1 मर्रा नना सियोन इनना गुट्‍टापोर्रो पेनदा गोर्रे पोरि नित्‍तिसि मत्‍तद हूळतन. अगा दानतोनि उंदि लक्‍सा नल्‍पै नालुं वेय्‍कुना (1,44,000) मंदि मत्‍तुर. ओरा कपालमपोर्रो गोर्रे पोरिना आनि दाना बाबाना पोरोल रासि मत्‍ता 2 नना स्वर्गमताल उंदि इसोंटा आवाज केंजतन गदा, अद पोंगाना एता वेल्‍लेन वर्दानालेसीं आनि बागा मब्बु उरुमनालेसीं मत्‍ता. अद आवाज टांबुरा नेकिसते बल्हा केंजा वांतनो अल्हे केंजा वासेक मत्‍ता. 3 आ उंदि लक्‍सा नल्‍पै नालुं वेय्‍कुना मंदि राजगद्‍देता मुन्‍ने, नालुं जिवरासिना मुन्‍ने आनि पेद्‍दाल्कुना मुन्‍ने पूना पाटा पारसेके मत्‍तुर. बूमिपोर्रोटाल पेन अस्‍कुत्‍ता लोकुल्‍कुनाल ईर तप्‍पा बोरे आ पाटा पारा पर्राहिल्‍लुर. 4 ईर अंटोरगुडा मरमिं आयवोर, मुर्ताह्कुनाल लक्‍कु मंचि सतातुन पवित्र इरतोर आंदुर. गोर्रे पोरि बगा-बगा अय्ते होनुंदु ईर अंटोर दाना पज्जो-पज्जो होनानोर आंदुर. ईर अंटोरगुडा पेन आनि गोर्रे पोरिनाहाटीं मोदाटा पलम आयगोम इंचि अस्‍कुत्‍तोर आंदुर. 5 ओरा तोळ्‍दाल बस्‍केन आबद्‍दम पोल्‍ले पेय्‍सा हिल्‍ले, ओर बेकसुर लोकुल्‍क आंदुर.

6 अद आता पजा नना पेनदा इंकुंदि दूतातुन मब्बुना नड्‍डुमताल परियसेक मननद हूळतन, दानागा बूमिपोर्रो मनना अंटोर्क, हरेक जातितोर्क, हरेक बासा वळ्कानोर्क, अंटोर लोकुल्‍कुंक आनि दुनियाता अन्‍नि देसेल्‍कुना लोकुल्‍कुंक वेहालय बस्‍केळ्‍क पिस्सना पिस्वर बारेमता बेसता कबुर मत्‍ता. 7 अद दूता पेद्‍दा आवाजते, “पेन न्‍यायम कियाना वेला दग्गेर्क एवता. अदुनहाटीं दानकु वेरियटु, दाना महिमा कीम्‍टु. स्वर्गमतुन, बूमितुन, समुद्रमतुन आनि एता ऊटान तयार कीता पेनदा आरादना कीम्‍टु” इंचि इत्‍ता. 8 अद आता पजा इंकुंदि दूता वासि, “नासडेम आता, नासडेम आता, पेद्‍दा बेबिलोन सहर नासडेम आता, अद अन्‍नि जातिना लोकुल्‍कुंक दाना बोगमतनमता होंग वायानसोंटा कल्‍लु उह्ता” इंचि इत्‍ता. 