रोम
रोमि विस्वासुल्‍कुनाहाटीं पौलुसना सिट्‍टि
इद सिट्‍टिता बारेमते गिचचो परिचयम
रासतोना पोरोल: पौलुस
रासता कालम: इसवि सन 58
पौलुस इद सिट्‍टि रासाका मुन्‍ने रोम सहरते होना हिल्‍लोर. अदुनहाटीं इद सिट्‍टि रासि अगाटा विस्वासुल्कुंक ओर ओना सतता परिचयम वेहचंतोर. अयना अगाटा विस्वासुल्‍कुनाल इच्‍चुर विस्वासुल्‍क ओन्क एरपाट मत्‍तुर. अय्ते पौलुसुंक ओरगा होंचि कोन्‍नि रोजकु ओरतोनि मंचि, ओर्क येसु किरिस्‍तुना बारेमता बेसता कबुर वेहचि पजा अगटाल इसपानिया इनना देसेम होनना पिलान मत्‍ता.
दुनियाते मनना अन्‍नि जातिना लोकुल्‍क उंदच्‍चोने पापम कीसि मंतुर. पेनदा मुन्‍ने नित्‍तना इत्‍ते अंटोरगुडा नीतिमंतुल्क आयापींता, अस्‍केन पेनदा मुन्‍ने नित्‍ता परांतुर. बोर अय्ते येसु किरिस्‍तुनपोर्रो विस्वासम इर्रंतुर पेन ओर्कुन नीतिमंतुल्क कीसि, पूना पिस्वर हींता. बच्‍चोन तकलिप्क-कस्‍टाल्‍क वायिनागानि ओप्के पीसि मनालय येसु किरिस्‍तु ओना पवित्र आत्माहेंदाल ताकत हींतोर.
इद सिट्‍टिता आकिर-आकिरते, मना पिस्वर पेनदा सेवाहाटींगे मंदना, विस्वासुल्‍क अंटोर पावरमते बेस कलियसि मंदना, मना दंटाता विस्वासुल्‍क हर्रि तप्‍सि होनाकोंटा ओर्कुन बेस हूळकुनना. इल्‍हा अंटोर विस्वासुल्‍क कलियसि पिस्ते वेल्‍लेन सांति-समादानम दोर्कंता. इसोंटा पोल्‍लें पौलुस रासतोर.
बगा बतल मंता
परिचयम आनि मुक्य उद्‍देसम 1:1-17
यहुदिर्क, यहुदि आयवोर्क इव्‍वुर्कगुडा मुक्‍ति अवसरमे 1:18–3:20
यहुदिर्क, यहुदि आयवोर्क इव्‍वुराहाटीं पेनदा मुक्‍तिता हर्रि 3:21–4:25
किरिस्‍तुना लोप्पो पूना पिस्वर 5:1–8:39
पेनदा पिलानते इस्राएल लोकुल्‍क 9:1–11:36
किरिस्‍तुन विस्वासम कीतोर बल्हा पिसगोम 12:1–15:13
मुन्‍नेटाहाटीं पिलानकु आनि जोहार 15:14–16:27
1
पौलुस रोमि विस्वासुल्कुंक सतता परिचयम कींतोर
नना पौलुस, येसु किरिस्‍तुना दासुन*दासु ईनकु कूलि, बूति, वेला बतल मन्‍नो, बस्‍केळ्‍क मालकुना सेवा कीसेके मनांतोर. आंदुन. नना मीकु इद सिट्‍टि रासेक मंतन. येसु किरिस्‍तुना कबाह्‍क कियालय पेन नाकुन प्रेरितप्रेरित इच्‍चुर्कुन पेरसि किरिस्‍तुना बारेमते वेहालय लोह्‍चीतोर्कुन प्रेरितुल्क इंचि इंतुर. इंचि पेरता. पेरसि दाना बेसता कबुर वेहालय लोह्ता. पेनबाबाल हींतन इत्‍ता इदे बेसता कबुरता बारेमते पेनदा कबुरतोर मुन्‍नेने पवित्र दर्मसास्‍त्रमते रासि इरतुर. इद बेसता कबुर, मनकना रूपमते पुटसि वाता पेनदा मर्रिना बारेमते मंता. ओर दाविद राजाना वंसंमते पुटतोर. गानि मना सामि येसु किरिस्‍ते पेनदा मर्रि आंदुर इंचि हुप्‍सालय पेन दाना पवित्र आत्माता ताकतहेंदाल ओन हातोरा लोप्पोटाल मर्रा जीवाते तेहता.
अंटोर लोकुल्‍क ओन विस्वासम कियना, ओर वेहताप ताकना इंचि पेन नावापोर्रो कुर्पा हुपिच्‍चि नाकुन येसुनहेंदाल प्रेरित इंचि निलाहता. येसु किरिस्‍तुना लोकुल्‍क आयनाहाटीं केयतोरव्टे मिमेटगुडा मंतिर.
