Na Ruana Kekedee Sa Paul Fua
Wane Famamana Ki 'I Korin
Tani wane famanata susuke kera saea ne sa Paul sukea wane 'i Korin ki, sulia sa Paul saea nia kai leka siada, boroi ma nia nao si dao. Nia ka kekede na fuada, ma nao nia nao si leka na. Ma wane famanata susuke kera saea ne sa Paul nao si mamana go. Ma kera ka saea ne nia nao lau lifurongo mamana sa Jesus Christ. Wane famanata susuke nai 'i Korin, kera nao lau wane eta famamana 'i Korin. Sa Paul saeda ana, “wane 'e'ete ki.” Ma fasia 11:22, kulu saitamana ne kera wane Jiu ki. Wane famanata susuke nai, kera liu musi kula fuana famanatalae. Ma wane ki folida fua famanatalae kera.
Wane famanata susuke nai, kera sasia ru ki tafau fuana falilana mamanalae sa Paul 'i Korin, fua ne kera talada wane ki kera kai alafafida ne kera fanaonao fuana wane 'i Korin, ma kera ka ngali malefo 'oro 'uria famanatalae kera.
Laona kekedee ne, sa Paul ka olisia sukee 'oro nai ki. Ma na kekedee ne nia fata 'asiana sulia sa Paul talana, ma sulia na nonifie nia ana nonina, ma manata 'aberolae nia fuana wane God ki. Nia fatainia ne nia rao nonimabe fuana God ana maurilana tafau.
Ru talingai ki laona buko ne:
Raoe sa Paul fuana wane famamana ki 'i Korin 1:1–7:16
Na kwatee fuana 'adomilana wane ki 'i Jerusalem 8:1–9:15
Sa Paul na wane ni lifurongo mamana 10:1–13:13
1
1 Nau sa Paul, ta wane lifurongo ana sa Jesus Christ sulia na kwaidorie God. Nau fainia sa Timoti na wanefuta kulu, karo kekede kau fua mulu wane God ki ne mulu to laona mae fere baita 'i Korin, ma fuana wane God ki tafau laugo ne kera to laona lofaa 'i Gris.
2 Nau ku foa fua ne God na Maa kulu ma na 'Aofia sa Jesus Christ ka kwaiofei amulu ma ka kwatea na aroaroe fua mulu.
Sa Paul tangoa God
3 Kulu tangoa God na Maa sa Jesus Christ na 'Aofia kulu. God ne na Maa ana kwaimanataie fua kulu, ma nia na ne lalina kwaigwalelae ki tafau. 4 God 'adomi kulu, kada kulu too ana 'afitaie ki, fua ne kulu kai 'adomia laugo tani wane ne kera dao to'ona 'afitaie ki. Kulu bobola fuana 'adomilana wane ki, sulia na kwai'adomie ne God kwatea fua kulu. 5 Kulu dao to'ona nonifie 'oro ki, ka dia be sa Jesus Christ nonifi. Boroi ma God kwai'adomi akulu ka baita laugo, ka dia be nia kwai'adomi ana sa Jesus Christ. 6 Kalu nonifi fua ne ka 'adomi kamulu ma ka famauri kamulu. Ana kada kalu nonifi, God 'adomi kalu, ma kalu ka 'adomi kamulu laugo, ma kalu ka fanikila kamulu. 'Urinai mulu kai bobola fuana mabetaue ana kada mulu liu ana nonifie dia laugo ne kalu liu ana. 7 Ma kalu saitamana ru ne: Ana kada mulu liu ana nonifie dia laugo ne kalu liu ana, God kai 'adomi kamulu, dia laugo nia 'adomi kalu.
Sa Paul dao to'ona 'afitaie baita laona lofaa 'i Esia
(Acts 19:23-41)
8 Wanefuta ki 'ae, kalu doria mulu kai saitamana ne 'afitaie baita ne kalu dao to'ona kada kalu to laona lofaa 'i Esia. Ana kada nai, kalu fia ne kalu kai mae, sulia na 'afitaie nai baita ka tasa. 9 Kalu kwaisae ne maurilamalu laona molagali karangi ka suina. Ma kalu saitamana ru nai ki fuli fua malu, fua nao kalu si fito'ona kalu talamalu, boroi ma kalu ka fito'ona God lalau ne saitamana taelana wane ne mae ki. 10 God ka 'adomi kalu fua ne kalu nao si mae ana 'afitaie nai ki. Ma nia kai kwai'adomi amalu laugo fua ne malimae kalu ki nao si bobola fuana saungilamalu. Kalu ka fito'ona nia kai kwai'adomi amalu 'urinai, 11 ana kada mulu 'adomi kalu ana folae kamulu ki. Nia ne, God kai kwai'adomi amalu sulia ne wane ki kera foa 'urinai fua malu ana kada 'oro ki. Nia ne, wane 'oro ki kera ka tangoa God sulia na kwai'adomie nia fua malu.
