Na Kekedee Sa Paul Fua
Wane Famamana Ki 'I Filipae
'I Filipae te fere baita ana lofaa 'i Masedonia ne ta'ena kulu saea ana kula wane Grik ki.
Ana Acts 16 nia fata sulia kada sa Paul nia 'adomia fikute wane famamana ki fuana ka tatae mai laona fere ne. Sa Paul to laona beu ni kanie ana fere baita 'i Rom ana kada nia kedea na buko ne. Laona buko ne, sa Paul doria kai saea tangolana fikute wane famamana ki 'i Filipae, sulia kera kwai'adomi ana bali ana malefo. Sa Paul doria kera kai to kwaimani faida kwailiu. Ma nia ka saea fuada kera kai to marabibi dia sa Jesus. Nia saea laugo fuada ne manatalae kera ka to ngasi ana God, sui boroi 'ana kera ka dao to'ona 'afitaie, dia ne sa Paul dao to'ona ka suina. Ma nia ka fabasu kera fasia lekalae burina famanatalae susuke. Na famanata susuke, kera wane Jiu ne saea wane ki tafau kera kai rosuli taki sa Moses ma 'ole 'ungelae (circumcision) fua kera ka faeelea God. Boroi ma, sa Paul saea kulu ka fito'ona go kwaimanie baita God. Kulu saitamana kulu 'ado lea fainia sa Jesus, ma kulu saitamana kulu ka 'o'olo na 'i maana God, sulia kulu famamana sa Christ na. Ma nia nao si mamana dia kulu rosulia taki Jiu ki.
Ru talingai ki laona buko ne:
Maurilana sa Paul 1:1-26
Kulu ka leka burina maurilana sa Christ 1:27–2:18
Na farongoe sulia wane kwaimani sa Paul ki 2:19-30
God fa'o'olosia wane ki sulia famamanae kera ki 3:1–4:9
Fatae ana tangolae ki 4:10-23
1
1 Nau sa Paul fainia sa Timoti, na ro wane ni rao sa Jesus Christ ki. Karo kekede kau fua mulu wane ki tafau ne mulu famamana sa Jesus Christ, ma mulu ka to laona mae fere baita 'i Filipae. Karo kekede laugo fuana wane kwaitalai kamulu ki fainia wane ne kera kwai'adomi ana fikute wane famamana ki laugo.
2 Nau ku foa fua ne God na Maa kia ma na 'Aofia sa Jesus Christ kai kwatea na kwaiofeie ma na aroaroe fua mulu.
Sa Paul foa fuada
3 Nau ku tangoa 'asiana na God nau fua mulu, ana kada ki tafau ne nau ku manata to'omulu. 4 Ma nau ku eele 'asiana ana kada nau ku foa fua mulu tafau, 5 sulia nau ku manata to'ona kwai'adomie ki ne mulu sasida fuaku ana raoe ana Farongoe Lea, ana safalilana na mai kada mulu famamana, leleka ka dao 'i ta'ena. 6 Ana kada nai, God nia safali ana raoe lea ne nia sasida ki 'i laona maurilamulu, ma nau ku saitamana nia kai faali'afua lau leleka ka fasuia na raoe nai ana fa dangi sa Jesus Christ kai oli mai ana. 7 Nia ka bobola ne nau ku eele 'urinai suli kamulu, sulia nau ku kwaimani amulu, ma mulu ka kwai'adomi aku fainia na raoe ne God kwatea fuaku. Kamulu kwai'adomi aku ana kada nau ku to laona beu ni kanie, ma ana kada nau ku 'ainitalo ana na Farongoe Lea ma nau ku firu susia. 8 Nau ku manata to'omulu 'asiana sulia na kwaimanie baita nau fua mulu dia laugo na kwaimanie sa Jesus Christ fua mulu. God alafafia na ru ne nau ku saea nia mamana.
9 Nau ku foa laugo fua ne na kwaimanie kamulu kai bulao daudonga. Nau ku foa fua mulu kai saitamana lea ana God, ma mulu kai saitamana lea ana abulolae ne lea ma abulolae ne ta'a, 10 fua ne mulu kai bobola fuana fililana ru lea ki ma ka 'o'olo. 'Urinai ne, mulu kai to 'o'olo ana fa dangi sa Jesus Christ kai oli mai ana. 11 Nau ku foa fua na maurilamulu ka 'o'olo tafau sulia na kwai'adomie ne sa Jesus Christ nia sasia fua mulu. Ma kada na maurilamulu nia 'o'olo 'urinai, wane 'oro ki kera kai tangoa God.
