहताप कियालय आत्मा तयार मंता गानि मेंदुल कमजोर मंता,” इत्तोर. 39 अस्के येसु मर्रा मल्सि होंचि मुन्नेटालेहकेने वळ्कसेके पारतना कीतोर. 40 मर्रा मल्सि वासि हूळते, ओर मींडसेकेने मत्तुर. ओरा कळ्कुंक मत्ता वासि मत्ता, ओर्क येसुंक बतल जवाब हियना तेळिया हिल्ले. 41 येसु मूळो मल्का ओरगा वासि, “इंका मींडसेके, आराम कीसेकेने मंतिरा? इंदके वेल्लेने आता, मनकना रूपमते पुटतोन पापि लोकुल्कुना कय्दे अप्पजेपमळ जर्गंता. 42 तेदट, दाकोम! नाकुन दोकाते पीसि हियानोर दग्गेरेने एवतोर,” इंचि इत्तोर.
येसुन पीसि हियमळ
(मत्तयाल 26:47-56; लूकाल 22:47-53; योहान 18:3-12)
43 येसु वळ्कसेकेने मंतोर, अच्चोटेने पन्नेंड सिस्युल्कुना लोप्पोटोर वरोर यहुदल वातोर. ओनतोनि पेर्मालोर्क, सास्त्रम कराहना गुरुल्क, यहुदि पेद्दाल्क लोहाचिता लोकुल्कुना पेद्दा मंदा ओर कसेह्कु, दुड्डुक पीसि वातुर. 44 येसुन पीसि हियानोर, “नना बोनय्ते बुर्रांतन, ओरे आ मनकल आंदुर. ओन जगर्ताते पीसि ओम्टु,” इंचि मुन्नेने ओर्क वेहचि मत्तोर. 45 अदुनहाटीं ओर वातारित्तेने येसुनगा होंचि, “रब्बि!” इंचि ओन बुर्तोर. 46 अस्के ओर ओना पोर्रो कय वाटसि, ओन पीतुर. 47 अच्चोटेने अगा दग्गेरे नित्तिसि मत्तोरगाटाल वरोर ओना कसेर तेंडसि, पेद्दा पेर्माना वरोर दासुना केव नेम्मानाल हीतोर. 48 येसु ओर्कुन, “नना दोंगन इनकुंचि मिमेट नाकुन पियालय कसेह्कु, दुड्डुकु पीसि वातिरा? 49 नना अय्ते रोजे गुळिते कराहचेके मीवातोनि मनुंदुन, अस्के नाकुन पिया हिल्लिर. गानि दर्मसास्त्रमते नावा बारेमते रासता पोल्लें पूरा आयाना इंचि, इल्हा जर्गता,” इंचि इत्तोर.
50 पजा अंटुर सिस्युल्क येसुन होळसिसि पटादुळिं विततुर. 51 वरोर लेय्या मनकल ओना मेंदुल्क सिराप चादर हुटकुंचि येसुना पज्जो होंचेके मत्तोर. लोकुल्क ओनगुडा पीतुर, 52 गानि ओर चादर होळसिसि कुळ्केंगे वीततोर.
यहुदि पेद्दाल्कुना मुन्ने येसुन निपिच्मळ
(मत्तयाल 26:57-68; लूकाल 22:54-55,63-71; योहान 18:13-14,19-24)
53 ओर येसुन पेद्दा पेर्माना लोन ओतुर. अगा अंटुर पेर्मालोर्क, यहुदि पेद्दाल्क, दर्मसास्त्रम कराहना गुरुल्क जमा आतुर. 54 आनि पत्रु लक्कुटाले येसुना पज्जो-पज्जो पेद्दा पेर्माना लोता दाराते होत्तोर. अगा सिपायिल्कुनातोनि तडमितगा सेका कासेक उद्तोर.
55 अगा पेर्मालोर्क आनि पंचादितोर अंटुर येसुंक हामुरता सिक्सा हियानाहाटीं, ओनकु अड्डम गवाइ पह्कतुर, गानि ओर्क दोर्का हिल्ले. 56 बारित्ते येसुंक अड्डम वेल्लेटुरे अबद्दम गवाइ वेहतुर, गानि ओरा गवाइ वरोनद वरोंक कलिया हिल्ले. 57-58 अस्के इच्चुर लोकुल्क नित्तिसि, “मनकलोर्क दोहता गुळितुन कुलाह्चि, मूड रोजकुने नना इंकुंदि गुळि दोहंतन, गानि अद मनकलोर्क दोहतद आयो, इननेंके मोमोट केंजतोम,” इंचि येसुंक अड्डम अबद्दम गवाइ हीतुर. 59 गानि इवनेगुडा वरोना गवाइ वरोंक कलिया हिल्ले.
