4
1 E bakazi beꞌSamariya! Munyuvwirize bwija!
Si mujeziri ngana nga ngaavu zeꞌBashaani!
Munagweti mugakizi vindagaza ábagoozirwi, kiri naꞌbakeni.
Mugweti mugakizi bwira bayibalo: «Mutuleterage idivaayi, tunywe!»
2 Rurema Nahamwitu keera ashiikiza ku bweru bwage kwokuno:
«Mu siku ízigayija, abandu bagakizi mùloba, banamùshibule nga fwi kwiꞌgera.
3 Bagamùlyosa mu kaaya, mu kumùleeza ha butule bweꞌnzitiro.
Banamùshulugute imbuga, mwiꞌjagira.»
Kwokwo, kwo Nahano adesiri.
Abahisiraheeri batazi hinduka
4 Mwe Bahisiraheeri! Mugendi tanga amatuulo imweꞌmigisi i Beteeri.
Mugendererage ukukizi gatanga kiri neꞌGirigaali.
Yago matuulo giinyu goꞌkusiriiza, mukizi gatanga ngiisi shesheezi.
Na ha nyuma lya ngiisi siku zishatu, munatange neꞌkihande kiꞌkumi.
5 Muyokye imikate íri mweꞌsaama, libaagage ituulo lyoꞌkudeta kongwa.
Ha nyuma, munatangage agandi matuulo goꞌbulooze bwinyu, lyo mulonga ubulyo bwoꞌkukizi yikangaata hiꞌgulu lyago imbere lyaꞌbandu!
Mukuba kwokwo, kwo muloziizi ukukizi gira.
Kwokwo, kwo nie Rurema Nahamwinyu ndesiri.
6 «Utwaya twinyu twoshi, nie katuyogogoza niꞌshali.
Ndaahyo hyokulya hyo nꞌgamùheereza.
Kundu kwokwo, mutanangalukira.
Kwokwo, kwo nie Nahano ndesiri.
7 «Kiri neꞌnvula, nie kamùhangikira yo, myezi ishatu imbere liꞌyimbula.
Nꞌgagihangika mu kaaya kaguma, nanaginyeesa mu kandi.
Indalo nguma, zanalonga invula.
Izindi zanagibula, zanayumaguka.
8 Kyanatuma, abandu bagakizi genda mu ngiisi kaaya,
gira balooze byo bagaanywa.
Yohoo! Galya miiji ga hala, gatatwa inyoota.
Kundu kwokwo, mutakangalukira.
Kwokwo, kwo nie Nahano ndesiri.
9 «Nꞌgamùyumagukiza idaho liinyu, halinde nanaboza kiri neꞌmimbu yinyu.
Zirya ndalo, inzige zanazilya, ziba za mitiini, kandi iri za mizehituuni.
Kundu kwokwo mutakangalukira.
Kwokwo, kwo nie Nahano ndesiri.
10 Nanamùbiika mweꞌbihano, nga kwo nꞌgabibiika mu Bamiisiri kare.
Nanaminika imisore yinyu mwiꞌzibo.
Neꞌfwarasi ziinyu ziꞌzibo, nanaleka zitwalwe.
Ibaya lyeꞌbirunda, nanaleka limùdugiirize.
Kundu kwokwo mutakangalukira.
Kwokwo, kwo nie Nahano ndesiri.
11 «Nꞌgamùminika, nga kwo nꞌgaminika abandu beꞌSoodoma naꞌbeꞌGomora.
Na ábakasigala mu kati kiinyu, bâli nga mubeza gwoꞌlushaali úgwashumbuulwa mu muliro.
Kundu kwokwo mutakangalukira.
Kwokwo, kwo nie Nahano ndesiri.
12 «Inguuke zooshi zo nꞌgagwanwa namùmenyeesa, ngola ngamùleetera zo.
Kwokwo, e bandu beꞌHisiraheeri! Muyibiikage ibiringiini ukuhumaanana na Rurema winyu!»
13 Nahano ye kalema imigazi. Ye nali mu husiisa imbuusi.
Ngiisi byo ali mu ba ashungisiri ukugira, ali mu gwanwa abimenyeesa abandu.
Ali mu hindula izuuba lyoꞌmusasa, bube bushigi.
Anali mu hinyata-hinyata ku marango.
Iziina lyage, ye Nahano Rurema woꞌbushobozi bwoshi!