6
Nahano agaahana ábali mu vindagazania
1 Yayewe imwinyu, mwe mujeberiiri mu kaaya keꞌSayuni!
Yayewe neꞌmwinyu, mwe mutuuziri ku butoge ku mugazi gweꞌSamariya!
Buno, baki gweti bagamúgingika mu bwami bwinyu, munalumbuusiri.
Abahisiraheeri booshi, banagweti bagayiji mùtabaaza.
2 Mutee hikaga mu kaaya keꞌKaline, gira mulole ngiisi kwo kashereezibwa.
Mukabuli genderera halinde mu kaaya kahamu keꞌHamaati.
Ha nyuma, munamanukire mu kaaya keꞌGaati, mu Bafirisiti.
Aahago! Abandu ba mu yutwo twaya twoshi, si bo bâli mùsumbiri!
Ikihugo kiinyu, kitasumbiri ibyeꞌmwabo.
3 Ulusiku lweꞌnguuke, kundu lukolaga lugayija,
mutaloziizi ukukizi yitoneesa hiꞌgulu lyalwo.
Si ikyanya mugweti mugayifunda mu mabi,
lyo mugweti mugaluyegereza!
4 Si muli mu ba mugwejiiri ku ngingo ízilimbisiibwi naꞌmahembe geꞌnjovu,
munajeberiiri ku bitumbi biinyu biija-biija,
munagweti mugaalya inyama zeꞌbitugwa ibishishiri,
ziba zeꞌbibuzi, kandi iri zeꞌngaavu.
5 Munakuuziri ukulasa inzeeze, mu kuyimba inyimbo za busha-busha.
Munayibwini kwo muli mu yimba nga mwami Dahudi.
6 Si munagweti mugakizi gotomera idivaayi, nga ngiisi kwo musiimiri!
Munali mu kizi yishiiga amalaasi goꞌmuhongolo mwija.
Na kundu ikihugo kiinyu kikola kigaamala, si mutatwaziizi!
7 Ku yukwo, mwe mugashokola injira mu kugendi shwekwa mu mbohe.
Kulya kujeberera kwinyu, leero, lyo kugayami mala.
8 Rurema Nahamwitu ashiikiza kwokuno:
«Nga kwo nyamiragi nie Rurema,
yuku kuyikangaata kwaꞌBahisiraheeri, keera kwanyaagaza ngana-ngana!
Inyumba zaabo, kundu ziryagagi ngomu, si keera zannenuuka.
Ku yukwo, yaka kaaya keꞌSamariya, ngakabiika mu maboko gaꞌbagoma,
banakashereeze kuguma na íbikali mwo byoshi.»
9 Inyumba íshubi sigiiri mwaꞌbashosi ikumi, booshi bagaafwa. 10 Mwizo wa nakufwa, ikyanya agayiji hulusa ikirunda, anabuuze ngiisi ye angagwana mwo: «Ka hali ugundi mundu ye muliriinwi?» Anamúshuvye: «Ndaaye!»
Haaho, ulya wa mbere anamútoleranie kwokuno: «Hulika! Utangadeta iziina lya Nahano.»
11 Nahano, ikyanya agakyula naaho, inyumba zigayami yihongoleka haashi.
Kwokwo, kwo bigaaba ku nyumba zooshi, ziba nangungubanga, kandi iri niini.
12 Aahago! Keꞌfwarasi zangagirigimba ku lwajwe?
Kandi iri, kaꞌbandu bangakoleesa ingaavu mu kululima kwo? Aahabi!
Haliko mwehe, keera mwahindula ukuli, kube nga kolobwe.
Na ngiisi íbikwaniini, mwabihindula bibe bilulu.
13 Ikyanya akaaya keꞌLodebaari kakagwatwa, mwanashambaala,
mwanayihaya, ti: «Kalya kaaya keꞌKarinayimu,
si tukakagwata ku misi yitu twenyene!»
14 Haliko, Nahano Rurema woꞌbushobozi bwoshi, adetaga kwokuno:
«E Bahisiraheeri, ngola ngaleeta abagoma mu mahanga, bayiji mùteera.
Yibyo binyamahanga bigamùlibuza ngana-ngana,
ukulyokera i Hamaati, uluhande lweꞌmbembe,
halinde ku kyambu kyeꞌHaraba, uluhande lweꞌkisaka.»