रोम सहरते मनना मीकु अंटोर्क ई सिट्‍टि रासि नना बतल वेहासेक इत्‍ते, पेनदुक मिमेट इत्‍ते वेल्‍लेन पावरम. इंका अद मीकुन दाना पवित्र लोकुल्‍क आयालय केयता. मना पेनबाबाल आनि येसु किरिस्‍तु सामिनहेंदाल मीकु कुर्पा, सांति दोर्कि.
पौलुस पेनदुक पारतना कींतोर
मोदाला नना मीकु वेहानद बतल इत्‍ते, मीवा विस्वासम बारेमते पूरा दुनियाक तेळियसि होत्‍ता. इदुन मति कीसेक मीवा अंटोराहाटीं येसु किरिस्‍तुनहेंदाल पेनदुक दन्यवाद कींतन. पेनदा मर्रिना बारेमता बेसता कबुरतुन वेहासेक, नावा पूरा मनसुनाल नना पेनदा सेवा कीसेक मंतन. 10 नना पारतना कियानस्के बस्‍केळ्‍क मीकुन मति कींतन. दीनकु आ पेने गवाइ मंता. पेनदा इच्‍चा मत्‍ते, ई मल्का अयना मिहगा वायना हर्रि दोर्कि इंचि इल्‍हागुडा नना पेनदुक पारतना कीसेक मंतन. 11 सामिनाहेंदाल नाकु दोर्कता आत्माता वराल्कुन मीतोनि पंचकुनना इंचि नावा इच्‍चा मंता. दीनहेंदाल मिमेट पेनदा बक्‍तिते गट्‍टिगा बेर्सकिर, अदुनहाटीं नना मिहगा वायालय हूळसंतन. 12 इत्‍ते, मीकु-नाकु मनालोप्‍पो मत्‍ता विस्वासमताहेंदाल मनम वरोंक-वरोर प्रोत्‍साहन कीकुनना इंचि नावा मनसु मंता.
13 विस्वासुल्‍कुनिटा! नना मीकु वेहानद बतल इत्‍ते, यहुदि आयवा लोकुल्‍कुंक बेसता कबुर वेह्‍चि ओर्क सहायम कीतन, अस्‍के ओर ओरा विस्वासमता पिस्वरते बेस बेर्सतुर. अल्हेन मिमेटगुडा मीवा विस्वासमता पिस्वरते बेस बेर्सना इंचि नना ऊके-ऊके मिहगा वायालय हूळुंदुन, गानि इदवेरादाका बतलन्‍ना-बतल अड्‍डम वासेक मत्‍ता, इद पोल्‍ले मीकु तेळियना इंचि नना वेहासेके मंतन.
14 युनानि बासा, युनानि रीति-रिवाजकु तेळियतोर, तेळियवोर लोकुल्‍कुंक आनि करियतोर्क, करियवोर्क इल्‍हा अंटोर्के पेनदा पोल्‍ले वेहना जिम्मेदारि नावा पोर्रेन मंता. 15 अदुनहाटीं रोम सहरते मनना मीकगुडा नना बेसता कबुर वेहालय तयार मंतन.
16 विस्वासम कियना अंटोर्कुंक, इत्‍ते मुन्‍ने यहुदिल्कुंक पजा युनानि लोकुल्‍कुंक मुक्‍ति हियालय ई बेसता कबुरते पेनदा ताकत मंता. अदुनहाटीं नना पेनदा बेसता कबुर वेहालय सिग्गु अर्रोन. 17 बारित्‍ते पेनदा मुन्‍ने मनकल नीतिमंतुड बल्हा आंतोर इत्‍ता पोल्‍ले बेसता कबुर मनाकु वेहंता. सुरुवनाल आकिरदाका विस्वासमतेन इद आया परंता. “नीतिमंतुल्क विस्वासमतोनि पिस्संतुर,” इंचि दर्मसास्‍त्रमते रासि मंता.