Sa Paul nao si talai garo ana wane 'i Korin ki*Tani malimae ana sa Paul, kera saea sa Paul sukea wane 'i Korin ki sulia sa Paul saea nia kai leka siada ma nia nao si dao. Nia ka kekede na fuada ru fulina nia kai leka. Ma kera ka 'uri, “Wane ne sa Paul fatalana nao si mamana go.” Ma kera ka saea ne nia nao lau lifurongo mamana sa Jesus Christ.
12 Wanefuta ki 'ae, kalu manata tango sulia kalu saitamana lea ana abulolamalu fuana wane ki tafau nia lea ma ka mamana, ma ka tasa fua mulu. Na abulolae kalu ka 'urinai nao lau sulia na liotoe ana wane ki, boroi ma sulia na kwai'adomie God fua malu. 13-14 Kekedee nau ki fua mulu, kera ngwaluda fua malingailana. Boroi ma nao mulu si saitamana lea amalu ana kada ne. Ma nau ku doria mulu kai sai lea amalu, fua ana maedangi na 'Aofia sa Jesus ka oli mai, mulu kai eele fai kalu, dia laugo ne kalu eele fai kamulu.
15 Ma sulia nau ku saitamana lea ana ne kulu kai eele fuana adalae to'okulu kwailiu, nau ku naia 'uria daolae to'omulu ana ruana kada, fua nau ku kwai'adomi amulu. 16 'I nao nau ku kwaisae ana kada nau leka 'uria 'i Masedonia, nau kai liu kau siamulu. Ma ana kada nau ku oli mai, nau kai liu laugo siamulu, fua ne mulu kai kwai'adomi aku ana lekalaku 'uria lofaa 'i Jiudea. 17 Sui boroi 'ana nau ku naia daolae ro ru fua mulu 'urinai, nau nao si dao na to'omulu. Mulu nao si kwaisae ne manatalaku tatala kwailiu ana kada 'oro ki sulia nau nao si dao siamulu. Nau nao si dia wane ana molagali ne kera fata 'uri, “Iu, nau kai sasi 'uri,” ma burina kera ka fata lalau 'uri, “Nau nao si sasi go 'uri.” 18 Na fatalaku mamana dia laugo na fatalana God ne mamana 19 sulia manatalaku dia laugo manatana sa Jesus Christ na Wele God ne kalu sa Silas fainia sa Timoti kalu 'ainitalo ana fua mulu. Ma manatana sa Jesus nao si tatala kwailiu ana kada 'oro ki. Boroi ma nia na ne wane ne saea, “Iu, nau kai sasi 'uri,” ma nia ka sasi 'urinai. 20 God famamana fata alangaie nia ki tafau ana sa Jesus Christ. Ma kulu alafafia ne sa Christ famamana na fata alangaie God. 'Urinai kulu ka tangoa God. 21 Ma God kwatea ma kalu fai kamulu laugo, kulu ka 'ado fainia sa Jesus Christ. Ma God laugo ne fili kulu, 22 ma ka alua na maetoto akulu fuana wane nia ki ana Anoeru Abu. Nia kwatea na Anoeru Abu fua kulu 'uria tolae laona mangokulu, fua ne kulu ka saitamana laugo God kai kwatea ru lea 'oro ki fua kulu.
23 Aia, God saitamana fatae nau ki mamana 'asiana. Nao nau si leka kau 'i nao siamulu 'i Korin sulia nao nau si doria balufilamulu fuana ru be mulu sasida ki. 24 Nao kalu si doria ne kalu kai gwaungai fafi kamulu ana sumailamulu ana te ki ne mulu famamana ana. Sulia kalu saitamana na famamanae kamulu ana sa Jesus nia nikila na. Boroi ma kalu doria kalu kai kwai'adomi amulu, fua mulu kai eele.
*1:11 Tani malimae ana sa Paul, kera saea sa Paul sukea wane 'i Korin ki sulia sa Paul saea nia kai leka siada ma nia nao si dao. Nia ka kekede na fuada ru fulina nia kai leka. Ma kera ka 'uri, “Wane ne sa Paul fatalana nao si mamana go.” Ma kera ka saea ne nia nao lau lifurongo mamana sa Jesus Christ.