9-10 पजा इंकुंदि मूडोव दूता वासि, “बोरे आयिर अद जिवरासितुन आनि दाना बोम्मातुन मोळ्‍किसि, ओना कपालमपोर्रो आयि हिलाकोंटे कयपोर्रो आयि दाना चिन्‍हाता सिक्‍का वाटकुंतोर, ओरगुडा तालिते वळियसि मत्‍ता पेनदा होंगुना पिव्‍वर कल्‍लु उनानुर, उंचि पवित्र दूतन मुन्‍ने, गोर्रे पोरिन मुन्‍ने रमा-रमा पोत्‍तना तळमिते आनि गंदकमता सिक्‍साते अर्रानुर. 11 अल्हा ओर वेयनेंके पेय्‍सना पोया बस्‍केळ्‍क पोर्रो तेदसेकेन मनंता. बोर अय्ते आ जिवरासितुन आनि दाना बोम्मातुन मोळ्‍कंतुर, दाना पोरोलता चिन्‍हाता सिक्‍का वाटकुंतुर ओर नर्का-पिय्यल तकलिपतेने मनंतुर,” इंचि इत्‍ता. 12 अदुनहाटीं पेनदा आदेस परकारम ताकानोर आनि येसु सामिना पोर्रो विस्वासम कियाना पेनदा लोकुल्‍क तिप्पल्कुने ओप्के पियमळे गावाले. 13 अस्‍के स्वर्गमताल उंदि आवाज, “इल्‍हा रासा, बोर अय्ते सामिन विस्वासम कीसि हातुर, ओर इंदके नसिबतोर आंदुर,” इंचि नाक केंजावाता. “हो! निजमे, ओरा कस्‍टमताल ओर्क आराम दोर्कंता. ओर कीता कबाह्‍क ओरतोने दांतां,” इंचि आत्मा इत्‍तद केंजावाता.

14 पजा नना हूळतस्‍के, नाक तेल्‍ला मब्बु तेर्पे दिसता. आ तेल्‍ला मब्बु तेर्पेपोर्रो मनकना रूपमते पुटतोनलेसीं वरोर उद्‍दिस मत्‍तोर. ओना तल्‍लापोर्रो बंगारमता किरिटम आनि ओना कय्‍दे वेल्‍लेन करा-करा मत्‍ता उंदि हेटेळ मत्‍ता. 15 इंका उंदि दूता पेनदा गुळिताल पेय्सि, मब्बु तेर्पेपोर्रो उद्‍दिस मत्‍तोन, “बूमिपोर्रोटा पंटा कोताक वासि अदुन कोय्याना वेला एवता अदुनहाटीं निमे नीवा हेटेटे अद पंटातुन कोय्या” इंचि जोरसे वेहाता. 16 अस्‍के तेल्‍ला मब्बु तेर्पेपोर्रो उद्‍दिस मनानोर ओना हेटेळ तिरहातोर, तिराहचि बूमिपोर्रोटा पंटातुन कोयमळ जर्गता. 17 अस्‍के पेनदा इंकुंदि दूता स्वर्गमते मनना गुळिताल पेय्सता. दानागा गुडा वेल्‍लेन करा-करा मत्‍ता हेटेळ मत्‍ता. 18 अस्‍के गद्‍देताल पेनदा इंकुंदि दूता वाता. अद दूताक तळमिता अदिकारम हीसि मत्‍ता. इरगा करा-करा मत्‍ता हेटेळ पीसि मत्‍तोनु पेद्‍दा आवाजते, “बूमिपोर्रो मनना अंगुर पंडिना पंटा पंडता अदुनहाटीं नीवा इरगा करा-करा मत्‍ता हेटेटे अंगुर गुत्‍तिं कोय्या” इंचि इत्‍ता. 19 अस्‍के आ दूता दाना हेटेटे, बूमिपोर्रोटा अंगुर पंडिना गुत्‍तिं कोय्‍सि, पेनदा होंगु इनना अंगुर पंडिना गानगुने वाटसीता. 20 पजा सहरता पलाते मत्‍ता गानगुनगा गानगु पियमळ जर्गता. अद गानगुताल नेत्‍तुर पोर्रो वाता. अद नेत्‍तुर इच्‍चोर पेय्सता गदा, गुर्राल्कुना मोसोटुन दोहाना पट्‍टानच्‍चोर एत्‍तु आनि मूड नुह्कुना किलोमिटर पोंगसेक होत्‍ता.