Uludi
Ado Dëdëi Dibe Amoïe Neala Olelo Oboba
Beba gowegi sedalu dibe amoda dofä hedabifalï dialea. Uludi eda Moaba udia salea Isilale fii sosogo afädëma fii. E neala, ea segea Moaba ami salea egoa amo baagoi. Baagosebegi, ea egoame sali amo made dïgïla awäla sigi nebegi, Naëomi e hïle Yuda fii segea obëgëi. Obëgësebegi eege Naëomi bëgëla helegela asi. Uludi eada Isilaleïe Gode neebe amo hawala sulo. Hobeala e dolö elöma filahilä, gini Debidiïe Yaye sulo. Debidi eda Isilale ilile gini dafidilo hedabi afädë nelo.
Dia Uludia hamoi sedalu gowe nideseda, dofä hedabifalï nabulömelë. Dafidida, Uludi e asigi afädë negei made sulo. Gasoda, ea Isilaleïe Godemage ïe egoame sali amomage edefademalä boba hamoi sulo. Ea mala hamoloda, Godea Isilale ilima ado säla negei ï amo, ea dofä bëgëla hamolo sulo. Amase, diliage dilile iso asigia Gode dofä boba hamosa nea, dilile damelë nefolalebe amoli boba hamosa namialo. Beba gowea gomalä ulufala olei dialea. Udia dolö wagadi made nefolalebe amolia Godeïe galu neala gaulahilä, Godeïe udia dolö nefolalebe amolibalä maala baamalola ulufai. Dolö wagadi made nefolalebe amoli afädëa mala amo gadola hamoseda, Isilale fii ilia mala hamolo amo baagila moholöi bimolömelë.
Naëomia yöi melï
1
(Uludi 1)
Elimeleïe udiala efegele äudä amolali Moaba asi
1 Isilale udia dolö beaha aligilo gini maadeia, gudi mogelo amoliamu beaha nebegi, Yuda segea ami sege eso edefademalä maala sïdë i edefade gelola misi. Amala hamosebegi dolö Yuda fii afädë Bedeleheme ami sulo amo gäheo i odoa sege näiadodi Moaba namolö bobala asi. Dolö asi amoïe udiala ïe dolö malö äudä amola ili biyidia asi.
2 Dolö amoïe ëida Elimelege, ïe udiada Naëomi, malö äudä amolele ëida Malonole Gilionole. Ili sosogoda Efalada, Yuda fiiïe gaamu edefade Bedeleheme dibea amilahilä Moaba namolö bobala asi. 3-5 Ili gäheo i nabülasi afädë gadoi ami nelo. Ami nea Elimelege baagoi. Baagosebegi Naëomila, ïe malö äudä amolali, hilido nelo. Hilido nea efegele äudä amolea Moaba udia amogi nii. Dolïsä äudä amolele ëida Obale Uludile. Ele neala ami salea Gilionole Malonole helegela ami baagoi. Egoage efegele äudä amolege baagoibua Naëomi hïdo ami sulo.
Naëomi e Bedeleheme obëgëse amo gadola Uludige bëgëi amo
6 Naëomi e ami salea nabelebe Dafidilo Geloia ïe udia dolö neala obeägïlasila dafidi esoi dilo amo fisila molö naha dialeala säi amo nabi. Amo nabalahilä efege idia didalo äudä amola ili Moaba dïgïla moholöla daiai. 7 Naëomila efege idia didalo äudä amolali segea ami sulo amo dïgïla, Yuda segea moholö afiai. 8 Afiai amo afiahalea gaso, idiafa amila Naëomia efege idia äudä amolema sähalea, Alida hali segea diemebalä samolö obëgëmalo. Alia nemage baagoi amolimage mala hedabi hamosa nelo amo gadola Dafidilo Geloiage alima hedabi hamomolömelë. 9-10 Dafidilo Geloia ali ugila negemäia. Dolö elöma fimolö mosalo. Amala hamoseda, Dafidilo Geloia ali hedabola ugila negemolömelëla säla ïahagola säla ï. Amala säla ïaha nelolahilä, Naëomia udia äudä amole helegela neala mimilahilä, ali hä samialola säla ï. Amala säi amole udia äudä amolea dïisa nea Naëomima gelolafalï sähalea, Alïda made obëgëmolö . Dïe sosogo neebea di awäsego gadola nihïlïgïla moholömelëla säi.
