1 पजा, उंदि ताकतवर दूता मब्बु तेर्पेतुन मुच्‍कुंचि स्वर्गमताल हिळु रेय्‍सि वायानद नना हूळतन. दाना तल्‍लापोर्रो सिंगिड मत्‍ता. मोकोम पोळ्‍दुनलेसीं आनि काल्क तळमिता कंबालेसीं मत्‍तां. 2 विच्‍चिसि मत्‍तद उंदि सिन्‍ना पुस्तकम दाना कय्‍दे मत्‍ता. अद दाना तिना कादुन समुद्रमपोर्रो, आनि रोड्‍डा कादुन बारे बूमिपोर्रो इरता. 3 पजा सिंहम मोत्‍कुत्‍ताप पेद्‍दा आवाजते मोतकुत्‍ता. अस्‍के एडुं मल्कां उरुमताप गड्‍डेल इंचि आवाज वाता. 4 आ एडुं मल्कां गड्‍डेल इत्‍ता आवाज वातस्के, अवुन नना रासानदे मत्‍ता, अस्‍केने स्वर्गमताल उंदि लेंग, “एडुं मल्कां उरुमता आवाजताल केंजता पोल्‍लेन रासमा, अवुन मक्‍किचि इर्रा,” इंचि इत्‍तद नना केंजतन. 5 समुद्रमपोर्रो आनि बूमिपोर्रो काल्क इरसि नित्‍तिसि मत्‍ता दूता, स्वर्गमताहेके तिना कय हाहतद नना हूळतन. 6 पजा अद दूता, बोर अय्ते स्वर्गमतुन आनि अव्टे मनना अन्‍निटवुन, बूमितुन आनि अव्टे मनना अन्‍निटवुन, समुद्रमतुन आनि अव्टे मनना अन्‍निटवुन तयार कीतोर, बस्‍केळ्‍क जीवाते मनना आ पेनबाबाना पोरोलते ओट्‍टु तिंचि इल्‍हा इत्‍ता, “इंका आल्सेम आयो.”

7 गानि एडुंगो दूता दाना तूताकोम बस्के अय्ते उह्कारो, अस्‍के पेन दाना सेवाकुल्कु आता कबुरतोर्कुंक वेह्‍चि मत्‍ता परकारम, दाना मर्ममता पोल्‍लें पुरागा आयनुं. 8 स्वर्गमताल वाता बद लेंगुन अय्ते नना केंजसि मत्‍तानो, अदे लेंग मर्रा नाकुन, “होन! होंचि समुद्रमपोर्रो आनि बूमिपोर्रो काल्क इरसि नित्‍तिसि मनना दूताता कय्‍दे, विच्‍चिसि मत्‍ता पुस्तकमतुन तेंडकुन,” इंचि इत्‍तद नना केंजतन. 9 अस्‍के आ दूतातगा होंचि, “नीवा कय्‍दे मनना अद सिन्‍ना पुस्तकमतुन नाकु हीम,” इंचि इत्‍तन. अस्‍के अद नाकुन, “इदे दीन पीसि तिन्‍नु. इद नीवा पीटुन अय्ते कयमुल कींता, गानि नीवा तोड्‍दुक मात्रम तेनेलेसीं तिय्यगा दल्‍गंता” इंचि इत्‍ता. 10 अस्‍के आ पुस्तकमतुन दूताता कय्‍दाल तेंडकुंचि तित्‍तन. तित्‍तस्के अय्ते ना तोड्‍दुक अद तेनेलेसीं तिय्यागेन दल्‍गता गानि पीर मात्रम कयमुल आसोत्‍ता. 11 पजा आ दूता नाकुन, “मरुंदि मल्का निमे होंचि हरेक बासा वळकानोर्कुंक, राजुल्‍कुंक, वेल्‍लेन लोकुल्‍कुंक आनि दुनियाता अन्‍नि देसेल्‍कनोर्कुंक, वायाना कालमते ओरपोर्रो बतल जर्गानद मंतानो, अदुना बारेमते बविस्यवानि वेहा” इंचि इत्‍ता.