Age Desalonaiga
Neala olelo oboba
Foloea udia dolö Godea wela ifosisi Desalonaiga nefolalo amolima beba afädë dëdëla ïasi. Amoïe mida, ilia hä, gelomäiage, ilile asigi delësila namiäiage, dëdëla ï. Ilia Godema asigi afädë negela namolöi neebe amoge, amase, boba hamola namolöi neebe amoge, Dimodia säsebe amo Foloea nabala, Godema nesegei. Amala sälahilä, Folo hï e dafidi ilibalä nelo amogi, neda gowe gadoi nelomelëlage, amase, Yesu obëgëmolö ilia nabi amoge, helësëlasila dëdëi.
Amase, Dafidilo Geloi obëgësolo amo gala, udia dolö Gelesoma asigi afädë negei baagoi amolidale nowemolömelë. Nilï made baagoi gähe sefolalebeweda, ilibalä gaalu mu baidilidaia Dafidilo Geloi gausiamolö afiamolömelëla säla, Foloea dëdëla ïasi.
Amala dëdëlahilä, Dimodia ado säi nabi amoïege, Foloea ado elö säla obëgësalea, Geleso e obëgëmäia beaha neada, dilia dihilile asigi neala gelolasila digi, ugila negela digila, walio hamosa neebe go gadola wäla, hamosamu namialola säla dëdëla ïasi.
Folola, ebalä hamoi gaalu hamolo nefolalo amolalia Desalonaiga ili helësëla säosäosa nelo
1
(Age Desalonaiga 1-3)
1 Folo Sailasa Dimodila nilïa udia dolö Geleso sosogo Desalonaiga nefolalebe dilima beba gowe dëdëla ïasisago. Nilïle Naado Godeïege, Dafidilo Geloi Yesu Gelesoïege dili nefolaleagomelë.
Ugila negelasiloge, neala dalulasiloge, dilima ïmäia hamesa neawe.
Desalonaiga ilia asigi afädë negei amogi Foloea obeägï
2 Dili sulubadela helësëla, nilïa segeyo sulubadelagi nesegela digi, dilile ëi säla Godema adola digisa aligilomelë. 3 Amala säha neada, nilïa nilïle Naado Godeïe siigi nea, dilia asigi afädë negela hamoi hamoi amoïege, boba hamola nea, hamoi baagi sëi hamosa nebegoïege, nilïle Dafidilo Geloi Yesu Gelesoma asigia sisiläfüsa nea, yöi diëgi, dofea, aso maadela, auaula nebegoïege, helësësa aligilomelë. 4 Nïe nedoo nalifila dili-e, nilïa helësësaleada, Godea dili boba hamola, hïlefalï nafolai nefolaleala helësësamelë. 5 Mida, nilïa Ado Mala Hedabi dili neebea gui gaula misi amoda, adoeamu gaula misi mademelë. Amoda geloibaläge, Eleloi Gesamibaläge, nilïle asigi afädë negei geloi amoda, dilia beala dawadigi amomelë. Nilï dilibalä nea, ugila negela hamosa nelo amoda, gomalä hamoila dihili dawadigi nebegomelë.
6 Dilia nilïle malage, Dafidilo Geloiïe malage, bëgëla hamosa aligilo. Amase, Godeïe ado mala neala gaula nelo ameada, yöi yafie beasebegi, Eleloi Gesamia dili neala obeägïlasimelë. 7 Amala hamoi ameada, Bolobinisi Masedoniamadige, Agaiamadige, udia dolö Gelesoma asigi afädë negei sulubadelama, mala hedabi hamola olei gabio. 8 Dafidilo Geloiïe ado mala dilia säla ïïa asi amoda, Masedonia segeamadile Agaia segeamadilemu made. Dilia Godema asigi afädë negeigoge, sege dibe sulubadelaea nabala daidosa maadei gabio. Ameada, nilïa ilima bu daiasela säla ïmolö helësësa mademelë. 9 Mida, nilï dili neebea maasebegi, dilia nilïma obeägïla damelë hamolahilä, gauia idogoi ameada, udia dolö sege amogi neebe amoli sulubadelaea säsäi awäha dialea. Dilia dafidi wäfalï gode amo fisila, namolöi neebe Gode dofä amoma besula, amoïe hamoi hamolo besela galai amoge, 10 amase, Godeïe malö e selesaia mosöala obëgëla misiäiala beaha nefolalebegoge, ilia säsäi awäha dialeamelë. Malö amoda Godea baagoiala nowelasi. Amoda Yesu, hobea Godeïe mihalälo besela galamolö dibe amo baagimäia, nilï sigi obëgëlo amomelë.