तीतु
तीतुंक पौलुसना सिट्टि
इद सिट्टिता बारेमते गिचचो परिचयम
रासतोना पोरोल: पौलुस
रासता कालम: इसवि सन 60
वेल्लेन देसेल्कुने होंचि येसु सामिना बारेमता बेसता कबुरतुन कराहलय पेन पौलुसुंक आदेस हीता. पौलुस येरुसलेमते मननेंके तीतु इनना वरोर लेय्योड ओनतोनि मनुंदुर.
येसु सामि हासि मर्रा जीवाते तेदसि स्वर्गम होत्ता पजा, दग्गेर-दग्गेरा मुप्पै वर्साना पज्जो पौलुस इद सिट्टि तीतुंक रासतोर.
पौलुस आनि तीतु पेनदा बेसता कबुरतुन प्रचार कियालय केरेतु इनना सहर होत्तुर. केरेतु सहरते अंटोर विस्वासुल्क पूनोर्के मत्ताहेंका ओराहाटीं पेद्दाल्कुन निलाहनेंके बव पोल्लेना अव्सरम मंता अव अन्नि पोल्लें पौलुस इद सिट्टिते रासतोर. अचोने आयका अगा तप्पुड बोदां कराहना गुरुल्कगुडा मत्तुर. ओरा बोदानाल सततुन कापाळकुंचेंके ओर कराहना बोदान बल्हा आपाना इत्ता पोल्लेंगुडा पौलुस इद सिट्टिते रासतोर.
पेनदुन विस्वासम कीता लोकुल्क बल्हा आनि बद तरिकाते पिस्वर पिस्सना इत्ता पोल्लेंगुडा विस्वासुल्कुंक कराहनाहाटीं पौलुस तीतुंक इद सिट्टिते रासतोर. पेनदा इच्चा परकारम पिस्वर पिसानय्ते, पेनदाहेंदाल दोर्कना बस्केळ्क पिस्सना पिस्वर दोर्कंता इत्ता मेन पोल्ले इद पुस्तकमते पौलुस रासतोर.
बगा बतल मंता
जोहार आनि परिचयम 1:1-4
कलिसियाता अदिकारिल्क 1:5-16
कलिसियाते बोन्क बद बोदा कराहना 2:1-15
बोदां आनि वेर्रे वेहमळ 3:1-11
आकिरता बोदां 3:12-15
1
पौलुस तीतुंक जोहार वेहांतोर
1 नना पौलुस, पेनदा दासुन आनि येसु किरिस्तुना प्रेरित *प्रेरित इद पोरोल्क “पेन लोहचीतोर” इंचि अर्तम. येसु पन्नेंड मंदितुन पेरकुत्तोर ओरे प्रेरितुल्क आंदुर. इच्चुर्कुन पेरसि किरिस्तुना बारेमते वेहालय लोह्चीतोर्कुन प्रेरितुल्क इंचि इंतुर.आंदुन. पेन पेरता लोकुल्कुना विस्वासमतुन बेर्सागोटलय, ओर्क सत्तेमता बारेमते तेळियागोट्सि वेहालय नाकुन लोहमळ जर्गता. 2 ई सत्तेम, बस्केळ्क पिस्सना पिस्वरता आसे पोर्रो निल्सि मंता. बस्केने आबद्दम वळ्कुवा पेन इदुन हींतन इंचि वेल्लेन मुन्ने पोल्ले हीसि मत्ता. 3 बरोबर गावाले मत्ता वेलातेन पेन दाना पोल्लेन मनाकु वेहचि हुपिस्ता. इदे बेसता कबुरतुन वेहनाहाटीं मनाकुन कापाळना पेन नाकु आदेस हीसि अप्पजेपता. 4 विस्वासमते नावा समानम मनना नावा मर्रि तीतुंक इद सिट्टि नना रासेक मंतन. पेनबाबनहेंदाल आनि मनाकुन पिसागोटनोर किरिस्तु येसुनहेंदाल नीकु कुर्पा, सांति दोर्किकांटी.