Na maurie mamana
12 Wanefuta nau ki 'ae, nau ku doria mulu kai saitamana na 'afitaie be dao to'oku ki ana kada ne, nia 'adomi lea 'asiana aku fuana 'ainitalolae ana na Farongoe Lea. 13 Sulia na wane ni omee ne kera folo 'i seki laona lume baita na kingi, ma wane 'oro 'e'ete ki, kera saitamana ga 'ada ana ne nau ku to laona beu ni kanie sulia nau na wane rao sa Jesus Christ. 14 Ma sulia laugo ne nau ku to laona beu ni kanie, ru ne ka radua 'orolana wane ki ne kera famamana 'Aofia, fua ne kera ka farongo nonira'a ana Farongoe Lea, ma nao kera si mau.
15-17 Tani wane 'ainitalo ana sa Jesus Christ sulia kera kwaifi aku. Na manatada fua 'ainitaloe ana sa Jesus Christ nao si lea. Sulia kera doria 'ainitalolae kera ana sa Jesus kwate ma kera ka talingai ka liufi nau. Kera sasi 'urinai sulia kera doria kera kai kwatea lau tani 'afitaie fuaku kada ne nau ku to laona beu ni kanie. Ma tani wane lau, kera to ana na manatae wane lea ki fuana 'ainitalolae ana na Farongoe Lea. Kera 'ainitalo ania sulia na kwaimanie kera fuaku, ma sulia kera saitamana God ne fili nau fuana susilana na Farongoe Lea. 18 Ma nia lea ga 'ana. Sui boroi 'ana na manatae wane kera ka lea naoma ka ta'a, kera 'ainitalo sulia sa Jesus Christ. Nau ku eele 'asiana, sulia kera 'ainitalo sulia sa Jesus Christ.
Ma na eele nau nao si sui, 19 sulia nau ku saitamana mulu foa fuaku, ma na kwai'adomie na Anoeru sa Jesus Christ kai luge nau fasia laona beu ni kanie. 20 Nau ku doria, ma nau ku famamana ne nao nau si sasia ta ru ne kai kwate nau kai 'eke fafia maana God. Safali mai 'i nao leka ka dao ana kada ne, nau nao si mau fuana 'ainitalolae sulia sa Christ, ma nau nao si doria ne nau kai mau. Sui boroi 'ana nau ku mauri 'ua naoma nau ku mae, nau ku doria wane ki kai tangoa sa Jesus Christ sulia ru ne nau ku sasida ki.
21 Fuana te ne wane ki ka mauri? Ma fuaku, nau ku mauri fuana raoe fua sa Jesus Christ. Ma dia nau ku mae, nia lea sulia nau kai to fainia sa Jesus Christ 'i langi. 22 Boroi ma nau si saitamana ta te ne nau ku filia. Sulia nau ku doria nau mauri 'ua, fua ne nau ku ulafu 'aku ana raoe fuana sa Christ. 23 Ma nau ku doria laugo nau ku mae, fua ne nau kai to fainia sa Jesus Christ, sulia nia lea 'asiana fuaku. Nau si saitamana te ne nau ku doria. 24 Boroi ma nia lea go ne nao nau si mae 'ua, fua nau ku 'adomi kamulu. 25 Nau ku saitamana ru nai, ma nia ne kwate ma nau ku saitamana nau kai mauri 'ua 'aku fai kamulu, fua ne nau ku fanikila na famamanae kamulu ki. Ma kada famamanae kamulu ki ngasi, mulu kai eele. 26 Kada nau oli kau siamulu, mulu kai tangoa sa Jesus Christ ka tasa sulia nau.
27 Ma dia ta te boroi 'ana ka fuli fuaku, abulolamulu kai 'o'olo ka leka sulia na Farongoe Lea sulia sa Jesus Christ. Mulu kai sasi 'urinai, ma dia nau ku leka kau siamulu naoma ka nao, nau kai rongo ga 'aku kau sulia falafala lea kamulu ki. Ma nau kai saitamana ne famamanae kamulu ki ngasi, ma mulu kai too ana te manatalae, ma te kwaidorie go fuana raoe oku fuana Farongoe Lea, fua ne wane 'oro ki kera kai famamana. 28 Nao mulu si mau ana malimae kamulu ki. Sulia ru ne fatainia na fuada, ne kera kai ngalia na kwaiketoie kera, ma mulu kai ngalia maurie firi. God kai sasi 'urinai. 29 Nau ku saea ru ne ki sulia God fili kamulu fua ne mulu kai famamana sa Jesus Christ, ma mulu kai nonifi laugo fuana. 30 'I nao mai, kamulu ada to'ona ne nau ku nonifi. Ma ana kada ne mulu rongoa kera sasi 'urinai laugo aku.✡Acts 16:19-40 Ma mulu ka nonifi laugo 'urinai.