1 Rubeni, ye wâli ifula ya Hisiraheeri. Kundu kwokwo, akateeza yishe ishoni, mu kumenyana na muka yishe. Uyo Rubeni âli agaharuurwa nga fula.*5.1 Ndondeko 35.22; 49.3-4. Si ubuhyane bwage bweꞌfula, bukahaabwa abaana ba Yusefu.

2 Umulala gwaꞌBayuda, gwo gukayiji himba ukuhima iyabo milala. Na mu kati kaabo, mwo mukalyoka umutwali. Kundu kwokwo, ubuhyane bweꞌfula, bwâli haabirwi Yusefu.

3 Uyo Rubeni, ye wâli fula ya Hisiraheeri. Bagala Rubeni, bâli Hinoki, na Paalu, na Hesirooni, na Karimi.

4 Aba mwiꞌkondo lya Yuheeri, bâli Shemaya. Shemaya naye, anabuta Googi. Googi naye, anabuta Shimeyi. 5 Shimeyi naye, anabuta Mika. Mika naye, anabuta Raya. Raya naye, anabuta Baali. 6 Baali naye, anabuta Beera. Beera ye wâli mutwali waꞌBarubeni, ikyanya bakabungisibwa mu mahanga na mwami Tigilati-Pireseeri weꞌHasuriya.

7 Abimangizi ba yaga makondo, bakatondobolwa mu kitaabo kyeꞌbibusi byoꞌmulala gwa Rubeni. Yehiyeri ye wâli mukulu. Hâli na Zakariya, 8 na Beela mugala Hazaazi mwijukulu Shema, wa mwiꞌkondo lya Yuheeri.

Yabo bandu, ngiisi ho bâli tuuziri, hâli lyokiiri i Haroweri halinde i Nebo, neꞌBaali-Mehoni. 9 Na bweꞌbitugwa byabo byâli mali yushuuka bweneene, kyanatuma bagashabukira uluhande lweꞌsheere, halinde ku ndondeko yiꞌshamba iryâli hisiri ku lwiji Hefuraati. 10 Ku kyanya mwami Sahuli âli twaziri, umulala gwa Rubeni gukagira izibo naꞌBahagaari, gwanabayita. Kwokwo, gwanagaaza ikihugo kyabo kyoshi uluhande lweꞌsheere lweꞌGiryadi, gwanatuula mwo.

11 Umulala gwa Gaadi gwâli bibikiinwi noꞌmulala gwa Rubeni imbembe yeꞌkihugo kyeꞌBashaani, halinde isheere yeꞌSaleka. 12 Iyo munda i Bashaani, umulala gwa Yuheeri gwo gwâli mukulu, hanakulira umulala gwa Safanu, noꞌgwa Yanayi, noꞌgwa Shafaati.

13 Beene wabo, ukukulikirana naꞌmakondo gaabo, kwo bâli balinda, hâli Mikaheeri, na Meshulamu, na Sheeba, na Yorayi, na Yakani, na Ziya, na Hebeeri. 14 Yabo booshi, bâli bagala Habihahiri mugala Huuri. Huuri âli mugala Yarwa. Yarwa naye, âli mugala Giryadi. Giryadi naye, âli mugala Mikaheeri. Mikaheeri naye, âli mugala Yeshishayi. Yeshishayi naye, âli mugala Yado. Yado naye, âli mugala Buuzi.

15 Mu yago makondo, Ahi ye wâli mukulu. Âli mugala Habudyeri, na mwijukulu Guuni.

16 Yabo Bagaadi bâli tuuziri uluhande lweꞌGiryadi, mu Bashaani noꞌtwaya twamwo, kiri na mu ndagiriro zooshi zeꞌSharooni. 17 Yabo bandu booshi, bakayandikwa mu bitaabo, mu butwali bwa mwami Yotamu weꞌBuyuda, na mu butwali bwa mwami Yerobwamu waꞌBahisiraheeri.