60 अस्के पेद्दा पेर्मल नड्डुम नित्तिसि येसुन, “ईर नीकु अड्डम बल्हा-बल्हा गवाइ वेहासेक मंतुर? निमे बतले जवाब हीयिना?,” इंचि पूसकीतोर. 61 गानि ओर चुपचाप मत्तोर, बतले जवाब हिया हिल्लोर. मर्रा उंदि मल्का पेद्दा पेर्मल येसुन, “निमे कदरगला पेनदा मर्रिन किरिस्तुना?” इंचि पूसकीतोर. 62 इत्तस्के येसु, “हो, ननाने आंदुन. आनि मिमेट, मनकना रूपमते पुटतोन बलमगला पेनदा तिना बाजुंक उद्दिस मत्तदुन हूळकिर आनि मब्बुना तेर्पेना पोर्रो उद्दिस वायानद मिमेट हूळकिर,” इंचि ओनकु वेहतोर. 63 अस्के पेद्दा पेर्मल सतता कपडिं हराहकुंचि, “मनाकु इंका गवाइक बतल कियालय गावाले? 64 ईर पेनदुन अपमानम कीतद मिमेट केंजतिर, इंदके मीवा बतल विचारम मंता मिमेट वेहट,” इंचि पेर्मल इत्तोर. ओर अंटुर, “ईर हामुर सिक्सता लायक मंतोर,” इंचि सिक्साता हुकुम हीतोर. 65 अस्के इच्चुर येसुनपोर्रो उस्कतुर, आनि इंका इच्चुर बारे ओना कळ्कुन मुच्चिसि तंतुर आनि “निमे बविस्य वेहानोनाते, नीकुन बोर तंतुर वेहा,” इंचि इत्तुर. कावेल कियानोरगुडा ओन सेंपापोर्रो तंतुर.
येसुन एरपाट किय्योन इंचि पत्रु इनमळ
66 अव अन्नि आयानेंके पत्रु हिळु दाराते उद्दिस मत्तोर, अस्के पेद्दा पेर्मानगा पासि कबळ कियानद उंदि मुर्तळ वाता. 67 आनि पत्रु तळमि सेका कासेक मत्तद हूळसि, “निमेगुडा नासरेत नाटेना येसुनतोनि मत्तिन गदा!” इंचि इत्ता. 68 गानि पत्रु अद पोल्लेतुन ओप्कुना हिल्लोर. “निमे बतल इंचंतिनो, नाक तेळियो, नना एरपाट किय्योन,” इंचि पलाता गलमातगा होत्तोर, अच्चोटेने गोगोळ कूसता. 69 अद पासि कबळ कियाना मुर्तळ पत्रुन हूळसि, “ईर तप्पाकुंटा ओरा लोप्पोटोरे वरोर आंदुर,” इंचि अद मर्रा उंदि मल्का अगा नित्तिसि मननोरतोनि इत्ता. 70 गानि पत्रु मर्रा ओप्कुना हिल्लोर. गडसेम मत्तारिते अगा नित्तिसि मत्तोर पत्रुन, “निजमे निमे ओरा लोप्पोटोने आंदिन, बारित्ते निमेगुडा गालिल राज्येमतोन आंदिन,” इंचि इत्तुर. 71 अस्के पत्रु ओर्कुन, “नना ओट्टु तिंचि वेहसेक मंतन, नावा पोल्ले अबद्दम आते नाकु सापनेम दल्गि! मिमेट बोना बारेमते वळ्कसंतिरो, आ मनकन नना निजम एरपाट किय्योन,” इंचि इत्तोर. 72 अस्केने गोगोळ इंकुंदि मल्का कूसता. आनि पत्रुंक येसु मुन्नेने वेहचि मत्तोर, “गोगोळ रोंड मल्कां कूसाका मुन्ने, निमे मूड मल्कां नाकुन एरपाट किय्योन इंचि इंतिन,” इंचि येसु मुन्नेने वेहता पोल्ले मत्ति वाता. मत्ति वासि वेल्ले दुक्कमते पत्रु अळालय दल्गतोर.