14
Inyumba ya Dahudi neꞌmbaga yage
(2 Samweri 5.11-16)
1 Ha nyuma, mwami Hiraamu weꞌTiiro anatuma abandu, kwo bagendi yubakira Dahudi akajumiro. Anamútumira naꞌbuubasi baꞌmabuye, naꞌbeꞌmbahwa, kiri neꞌbiti byeꞌmyerezi. 2 Kwokwo, Dahudi anaba naꞌkasiisa kwo Nahano ye kamúyimika abe mwami waꞌBahisiraheeri, na kwo ye mu lumbuusa ubwami bwage. Na íbitumiri Nahano akagira kwokwo, bwo âli kuuziri Abahisiraheeri bweneene.
3 Iyo munda i Yerusaleemu, uyo Dahudi anayanga abandi bakazi bingi, anakizi buta abandi baana boꞌbutabana na boꞌbunyere. 4 Amaziina ga yabo baana, go gaaga: Shamuwa, na Shobaabu, na Natani, na Sulumaani, 5 na Hibuhaari, na Herishuwa, na Heripereeti, 6 na Nooga, na Nefegi, na Yafya, 7 na Herishama, na Beryada, na Herifereeti.
Dahudi ahima Abafirisiti
(2 Samweri 5.17-25)
8 Abafirisiti, ikyanya bakabwirwa kwo Dahudi keera ayimikwa, abe mwami weꞌkihugo kyoshi kyaꞌBahisiraheeri, banayimuka ku bwingi, gira bagendi múlooza. Dahudi, anayuvwa ngiisi kwo bagayija, anabagwana.
9 Yabo Bafirisiti, iri bakahika, banateera mu ndekeera yeꞌRefahimu. 10 Ku yikyo kyanya, Dahudi anahanuusa Rurema, ti: «Yabo Bafirisiti, ka ngendi bateera? Ka ugababiika mu maboko gaani?» Nahano anamúshuvya: «Genda! Ngababiika mwo.»
11 Kwokwo, Dahudi anagenda iyo munda i Baali-Perasimu. Neꞌri akalwisa Abafirisiti, anabahima, anadeta: «Rurema andabaala ukuhima abagoma baani, nga migezi íri mu hinga.» Kyanatuma yaho handu hagakizi detwa «Nahano ye mu hongola».
12 Balya Bafirisiti, ikyanya bakatibita, banasiga imigisi yabo. Dahudi anakyula kwo bagijigiivye.
13 Ha nyuma, yabo Bafirisiti banashubi teera mu yeyo ndekeera. 14 Leero, ikyanya Dahudi akahanuusa Rurema, Rurema anamúbwira kwokuno: «Utabateerere hano. Si ubahuluke inyuma, unagendi bateera imbere lyeꞌbiti byeꞌmiforosaadi. Haaho ho ugabayubukira kwo. 15 Mango wayuvwa ibisindo mwiꞌrango iwa biti byeꞌmiforosaadi, unayami gendi bateera. Haaho, yabo basirikaani baꞌBafirisiti, nangwanwe keera namùhimira bo.»
16 Ulya Dahudi, ikyanya Rurema akamúbwira kwokwo, anasimbaha, anayita abasirikaani baꞌBafirisiti, ukulyokera i Gibyoni halinde i Gezeeri. 17 Uyo Dahudi, anahuuzibwa bweneene mu mahanga gooshi. Na Nahano anayoboheesa abandu booshi imbere lyage.