18 Umulala gwa Rubeni, noꞌgwa Gaadi, neꞌkimaanye kyoꞌgwa Manaasi, yâli mweꞌbikalage byaꞌbasirikaani bihumbi makumi gana na bina na magana galinda na makumi galindatu. Yabo basirikaani bâli hagasiri isiribo neꞌngooti, banâli beeshu mu kufwora imiheto. 19 Bakagira izibo noꞌmulala gwaꞌBahagaari, noꞌgwaꞌBayeturi, noꞌgwaꞌBanafisi, noꞌgwaꞌBanodabu. 20 Bakalangaalira Rurema, iri banamúhuuna kwo abatabaale. Amahuuno gaabo, anagayuvwa, anabiika Abahagaari mu maboko gaabo kuguma naꞌbiira baabo. 21 Bananyaga ingamiya bihumbi makumi gataanu, neꞌbibuzi magana gabiri na makumi gataanu, na bapunda bihumbi bibiri, banatwala naꞌbandu bihumbi igana imbohe. 22 Na bwo yiryo izibo lyâli lya Rurema, kyanatuma bagayita abagoma bingi bweneene, banagenderera ukutuula mu yikyo kihugo, halinde ku kyanya bakatwalwa imbohe i mahanga.

23 Abandu beꞌkimaanye kyoꞌmulala gwa Manaasi bâli tuuziri mu kihugo kyeꞌBashaani. Umuharuuro gwabo, gwanayushuuka bweneene, banashabukira uluhande lweꞌmuga, halinde i Baali-Herimooni, neꞌSeniiri, na ku mugazi Herimooni.

24 Yaba bo bâli bimangizi baꞌmakondo gaabo: Hefeeri, na Hishi, na Heryeri, na Haziryeri, na Yeremiya, na Hodavya, na Yadyeri. Yabo bimangizi booshi, bâli bikalage byaꞌbasirikaani, banâli kizi longa ulushaagwa bweneene.

25 Kundu kwokwo, banahuna imbere lya Rurema wa bashokuluza baabo. Bakayigira nga bashule mu kuyikumba imigisi yaꞌbandu ba yibyo bihugo byo Rurema akabaminikira.

26 Kwokwo, Rurema waꞌBahisiraheeri anahidika mwami Puuli weꞌHasuriya (irindi iziina lyage ye Tigilati-Pireseeri), anayiji shereeza ikihugo kyabo. Uyo mwami anabungiisa beene Rubeni, na beene Gaadi, neꞌkimaanye kyoꞌmulala gwa Manaasi, anabatwala i mahanga. Bakatwalwa iyo munda i Hala, neꞌHabori, neꞌHara, kiri na iwa lwiji Gozani. Neꞌyo munda, yo baki tuuziri halinde zeene.

27 Bagala Laawi, bâli Girishooni, na Kohaati, na Meraari. 28 Uyo Kohaati, bagala baage bâli Hamuramu, na Hishaari, na Heburooni, na Huzyeri. 29 Uyo Hamuramu, abaana baage bâli Harooni, na Musa, na Miryamu. Uyo Harooni, bagala baage bâli Nadabu, na Habihu, na Heryazaari, na Hitamaari. 30 Heryazaari akabuta Finehaasi. Finehaasi naye, anabuta Habishuwa. 31 Habishuwa naye, anabuta Buuki. Buuki naye, anabuta Hushi. 32 Hushi naye, anabuta Zerahiya. Zerahiya naye, anabuta Merayoti. 33 Merayoti naye, anabuta Hamariya. Hamariya naye, anabuta Ahituubu. 34 Ahituubu naye, anabuta Saadoki. Saadoki naye, anabuta Ahimaazi. 35 Ahimaazi naye, anabuta Hazariya. Hazariya naye, anabuta Yohanani. 36 Yohanani naye, anabuta Hazariya. Uyo Hazariya âli mugingi mu nyumba ya Nahano, irya yo mwami Sulumaani akayubaka iyo munda i Yerusaleemu. 37 Hazariya naye, anabuta Hamariya. Hamariya naye, anabuta Ahituubu. 38 Ahituubu naye, anabuta Saadoki. Saadoki naye, anabuta Shalumu. 39 Shalumu naye, anabuta Hirikiya. Hirikiya naye, anabuta Hazariya. 40 Hazariya naye, anabuta Seraya. Seraya naye, anabuta Yozadaki.

41 Uyo Yozadaki anatwalwa imbohe i mahanga, ku kyanya Nahano akatwala abandu beꞌBuyuda, naꞌbeꞌYerusaleemu, mu kukoleesa mwami Nebukandeneza.