Agedu Desalonaiga
Ado Dëdëi Dibe Amoïe Neala Olelo Oboba
Foloea Geleso sosogo Desalonaiga nefolalo amolima beba agedu gowe dëdëla ïasi.
Foloea udia dolö Godea wela ifosisi Desalonaiga nefolalo amolima beba agedu dëdëla ïasi amoïe mida, dolö odoaea sähalea, Geleso obëgëmolö säi segeyo amoda, hä, misimelëla säla olelesa neala säsebegi, ili neala mogolasila beba gowe dëdëla ïasi. Geleso made obëgëla neëgi, afädë hamomolömelëla säi amoda gowe. Udia dolöea Godeïe ado made nabala, auaula nefolalegi, ado säla negei neadigilo dolö amo maala, hï e beaha aligilo gadoi hamomolömelë.
Amala hamomolö amo helësëlahilä, Gelesoma asigi afädë negei nefolalebe amoliada, yömolö diëgige, sëmolö diëgige, fologola made, aso maadela, namialola säla beba gowe dëdëla ïasi.
Hobeala Dafidilo Geloiïe segeyo besela galamolö
1
(Agedu Desalonaiga 1-2)
1 Folo Sailasa Dimodila nilïa udia dolö Geleso sosogo Desalonaiga nefolalebe dilima, beba gowe dëdëla ïasisago. Nilïle Naado Godeïege, Dafidilo Geloi Yesu Gelesoïege dili nefolaleagomelë.
2 Nilïle Naado Godeage, Dafidilo Geloi Yesu Gelesoeage, dilima ugila negelasiloge, neala dalulasiloge ïmäia hamesa neawe.
Yöi dibegi Desalonaiga ilia, aso maadela, gelola nelo
3 Nïe nedoo nalifila dili-e, dilia asigi afädë negei nebego, dofä bäula edela awäha nebegoïege, dihilimu boba hahamosa nefolalebego bäusa nebegoïege, dili helësëla nilïa segeyo sulubadelagi Godema nesegemolö dialea. 4 Amoïe mida, ado niia dili yölasimolöge, sëlasimolöge ïase amogida, dilia aso maadela, gelola nebegoïege, Godema asigi afädë negei amalasi namolöi neebe goïege, nilïa udia dolö Godea wela ifosisi sege elö elölagi nefolalebe amolima dilile ëi gauia adalomelë.
Gode e mogoi nea nilï mogemolö
5 Dilia hamoi amo gadola, Godea mogolafalï mogemolö amoïe, ea nilïma ulufai dialea. Godea Beaha Maadela Sigi Neebe amoïeda, dilia yöi amoli gaula neamelë. Ameada, Godea Beaha Maadela Sigi Neebea ami digamolö amoda, ea dofeala helësëmolömelë. 6 Godea mogolafalï hamolo nea. Odoaea dili neala sëlasise amoïeda, eage ili neala sëlasimolömelë. 7 Yöi gaula nebegoda, ea neala hogosa helela, dilige nilïge hele fimäia ïmolömelë. Dafidilo Geloi Yesula ïe selesaia fii geloibalä, selesaia mosöala nulo söa hïdo elöibalä maala ulufadigisolo amo gala, Godea amala hamomolömelë. 8 Udia dolö Gode baagi ïaha nefolalebe amolige, nilïle Dafidilo Geloi Yesuïe ado malama mi hamola aligilo made amolige, së ïmolömelë. 9 Ilile bidi nafade nimolö amoda, së naha namolöi namolömelë. Dafidilo Geloi neebea amige, amase, ïe geloi hïdo elöi dibea amige made namolö. Nafadeia amimu namolöi namolömelë. 10 Amala hamomolö amoïe segeyo amogida, Dafidilo Geloi maasegi, Godeïe udia dolö ema asigi afädë negei neebe amoli sulubadelaea ïe ëi gauia adala, ema obeägïsa namolömelë. Nilïa dilima ado mala säla ï amo nabala, dilia asigi afädë negei amea diliage obeägïsa namolömelë.
Ilia Desalonaiga gelolasila Godema adolasi
11 Amo helësëlahilä, nilïa segeyo sulubadelagi dilile Godema adosamu neamelë. Ea dili wei amoda, dofeala helësëmäiaïe adolasisamu neamelë. Dilia hedabi hamomolö dibe amo sulubadela hamomolöila hamesa neebe goïe, ïe geloia hamolasimäiage, asigi afädë negei nea hamosego sulubadela hamomolöila helësëmäiage, adolasisa neawe. 12 Ugila negemalola adolasisa nelo amea ugila negeseda, dilia nilïle Dafidilo Geloi Yesuïe ëi gauia adogomolömelë. Amase, eage dilile ëi gauia adogomolö. Nilïle Godeage, Dafidilo Geloi Yesu Gelesoeage, elele ugila negelasiloea amala hamomolömelë.