24
Imikolwa yaꞌbagingi
1 Ulya Harooni, yibi byo biso byaꞌbagala baage. Harooni akabuta Nadabu, na Habihu, na Heryazaari, na Hitamaari. 2 Haliko ku kyanya yishe akiri ho, Nadabu na Habihu bakafwa, bátabuta. Kwokwo, beene wabo, Heryazaari na Hitamaari banasigala bagweti bagaakola nga bagingi.*24.2 Balaawi 10.1-2.
3 Mwami Dahudi anagabula bagala Harooni mwo biso-biso, ukukulikirana neꞌmikolwa yabo. Âli tabiirwi na Saadoki, wa mwiꞌkondo lya Heryazaari, na Ahimereki, wa mwiꞌkondo lya Hitamaari.
4 Mu kibusi kya Heryazaari, mwanaboneka abimangizi bingi ukuhima mu kya Hitamaari, kyanatuma bagahandula bagala Heryazaari mweꞌbiso ikumi na ndatu. Na bagala Hitamaari nabo, banabahandula mwaꞌbimangizi munaana naaho. 5 Na mu kubatengeka, banataara ikibare, gira hataboneke indoola mu kati kaabo. Mukuba, mwiꞌkondo lya Heryazaari kiri na mwiꞌkondo lya Hitamaari, mwâli abakulu boꞌbugingi ábakwaniini.
6 Umwandisi Shemaya mugala Netaneeri, wa mu mulala gwa Laawi, anabayandika imbere lya mwami Dahudi, na bakulu baage. Mu kati kaabo, mwâli umugingi Saadoki, na Ahimereki mugala Habyataari, naꞌbimangizi ba mu mbaga zaꞌbagingi, naꞌba mu mbaga zaꞌBalaawi. Aba mwiꞌkondo lya Heryazaari, naꞌba mwiꞌkondo lya Hitamaari, banakizi gomboolana, mu kutaara ikibare.
7 Ikibare kya mbere, kyanagwata Yoyaribu.
Neꞌkya kabiri, kyanagwata Yedaya.
8 Neꞌkya kashatu, kyanagwata Harimu.
Neꞌkya kana, kyanagwata Sehorimu.
9 Neꞌkya kataanu, kyanagwata Malikiya.
Neꞌkyeꞌndatu, kyanagwata Mijamini.
10 Neꞌkya kalinda, kyanagwata Hakoozi.
Neꞌkyoꞌmunaana, kyanagwata Habiya.
11 Neꞌkyoꞌmwenda, kyanagwata Yeshuha.
Neꞌkiꞌkumi, kyanagwata Sekaniya.
12 Neꞌkiꞌkumi na kiguma, kyanagwata Heryashibu.
Neꞌkiꞌkumi na kabiri, kyanagwata Yakimu.
13 Neꞌkiꞌkumi na kashatu, kyanagwata Hupa.
Neꞌkiꞌkumi na kana, kyanagwata Yeshebabu.
14 Neꞌkiꞌkumi na kataanu, kyanagwata Biriga.
Neꞌkiꞌkumi na kalindatu, kyanagwata Himeeri.
15 Neꞌkiꞌkumi na kalinda, kyanagwata Heziiri.
Neꞌkiꞌkumi na munaana, kyanagwata Hapizeezi.
16 Neꞌkiꞌkumi na mwenda, kyanagwata Petahya.
Neꞌkyaꞌmakumi gabiri, kyanagwata Yehezekeeri.
17 Neꞌkyaꞌmakumi gabiri na kiguma, kyanagwata Yakiini.
Neꞌkyaꞌmakumi gabiri na bibiri, kyanagwata Gamuli.
18 Neꞌkyaꞌmakumi gabiri na bishatu, kyanagwata Delaya.
Neꞌkyaꞌmakumi gabiri na bina, kyanagwata Maziya.
19 Yabo booshi, kwokwo kwo bâli kizi kulikirana mu kukola mu nyumba ya Nahano. Bâli kizi kola ku bwitonde, nga kwo bakashungikirwa na shokuluza wabo Harooni. Naye, Nahano Rurema waꞌBahisiraheeri, ye kamúhamuliza.
Amaziina gaꞌBalaawi
20 Hali naꞌbandi bimangizi ba mu kibusi kya Laawi:
Mu beene Hamuramu, umwimangizi ye wâli Shubaheeri. Na mu beene Shubaheeri, umwimangizi ye wâli Yedeya. 21 Na mu beene Rehabiya, umwimangizi ye wâli Hisiya. 22 Na mu beene Hishaari, umwimangizi ye wâli Selomooti. Na mu beene Selomooti, umwimangizi ye wâli Yahaati. 23 Na mu beene Heburooni, umwimangizi ye wâli Yeriya. Noꞌwa kabiri, ye Hamariya. Noꞌwa kashatu, ye Yahazyeri. Noꞌwa kana, ye Yekamehamu. 24 Mugala Huzyeri, ye wâli Mika. Na mu beene Mika, umwimangizi ye wâli Shamiire. 25 Na mu beene Mika, umwimangizi ye wâli Hisiya. Na mu beene Hisiya, umwimangizi ye wâli Zakariya. 26 Bagala Meraari bâli Maali, na Muushi na Yaziya. 27 Na mu beene Meraari, ku mugala wage Yaziya, umwimangizi ye wâli Shohamu, na Zakuri, na Hibiri. 28 Na mu beene Maali, umwimangizi ye wâli Heryazaari. Haliko ndaaye mugala ye âli busiri.
29 Na mu beene Kishi, umwimangizi ye wâli Yerameeri. 30 Bagala Muushi, bâli Maali, na Hedeeri, na Yeremooti.
Yabo booshi, bo bâli ba mu kibusi kya Laawi, ukukulikirana naꞌmakondo gaabo. 31 Nabo kwakundi banataara ikibare, nga kwo beene wabo biꞌkondo lya Harooni bakagira. Bakakitaara imbere lya mwami Dahudi, na Saadoki, na Ahimereki, naꞌbimangizi beꞌmbaga zaꞌbagingi neꞌzaꞌBalaawi. Ndaanayo ndoola bâli hiiti, mbu kirage ye mukulu, kandi iri ye muto.