1 Yone
1 Yone sawi one mahemakapukusa someane oyapo.
Sawi one popasane Yasumo aporo hakāsa pura Yonemo popasapo. Yasu hepene yapura hisiakipoko keremisi 60 faraka, Yone sisimaraka reke sawi one popasapo. Arirakano Yone Efesase ape sumua reke, Keresoa paosa aporo hinamoane asekea reapo.
Maiya amo aporo yakai koraka toke, kotafe someane some karaka risiapo. Kotafe someane Keresoa paosa aporo hinamomo kaikia hemakapurapaka Yonemo sawi one popasapo.
1 Yone sawia some kepo parakuraka popasane oyapo.
1:1-4 Sawi popana one Yonemo kepomarekea popasapo.
1:5–2:29 Faesamo kepoane Kotipo. Aporomano faesa á puraka risike Yasumo ipi makata kotesa aina susuane kekemahokosapo. Arirakano makata watikisane kikisiraka hemakapukua risikiakosafapo. Faesane soko katosane soko tati hakása nineraka siasafapo.
3:1-24 Kotimo hokosamo namina yia himu tumurumo hemakapukua risike, koteaka siaka rakirapo. Arirakano Sataneane kekemara aporo hinamomo watikiaka rakirapo.
4:1-6 Aporomo somerakano koteaka kaikia takekea hemakapuraka, “Somerakane, Kotimo some kasare? Satanemo some kasare?” Aíyaka kepoane takekea hemakapunie.
4:7–5:4 Metaki himu tumurumo hemakapuramo kepoane Kotipo. Asiamo Kotimo hokosamo namina yia himu tumurumo hemakapupe puane siahoasireapo.
5:5-21 Yasu hauaka wo pesane aporomanomo kau maka pesapo. Arirakano wikinisimo asesasamo someane mawakapusapo. Arirakano yaiya risikiakosane Yonemo somesapo.
1
“Yasu ipi yano motosa meta Somepo,” aisane oyapo.
1 Kepomaresa maiya amo e yaiya reapo. Yaiya reramo somesane isiapo kaisiapo. Eane isiapo himo asesapo. Epo ainane soko isiapo asesapo. Eane isiapo hokonomo soko sakaisapo. Yaiya Rera Some amo kepoane e ipipo. Eane nōmo reaki poparaka makerakanapo.
2 Yaiya Rerane isu risia wo fasereperakasupo. Fasereperakano isiapo asesapo. Isiapo e asesane reaki someaka poparakanapo. Yaiya Rera kepoane soko reaki someaka poparakanapo. Fana ipi Atayaki hakāsa reane, hauaka wo kawe fasereperakasupo. Fasereperakano isiapo asesapo. 3 Isiapo asesane soko, epo somerakano isiapo kaisiane soko, nōmo reaki someaka poparakanapo. Atape ipi hokosa Yasu Kereso tetāki isiapo kataka marekea risikinapo. Isu isina yia himu hakásaraka kikinaraka arisia ayiáka, re soko isuyaki himu hakásaraka kikinaraka risikiasimo nōmo reaki somerakanapo. 4 Isu himu seseraka hemakapuramo rosaka taeana ayiáka, re soko himu seseraka hemakapuramo rosaka taehoasimo nōmo sawi one poparakanapo.
“Faesa á risikianie,” aisane oyapo.
5 Yasumo isuaki some karakano isiapo kaisiane reaki poparaka amakera oyapo. “Koti ipi namo kakaro faesa susu rekenapo. Ea katosa wakasema soko rekenafapo,” aisapo. 6 Asiamo isiapo isina aporo meta himu watikiaka reke yia someraka, “Ano Kotiyaki hakāsa kikinaraka rekenapo.” Aisa nine epo himumo watikiaka hemakapukua reasasamo epo kotafe somerapo. Epo kotafe someraka, arirakano epo makata rakirane soko kotafe rakikia anapo. Aporo asíane ipi katosa yia rekenapo.
7 Asiāne Koti faesa area ayiáka, isu soko faesa á risikino, ane Kotiaki kakaro kataka marekea risikinapo. Kataka marekea risikino, isiapo makata watikisa suane Kotimo hokosa Yasumo yapimo kosoraka mafasapo. Mafarakano asekea isu Kotiyaki hakāsa kikinaraka risike, arirakano isu isina yia soko hakāsa kikinaraka risikinapo.
“Faesa ikia kara á pukusakipoko makata watikisane rukupateraka metakarinie,” aisane oyapo.
8 Isiapo aporo metamo someraka, “Ano himu watikisa rekenafapo,” aíyaka somerakanone ane, epo ipi yia kotafe somerakanapo. Epo kakaro somerakanafapo. 9 Asiāne isiapo makata watikiaka rakisiane Kotiaki hufitaerakano Kotimo mafanapo. Makata watikisa suane kosonapo. Kotimo ainane oyapo. Epo someraka, “Makata watikisane nōmo mafanapo.” Aira Koti amo makata watikisane kakaro mafanapo. Epo aíyaka somesane metakarirafapo. Epo ipi ayiáka ereketaeraka susu rakirapo.
10 Kotimo someraka, “Re aporo hinamo suamo watikiaka rakirapo,” airapo. Arirakano isiapo aporo metamo someraka, “Nōmo watikiaka rakianafonosasamo Kotimo someane kotafe somerakae.” Aisa aporoamo Kotimo someane kaikia hemakapurafapo.