1 मना विस्वासि अक्‍कल पीबे इनानद बच्‍चोरो बेसतद आंद. अद किंकिरया नाटेना कलिसियाते सेवा कीसेक मंता. 2 अद वेल्‍लेटोर्क सहायम कीता, अल्‍हेने नाकगुडा सहायम कीता. अद मिहगा वायानय्ते, पेनदा लोकुल्‍क ओप्‍पनालायक मिमेट दान बेस हूळकुंटु. अल्‍हेने दान्क बतलन्‍ना अव्‍सरम मत्‍ते सहायम कीम्‍टु.

3 पिरिसकिला आनि दाना मुय्दो अकविलांक नावाहेंदाल जोहार वेहाटु. ओर नावातोनि येसु किरिस्‍तुना सेवा कियानोर आंदुर. 4 ओर नाकुन पिसागोटनाहाटीं ओरा जीवातुन हियालयगुडा तयार मत्‍तुर. नना ओर्क दन्यवाद कींतन. सिराप ननाने आयो गानि यहुदि आयवोरा अन्‍नि कलिसियानोरगुडा दन्यवाद कींतुर. 5 ओरा लोतगा जमा आयाना कलिसियातोर्कगुडा नावाहेंदाल जोहार वेहाटु. आसिया एरियाते अंटोर्कन्‍ना मुन्‍ने किरिस्‍तुन विस्वासम कीतोर ना दंटागाल इपेनितुस इननोंक, नावा जोहार वेहाटु. 6 मीवाहाटीं वेल्‍ले कस्‍टपळतद मरियमुंक नावा जोहार वेहाटु. 7 अंदरिनिकुस आनि युनियास ओर नावा जीवातोर आंदुर, ओर नातोनि जेलने मत्‍तुर, ओर प्रेरितुल्कुना लोप्पो पोरोल पेय्सतोर इंचि अंटोर ओर्कुन एरपाट कींतुर, ओर नाकन्‍ना मुन्‍नेने किरिस्‍तुन विस्वासम कीतुर, ओर्क नावा जोहार वेहाटु.

8 सामिन लोप्पो ना पावरमगल्‍ला अंपलितुसुंक जोहार. 9 मावातोनि कलियसि किरिस्‍तुना सेवा कियानोर उरबानुसुंक नावा जोहार, अल्‍हेने नावा पावरमगल्‍ला इस्‍तुकुसुंकगुडा नावा जोहार वेहाट. 10 किरिस्‍तुनलोप्‍पो तकलिप वायिनागानि होळसाकोंटा इमानदारते मत्‍ता अपिलेस इनानोंक नावा जोहार. अरिस्‍तुबुलुसना लोतोर्कुंकगुडा जोहार वेहाट. 11 नावा जीवातोर हेरोदियोंकु जोहार वेहाट. नरकियुसुना लोतोर बोर अय्ते सामिन विस्वासम कीतुर ओर्क जोहार वेहाटु. 12 तिरुपेना आनि तिरुपोसा इनना अक्‍काह्‍क सामिनाहाटीं कस्‍टपळंतां, अवुंक जोहार वेहाट. नावा पावरमगल्‍ला परसिस इनना अक्‍कलगुडा सामिनाहाटीं वेल्‍ले कस्‍टपळता, दान्क जोहार वेहाट. 13 बोनय्ते पेन पेरकुत्‍ता, आ रुपुस इनानोंक आनि ओना यावल इत्‍ते नावा यावानसोंटद, ओर्क नावाहेंदाल जोहार वेहाट. 14 असुकिरितुसुंक, पिलगोनिंक, हिरमेसुंक, पत्रुबासुंक आनि हिर्मोसुंक जोहार वेहाट, ओरतोनि मनना विस्वासुल्कुंकगुडा जोहार. 15 पिलोलोगुसुंक, युलियंक, नेरयुसुंक आनि ओना हेलड्‍क जोहार वेहाट, उलुम्पासुंक आनि ओरतोनि मनना पेनदा लोकुल्‍कुंक जोहार. 16 मिमेट वरोंक वरोर कलियतस्‍के पवित्र पावरमते जोहार कीम्‍टु. किरिस्‍तुना अन्‍नि कलिसियानाहेंदाल मीकु जोहार. 17 विस्वासुल्‍कुनिटा! इच्‍चुर लोकुल्‍क मिमेट करियता पोल्‍लेन हेळाहलय ई पोल्‍लेंक विरोदमते वेरे पोल्‍लें वेहचि मीलोप्‍पो वरोनद-वरोंक अर्राकोंटा कींतुर. असंटोरतोनि उसारते मंचि, ओर्क लक्‍कु मंटु इंचि नना मीकु विनंति कीसेक मंतन. 18 असंटोर मना सामि किरिस्‍तुना सेवा किय्युर, गानि ओरा पीटाहाटीं सेवा कींतुर. ओरा तिय्यटा पोल्‍लेनाहेंदाल सीदा-सादा लोकुल्‍कुन मुळहंतुर. 19 बेसता कबुरता पोल्‍लें मत्‍ताप मिमेट ताकसेक इंचि अंटोर केंजतुर, अदुनहाटीं नना वेल्‍ले कुसिते मंतन. मिमेट बेसता पोल्‍लेनहाटीं बुद्‍दितोर आसि मंटु, सेड्‍डा पोल्‍लेनहाटीं लक्‍कु मंटु इंचि नना मीकु वेहासेक मंतन. 20 मनाकु सांति हियना पेन बिराने देय्यमतुन मीवा काल्कुनगा तच्‍चि जारसि पोहंता. मना सामि येसु किरिस्‍तुनद मीवापोर्रो कुर्पा मन्‍निकांटी, आमेन.

21 नावातोनि कलियसि किरिस्‍तुना सेवा कियानोर तिमोतिनाहेंदाल मीकु जोहार. नावा जीवातोर लुकियुस, यासोन आनि सोसिपत्रु ईराहेंदाल मीकु जोहार. 22 पौलुस वेहताप इद सिट्‍टितुन नना तेरतियुस इननोन रासतन, सामिना लोप्पो मीकु अंटोर्क जोहार. 23-24 नाकुन, कलिसियातोर्कुन हेडमितोरलेसीं बेस हूळना गयुसनाहेंदाल मीकु जोहार. इद नाटेना कोत्‍तना व्यवहार कियानोर, इरास्‍तुसना हेंदाल मीकु जोहार. अल्‍हेने कवारतुस दादानाहेंदाल मीकु जोहार.

25-27 येसु किरिस्‍तुना बारेमते नना वेहता बेसता कबुर परकारम, पेन मीकुन विस्वासमते इंका गट्‍टिगा किया परांता. इद बेसता कबुर एनकटा कालमताल मर्ममते मत्‍ता. गानि इंदके पेनदा कबुरतोर रासता पुस्‍तकाल्‍कुना हेंदाल मर्ममते मत्‍ता बेसता कबुरतुन बय्यारा कियालय माकु वेहता. अंटोर लोकुल्‍क इद कबुरतुन विस्वासम कीसि, पेनदा पोल्‍लेने ताकाना इंचि पेन आदेस हीता. आ बस्‍केळ्‍क मनना उंदे तेल्‍विगल्‍ला पेनदुन, मनम येसु किरिस्‍तुनाहेंदाल बस्‍केळ्‍क महिमा कीकोम. आमीन.