1 Boasa e awäla udia dolö gedolo segea nogila digalo idiafa ami sulo. E fii heleia made Elimelegeïe sosogo elö säi amo maaha neebe melï. Boasaea dolö amoma sähalea, Ae, nedoo, na dima ado holöfalï afädë sädeläla di gui samolö misië säi. Dolö amo maala sebegi 2 Boasaea segea ami dolö beaha aligilo nabülasi nefolalo amoli maala fifigimalola säi. Amala säsebegi, ili maala sefolalo. 3 Ea ïe sosogo amoma sähalea, Naomi Moaba asi nelo amo bahïla misi saleamelë. Eada alïle sosogo Elimelegeïe sege nalä amo dolö afädëa nimäiala helësësaleamelë. 4 Amaimo, dia helësëmäia säla ïahago. Sege amo dia nimolö helësëseda, beaha aligilo nabülasi sefolalebe gowe ilile siigi sämo. Neda di baagia gabugi sege amo dia nimäia. Made nimolö galëda, haboila sämola säi. Amala säla ïasebegi, dolö amea säla obëgësalea, Sege amo na nimolömelëla säi. 5 Amalebe Boasaea ema sähalea, Dia Naomiïe sege nimolö galëda, Moaba udia Malonoïe udia didalo Uludige digali nimalo. Amalahilä sege amoda baagoi amoïe sosogoïe ëigi diamiäiala säi. 6 Ea ado amala sälebe dolö amea sähalea, Dofä, sege amoda nïe. Gaso, na neaseda, sege amo nïe malöïe made diamolö gabugi na made nimolö ne haboimelë. Dihï helësëse amo gadola hamomalola säi. 7 (Siiba Isilale ilile malada gowe gadola hamolo negei. Udia didaloïe ado sähaleage, amase, sege nalä nimolöïe ado sähaleage, amogi bidigi bu made sämolö wagahagola säla ulufahalea, emo usililo gila bidi nelo dolö amogali ïlo negei.) 8 Dolö amea Boasama, dia bidia nimalola säla, ïe emo usililo amo gila egali ï. 9 Amala ïasebegi, Boasaea mala gaui busa nabülasi sefolalo amolimage, udia dolö odoa maala sefolalo amolimage sähalea, Dili sulubadela sefolalebeweïe sidaia sähago. Elimelegeïe segege nelegei dafidi dilo amoge, amase, malö äudä Malonole Gilionolele segege nelegei dilo amoge Naomia beaha nelo nelebo amoda na neahawe. 10 Amase, Moaba udia Uludida Malono baagoi amoïe udia didalo sulo amoge na neahawe. Amala hamosebeweada baagosalea sege nalä dibe amoda Malono hïle ëigimu ïe sosogoïe diamiäia. Baagoi amoïe sosogo afädë sebe amoliada ïe ëi amo helësësa namiäiamelë. Na walio säi amoda diliage nabala siiage beala helësësamelëla säi. 11 Amala säsebegi, dolö nabülasi sefolalo amoliage, udia dolö bea misi sefolalo amoli sulubadelaea sähalea, Ä, nilï sulubadelaea beala helësësamelë. Udia go dïe mosöa awäseda, Dafidilo Edefadea Geloia ugila negesegi nilïle Isilaleïe naye mäu Eleselole Eleale gadoi samiäiamelë. Elea malö malei sogobai amo gadola udia goeage malö malei sogobamolömelë. Amase, dihïdida Efalada sosogo amoïe ëi sälo nea, Bedeleheme udia dolö beaha aligilo dafidilo namolömelë. 12 Dafidilo Geloia dolïsä go alima aligila malö ägüsebe ameada Yuda Damalalea malö sogobai nilïle mäu Felese sosogo gadoi di sosogo namiäiamelëla säi. 13 Segeyo amo gala Uludi nealahilä Boasaïe udia salea. Dafidilo Edefadea ele neala obeägïlasila Uludi e fagulo hagui sebe melï. Amalahilä ea dolö malö afädë neegela ägüi. 14 Udia sefolalo amolia Naomima säla ïahalea, Dafidilo Edefadeïe ëi gauia adadi. Ea di dihïdo samiäiala fisigisila made. Dïe diaye afädë di beaha namiäia ï gabumelë. Malö goeada Isilale udia dolö beaha aligilo dafidilo namolömelë. 15 Diafege udiaea dima boba hamosebegoeada dia dolö malö gifalädalïa gadoi sogobai amai galebeda, amolima boba hamolabio amoda gidogolahilä, dïe diefege idiaea dima boba hamoi gabugo. Amaimo, ea malö walio ägüi goeada di gelolasila, sigi aligila beaha aliligi awäha nea, di udia sali hamomolömelëla säla ï.

16 Naomia malö dubo amo sogobala fufuia alogola nea obëbësa nelo. Amalahilä malö amoda Naomia beaha nelo. 17 Udia ga made sefolalo amolia säla sogosalea, Naomigali dolö malö afädë sogobala ï gabuwela säi. Amala sälahilä malö amoïe ëi Obedi negei.

Hobeala Obediïe malöda, Yesi, Yesiïe malöda Debidi.

18-22 Goweda Felese sosogo awäha nea Debidi besela galai amo dialea. Feleseïe malöda Hesolono. Hesolonoïe malöda Alama. Alamaïe malöda Aminadaba. Aminadabaïe malöda Nasono. Nasonoïe malöda Salomono. Salomonoïe malöda Boasa. Boasaïe malöda Obedi. Obediïe malöda Yesi. Yesiïe malöda Debidi. Amala fifii misi dialea. Hä amo.