1 इल्‍हा, मना विस्वासमहेंदाल पेन मनाकुन नीतिमंतुल्क कीता. अदुनहाटीं सामि येसु किरिस्‍तुनाहेंदाल, पेनतोनि मनक सांति मंता. 2 इंदके मनम पेनतोनि कलियसि पिस्सना पिस्वरगुडा पेनदा कुर्पातेन दोर्कतद आंद. अचोने आयाका पेनदा महिमाता वेलगुने मनम उंदि रोज मनांतोम इत्‍ता आसेते वेल्‍लेन कूस मंतोम. 3 इच्‍चोने आयाका, विस्वासम कीताहेंका मनाकु तिप्‍पल्‍क वायिनागानि वेल्‍ले कुसिते मनंतोम. बारित्‍ते तिप्‍पल्‍क वातेने ओप्के पुट्‍टंता. 4 इल्‍हा ओप्के पीसि मत्‍ते मनालोप्‍पो बेसता गुनम वांता. बेसता गुनम मनाकु मुक्‍ति हियाना आसे पुट्‍टिचंता. 5 इद आसे मनाकुन नाराज किय्‍यो, बारित्‍ते पेन दाना पवित्र आत्मातुन मना पिस्वरते हीसि, अद मनाकुन वेल्‍लेन पावरम कींता इंचि हुपिस्‍ता.

6 बस्के अय्ते मनद मनम पिसागोटकुना पराकोंटा आतोम, असोंटा वेलाते मना पापि लोकुल्‍कुनाहाटीं किरिस्‍तु ओना जीवा हीतोर. 7 वरोर नीतिमंतुनाहाटीं बोरन्‍ना जीवा हिय्यालय तयार मनमळ वेल्‍लेने कस्‍टम, गानि वरोर बेसता मनकनाहाटीं बोरन्‍ना जीवा हिय्यालय तयार आया परांतुर आयावच्‍चु. 8 गानि मनम इंका पापमतेन मत्‍तोम, अस्‍केने किरिस्‍तु मनाहाटीं जीवा हीतोर. इदुना हेंदाल पेन मनापोर्रो बच्‍चोन पावरम कींता इंचि दिसंता.

9 येसु सामिना नेत्‍तुरहेंदाल पेन मनाकुन नीतिमंतुल्क कीता. अदुनहाटीं पेनदा होंगुनाल मनाकुन तप्‍पाकोंटा ओनाहेंदाले पिसागोटमळ जर्गंता. 10 उंदास्के मनम अंटोरम पेनदा पगातोरमे मत्‍तोम. अल्हा मननेंकेगुडा अद दाना मर्रिना जीवातुन हीसि मनाकुन दाना दग्गेर्क कीकुत्‍ता. इंदके अय्ते मनम पेनतोनि कलियसि मंतोम. अदुनहाटीं किरिस्‍तुना पिस्वरताहेंदाल अद मनाकुन आकिर सिक्‍साताल तप्‍पाकोंटा कापाळंता. 11 सिराप इच्‍चोने आयो गानि मना सामि येसु किरिस्‍तुनाहेंदाल मनम पेनतोनि मर्रा कलियतोम, अदुनहाटीं मनम वेल्‍लेन कुसिते मंतोम.

12 इद दुनियाते पापम आदामुनाहेंदाल वाता. पापमताहेंदाल हामुर वाता. दुनियाता अंटोर लोकुल्‍कगुडा पापम कीतुर, अदुनहाटीं अंटोर्के हामुर वाता. 13 मूसाना नियम वायका मुन्‍नेन इद दुनियाते पापम मत्‍ता. गानि अस्‍के मूसाना नियमकु मनवाहेंका पापमतुन पेन लेक्‍का किया हिल्‍ले. 14 अय्नागानि आदामुनस्केटाल अय्ते मूसाना कालमदाका मनकालोरपोर्रो हामुर राज्येम कीसेकेन मत्‍ता. आदाम पेनदा पोल्‍लेपोर्रो ताका हिल्‍लोर. लोकुल्‍क पेनदा पोल्‍लेपोर्रो ताकका ओनालेसीं पापम किया हिल्‍लुर, अय्नागानि लोकुल्‍क हायुंदुर. ईर आदाम इत्‍ते मुन्‍ने वायाना किरिस्‍तुना चिन्‍हालेसीं मंतोर. 15 गानि पेनदा वरम आनि आदामुना पापम, इव रोंड पोल्‍लेन नड्‍डुम मात्रम वेल्‍लेन परक मंता. वरोर कीता पापमहेंदाल वेल्‍लेन मंदिक हामुर वाता. गानि दानकन्‍ना एक्‍को पेनदा वरम*पेनदा वरम मना पापाल्क मापि आतां. इत्‍ते पेन मनाकु उंदि पेद्‍दा इनाम हीता. आनि कुर्पा मंता. ई कुर्पा येसु किरिस्‍तुनाहेंदाल वेल्‍लेन मंदिक दोर्कंता. 16 पेन हीता वरम आनि आदाम कीता पापमता पलम, इव रोंड पोल्‍लें उंदेतीर हिल्‍लें. बारित्‍ते आदामुना पापम अंटोरपोर्रो सिक्‍सातुन तत्‍ता. गानि मनम वेल्‍लेन पापाल्क कीसिगुडा पेन हीता वरमनाहेंदाल नीतिमंतुल्क आतोम. 17 आदाम कीता पापमताहेंदाल अंटोर हामुरता कय हिळु मंतुर. गानि इंकावरोर इत्‍ते येसु किरिस्‍तुनहेंदाल बोर्क अय्ते पेनदा वरम आनि कुर्पा दोर्कता, ओर्क अंटोर्क पेनदुक नच्‍चना नीति पिस्वर दोर्कता. 18 इल्‍हा आदाम कीता पापमताहेंदाल अंटोर लोकुल्‍कुंक सिक्‍सा दोर्कता. अल्‍हेने इंकावरोर इत्‍ते येसु किरिस्‍तु कीता बेस कबाटाहेंदाल, पेन अंटोर्क नीतिमंतुल्क आयालय उंदि हर्रि तयार कीसि ओर्क बस्‍केळ्‍क पिस्सना पिस्वर हीता. 19 वरोर आदाम पेनदा पोल्‍ले केंजवाहेंका वेल्‍लेन लोकुल्‍क पापिर्क आतुर. अल्हेन इंकावरोर मनकल इत्‍ते येसु किरिस्‍तु पेनदा पोल्‍ले केंजताहेंका, वेल्‍लेन लोकुल्‍क नीतिमंतुल्क आंतुर. 20 लोकुल्‍क बल्हा इरगा पापम कीसेक होंचंतुर अदुन ओर्क हुप्‍सनाहाटीं मूसाना नियम वाता. गानि लोकुल्‍क बच्‍चोन वेल्‍ले पापम कीसेक होत्‍तुर अचोने वेल्‍ले कुर्पा पेन कीसेक होत्‍ता. 21 इल्‍हा बारि आता इत्‍ते, बल्हा पापम हामुरताहेंदाल राज्येम कीसेक मत्‍ता, अल्हेन पेनदा कुर्पागुडा सत्‍तेमतोनि मना सामि येसु किरिस्‍तुनहेंदाल बस्‍केळ्‍क पिस्सना पिस्वरताहाटीं राज्येम कींता.