केरेतु दीबेते तीतु कियना कबाह्क
5 क्रेति दीबेते, बव कबाह्क अय्ते मय्सि मंतां, अव कबाह्कुन सुदरांचनाहाटीं आनि नना नीकु आदेस हीता परकारम निमे हरेक सहरते पेद्दाल्कुन निलाहना इंचि नीकुन नना अगा होळसि वातन. 6 निलाहना पेद्दा मनकनपोर्रो बदे दोसेम मननायो, ओन्क उंदे मुत्तो मनगोम. ओना मर्क-मियाह्क विस्वासुल्क आसि ओर सिग्गु हिल्वा कराब कबाह्क कियानोर, बोना पोल्ले केंजाकोंटा मनानोर इंचि ओरापोर्रो तप्पु मनामन्नि. 7 बारित्ते आ अदिकारि पेनदा कबाटुन मुन्ने ताकसानोर आंदुर. अदुनहाटीं ओनपोर्रो बदे दोसेम मननायो, ओर जिद्दि मनकल मनामन्नि, ओर बिराना होंगुंक वायानोर आयामन्नि, ओर कल्लु उनामन्नि, जगडाल्क कियामन्नि, तप्पुड कमाइ कियानोर आयामन्नि. 8 गानि आ अदिकारि हेडमितोन बेस हूळकुनानोर आयगोम, बेस कियमळतुन पावरम कियानोर आयगोम, मनसुना आसेन आपिसि पीसि मनानोर आयगोम, ओर सादा-सिंपल मनागोम, पवित्र आनि सततुन आपकुंचि मनानोर आयगोम. 9 इंका ओन्क कराहता सत्तेम पोल्लेतुन ओर विस्वासमते गट्टिगा पीसि मनगोम. अल्हा मत्तेने ओर लोकुल्कुंक सत्तेम पोल्लें वेहचि ओर्क कराह पर्रांतोर आनि एदुर वळकानोरा तोड्डिं मुच्चा पर्रांतोर.
10 बारित्ते विसेस कीसि कतना कीतोरव्टेटाल वेल्लेटुर लोकुल्क मर्लाबळानोर, बतक ओज्जाकोन्ना वट्टिदे वळ्कानोर, दोका कियानोर वेल्लेन मंतुर. 11 ईरकुन वळ्काकोंटा कियमळे गावाले. बारित्ते ईर लोकुल्क, बव पोल्लें अय्ते कराहना आयनो, अव पोल्लें कराहचि तप्पुड कमाइ कियनाहाटीं अन्नि कुटुंबाल्कुनंता पाळ कींतुर. 12 क्रेति दीबेतोर वरोर ओरा कबुरतोरे, “केरेतु दीबेता लोकुल्क बस्केळ्क आबद्दम वळ्कंतुर, केडा जिवरासिनसंटोर, लंडु आनि तिंडितोरे,” इंचि वेहतोर. 13 ओर वेहता गवाइ निजमे आंद. अदुनहाटीं आबद्दम बोदातुन नम्मना विस्वासुल्कुंक गट्टिगा वेर्रे वेहा. अस्केन ओर सत्तेम विस्वासमते गट्टिपळांतुर. 14 यहुदिल्कुना तयार कीता वेसुडिन पोर्रो विस्वासम इर्राकोंटा, सत्तेमताल तप्सोत्ता मनकालोरा आदेसकुनाल लक्कु मनांतुर.
15 मनसु पवित्र मत्तोर्कुंक अन्नि वस्तुक पवित्रे मनंतां, गानि हेळसोत्ता मनसु आनि पेनदापोर्रो विस्वासम हिल्वोर्क मात्रम बतले पवित्र मन्नो. ओरा मनसु, मनसु वेहता पोल्ले इव रोंडगुडा हेळसोंचि मनंतां. 16 पेन माकु एरपाटे इंचि ओर वेहांतुर, गानि ओरा कियना कबाह्क हूळते, ओर पेनदुन एरपाट किय्युर इत्तद दिस अर्रंता. ओर हय्सवोर, वेहता पोल्ले केंजवोर आंदुर, ओर असल बदे बेस कबळ कियनालायक हिल्लुर.
*1:1 प्रेरित इद पोरोल्क “पेन लोहचीतोर” इंचि अर्तम. येसु पन्नेंड मंदितुन पेरकुत्तोर ओरे प्रेरितुल्क आंदुर. इच्चुर्कुन पेरसि किरिस्तुना बारेमते वेहालय लोह्चीतोर्कुन प्रेरितुल्क इंचि इंतुर.