अंटोर पापम कीतोरे आंदुर
18 बेसता कबुर अंटोर लोकुल्‍कुंक एविच्‍चना अव्‍सरम बारि मंता इत्‍ते, सत्‍तेम हर्दे ताकवा लोकुल्‍क कराब कबाह्‍क कीसि सत्‍तेमतुन दबांचि इरतुर. निजम पेन हिल्‍ले इत्‍ताप ताकसि, तप्‍पुड कबाह्‍क कीतुर. अदुनहाटीं पेन ओरपोर्रो स्वर्गमताल दाना होंगुन हुप्‍संता. 19 निजमाता पेन दाना गुनाल्‍कुन अंटोर लोकुल्‍कुना मुन्‍ने हुपिस्ताहाटीं इव अन्‍नि पोल्‍लें ओर्क एर्के मंतां. 20 बल्हा इत्‍ते, इद दुनिया पुटतस्केटाल पेन तयार कीता दुनियातुन हूळते, दाना बस्‍केने दिसुवा गुनम, बस्‍केळ्‍क मनना ताकत मनाकु दिसंता. अदुनहाटीं पेनदुन एरपाट किय्‍योम इंचि मनकालोर इना परुर. 21 ओर पेनदुन अय्ते एरपाट कींतुरे, गानि पेनदुन बल्हा अय्ते तल्‍सकुनागोम अल्हा तल्सकुन्‍नुर इंका दाना कदरगुडा किय्युर. अल्हा किय्यका ओर अट्‍टि विचाराल्क कीसि ओरा मनसुने हीकटा कीकुत्‍तुर. 22 “मोमोट तेल्विगल्‍लोरम,” इंचि वेहकुंचि ओर बुद्‍दि हिल्‍वोरलेसीं आतुर. 23 बस्‍केळ्‍क नासडेम आयाकोंटा मंदना महिमागल्‍ला पेनदुन ओर मोळ्‍कका, दाना जेगाते नासडेम आयना मनकानव, पिट्‍टेनव, जिवरासिनव आनि तरासुनलेह्का बेंगना जिवरासिना बोम्मां कीसि मोळ्‍कालय दल्‍गतुर.
24 अदुनहाटीं ओरा मनसुने मत्‍ता बोगम विचाराल्कुन पूरा कीकुनालय पेन ओर्कुन होळसीता. अस्‍के ओर वरोना मेंदुल वरोंक कदर हिलाकोंटा बोगमतनाल्क कीतुर. 25 पेनदा बारेमता सत्‍तेम पोल्‍ले आबद्‍दम आंद, इल्‍हा इन्कुंचि ओर्कुन तयार कीता पेनदुन मोळ्‍कका, अद तयार कीतवुन पेन इंचि मोळ्‍कालय दल्‍गतुर. गानि अवुन तयार कीता पेने बस्‍केळ्‍ताहाटीं तल्‍सकुननालायक मंता, आमीन. 26 अदुनहाटीं पेन ओर्कुन ओरा मनसुंक वाता सिग्गु हिल्वा कबाह्‍क कियालय होळसीता. अस्‍के मुर्ताह्क मुय्दुरतोनि मींडानद होळसि, मुर्ताह्कुनतोनि मुर्ताह्के मींडसि बस्‍केने ओप्वा कबाह्‍क कियालय दल्‍गतां. 27 अल्‍हेने मांड्‍सागुडा ओरा मुत्‍तोह्कुनतोनि मींडानद होळसि, मांड्‍सातोनि मांड्‍सा मुत्‍तो-मुय्दोनलेह्का मींडसि बोगमतनम कियालय दल्‍गतुर. इसोंटा बोगमतनम कीताहाटीं ओर्क ओरा पिस्वरते रोगाल्क-तकलिप वासि सिक्‍सागुडा दोर्कता.
28 पेनदा सत्‍तेमता पोल्‍लेतुन ओर एरपाट कियालय हूळा हिल्‍लुर. अय्ते ओर बद कबळ कियमळ बेस आयो, अदे कबळ कियालय पेन ओर्कुन होळसीता. 29 ओरा लोप्पो अन्‍नि तीरकुना कराब कबाह्‍क, पगा, आस्‍ति, सीडातनम निंडिस होत्‍ता. चुगलीं कियमळ, कळ्‍क पोतमळ, हव्‍कमळ, जगडाल्‍क कियमळ, विरोद कियमळ, नळेह कियमळ इसोंटा गुनम निंडिस ओर इंकावरोना बारेमते कराब विचारम कियानोर आतुर. 30 इंकावरोन तेंडसि पोहानोर, पेनदुन हय्सवोर, गर्रा कियानोर, पोंगुळ वळ्कानोर, कराब पोल्‍लें पुटिच्‍चनोर, तल्‍लुर-बाबोना पोल्‍ले केंजवोर; 31 बुद्‍दि हिल्वोर, हीता पोल्‍लेपोर्रो ताकवोर, जीवा नोयवोर, दया हिल्वोर आतुर. 32 इसोंटा मनकालोर्कुंक पेनदाहेंदाल हामुरता सिक्‍सा तप्‍पो इंचि ओर्क एरपाट मंचिगुडा ओर इल्हे ताकंतुर. अचोने आयका अल्हा ताकानोर्कुन “बेस ताकसेक मंतिट,” इंचि मेच्‍चकुंतुर.

*1:1 दासु ईनकु कूलि, बूति, वेला बतल मन्‍नो, बस्‍केळ्‍क मालकुना सेवा कीसेके मनांतोर.

1:1 प्रेरित इच्‍चुर्कुन पेरसि किरिस्‍तुना बारेमते वेहालय लोह्‍चीतोर्कुन प्रेरितुल्क इंचि इंतुर.