3
Godea nilï neala hedabolasi amea, nilïa hedabi hamomolö dialea
Geleso sosogo Gilidi neebe amolima bu helësëlasila, dia gomalä säla ïmalo. Ilia gamane sigi aligilo geloi neebe amolige, amase, gamane hamoi hamolo odoa neebe amoli hawala namiäiage, ilia hamomola säsebe amo gadola hamomäiage, säla ïmalo. Hamoi hedabi sulubadela hamomolö amo daiala namiäiage säla ïmalo. Amase, afädë baagido sämabiolage, adoea odoabalä gëgëla made, dofä nagadaialahilä, udia dolö sulubadelabalä hame negela namolö dialeala säla ïmalo.
Siiba nilïge asigi gäwi made nea, ado nabala made, nafadea nilï dahila neala, domaloea gelola hamelo nafade elö elöla yafie dilo amea, gide begei nelo. Nafademu hamomolömadige mudiamolömadige nea, habobalo nilïma nobalahilä, nilïa nihïlïmu habobaha nelo amomelë. Amala hamosamu nebegi gaso, nilïle damula aulo Godea ïe ugila negeloge, boba hamologe, nilïma ulufala olela, ea nilï damula asi. Amoïe mida, nilïa hamoi hedabi afädë hamosa nebegi made, ïe bobasëlo dilo amea, nilï damula asi gabio. Nilï nigime hëla, gähe neegela ägülasi. Amalahilä, Eleloi Gesamia nilï bedefalasila, namolö gähe ïala, ea nilï damula asi. Nilïle damula aulo Yesu Gelesoïe aulodaia nea, Godea gëla made, ïe Gesami nilïma nobalasila adugamäia nilïma söga sali. Amala hamoi amoïe mida, Godea ïe ugila negelasiloea nilïma dili asigi mogoi nebegola säi gabulahilä, asigia sisiläfüsa nea namolöi namolö amo beaha namolöïe. Ado weda dofä gelola säi dialeamelë.
Ameada, Godema asigi afädë negei nefolalebe amolia hamoi hedabi hamosamu namiäia, na mala säseweli dia gelola säla ïaha namiäia hamesamelë. Mala amoli gadoi bëgëla hamosebe amoda hedabifalï. Ameada udia dolö sulubadela ugila negemäiala hamomolö dialea. Ado memalä amogi didiämolöge, yaua mäulali aliligi misi amolile ëi säla sämolöge, gëgëmolöge, Mosesea Ado säla negei dibe amogi adoea nudumolöge, amo gadoi säsebea ami di aligila made sisigaha namialo. Amo gadoi sälo amoda udia dolö ugila negelo made, galone mademelë.
10 Afädëa Geleso sosogo nefolalebe amo mogemolöïe ado säseda, äudäla hamogila säla ïmalo. Säla ïasebe amo made nabala auaula fofolëseda, baagi ïmalo. 11 Dolö amo gadoida asigi halowei nea, hï asiala hamoi amea, e hïmu mogei neebe amoda dia dawa amomelë.
Daidasa e hä Folo neebea misialoi
12 Ademasa galë be Digigusi galë, elegi afädë na di neebea mosalamolömelë. Elegi afädë di neebea ami besela galaseda, neda Nigobolisi gaamugi ami neëgi, dihï idi hogola, besela galamolö helësëmalo. I bäu gisalea gögï mulo segeyogi, neda Nigobolisi ami namolö helësëi neamelë. 13 Abolosile, mala säla negei amo dawadigi Senasale nawesa namolö amo, ele idiafa awähalea gumusui odoa melëloea, dia ele ugila negemolö amo helësësa namialo. 14 Amase elöda, alïle udia dolö amoli gägä made negeloea, segeyo sulubadelagi hamoi hedabi hamola, udia dolö odoa gumusui nefolalebe amoli dofä ugila negelo amo helësëmäia säla ïmalo.
15 Udia dolö nebalä nefolalebe weli sulubadelaea di hawiosebego. Udia dolöea Yesuïe ëigi nilï boba hamosebe amolimage, nilïa ili hawioila säila sämalo.
Godeïe ugila negelo dili sulubadelama diamiäia hamesa neamelë.
Hä amo.