11 Amala säsebegi, Naëomia säla obëgësalea, Nïe nidiwi ali-e, alida wila dofä hali mosöa obëgëmäiala helësësamelë. Nebaläda alida edo nea moholö. Ali nimäia na dolö malö elö sogobamolöi gabule. Alida mosöa bahïla obëgëmalo. 12-13 Na walio gasigi dolö fila awäla malö äudä sogobalahilä amea ali nimäiale. Neda sesalebe made gabule. Ali hali segea bahïla obëgëmalo. Malö äudä amea ali nimäialahilä beaha samolöle. Elea ali nimäiala helësëla samolöle. Nïe nidiwi ali-e, Dafidilo Geloia nema edefade baagi ï amo gadola alimage amai amogi bobasësamelëla säi. 14 Amala säi amo nabalahilä elea bu elö dïi. Dïisa nelolahilä Obaea egoame sali Naëomi gaula mimilahilä, mosalo, hawiola sälahilä hï segea obëgëi. Uludia egoame sali gaula nea, neda dofä obëgëmolö mademelëla säi. 15 Amala säsebegi, Naëomia ema säla obëgësalea, Dïe disama amoda hä hïle sosogo neebeage hïle gode neebeage obëgëi amo gadola dige obëgëmalola säi. 16 Amala säsebegi, Uludia säla obëgësalea, Dia ne bahïla obëgëmalola sämabu. Di awäsego gadola ne moholömelë. Di fisebea amige ne samolömelë. Di sosogo neebe amoge ne sosogo namolömelë. Dïe Gode neebe amoge nïe Gode namolömelë. 17 Di baagosebea amige ne baagomolömelë. Baagosebea amida baumäiamelë. Baagoeamu alï neala hïdo hïdo hïdolasimäia. Na ado walio säi amo gadola made bëgëla hamoseda, Dafidilo Geloi edefade neebe amea nema yöi ïmäiamelëla säla ï. 18 Amala säsebegi, Naëomia beahamelebe, Uludia ebalä moholöla gelosebegi, ea ado säla made, 19 amilasilahilä udia äudä amole awäla Bedeleheme besela galai.
Naëomi eda edefademalä bobasëibalä maala, Bedeleheme gaamugi besela galai
Besela galasebegi, Bedeleheme udia dolö nefolalo amolia fudugilahilä udiafalï amolia sähalea, E! goda Naëomi gabule ma, nowëla säi. 20 Amala säsebegi, Naëomia säla obëgësalea, Nema Naëomila sämabu. Nema Malala sämo. Gode Edefade Sulubadelaïe Geloi neebe amea nema gamogai yafie hamola, nihïnege neala gamogalasimelë.*Naëomi nilïle ado sälada obeägïsa. Amase, Malada nilïle ado sälada, Gamogaila sämola säi. 21 Amo gala ne wila awähaleada, neda nelebo yafie nobai asi gaso, walio Dafidilo Geloia sigi obëgësaleada, memalä ne badumu misimelë. Gode Dafidilo Sulubadelaïe Geloi neebe amea yöi amo gadoi ï ameada edoïe nïe ëi Naëomila sämolö gabula säla ï.
22 Goweda Naëomi efege idia Uludile Moaba sege dïgïla obëgëla misi amoïe ado dialea. Ele Bedeleheme ami besela galasolo amo gala eladi gadoi ëida bali dafidi sagai dilo amo mi gäwila damusa nebegi besela galai.