8
Amabone hiꞌgulu lyeꞌkitiri íkiri mweꞌbitumbwe
1 Rurema Nahamwitu anashubi nyereka agandi mabone. Nanabona ikitiri, kiyijwiri mweꞌbitumbwe íbihiiri. 2 Anambuuza: «E Hamoosi, biki wabona?» Na naani, ti: «Mbwini ikitiri íkiri mweꞌbitumbwe íbihiiri.» Anashubiza kwokuno:
«Abahisiraheeri balyagagi nga bitumbwe íbihiiri.
Bakola bagaahanwa. Ndaganaki bayigooyera ibyaha byabo.
3 Ku yikyo kyanya, abandu bingi bagafwagaga.
Kundu bakiri mu gira ikisegengo ha kajumiro,
haliko bagaki liruuka.
Ibirunda byabo bigakizi kabulirwa bwalaafwe,
ndaanaye woꞌkudeta kiri niꞌgambo.»
Kwokwo, kwo Rurema Nahamwitu adesiri.
Rurema agaminika Abahisiraheeri
4 Munyuvwirize bwija! Si mugweti mugavindagaza abakeni,
lyo bataki be ho!
5 Munagweti mugaadeta mbu: «Ulusiku lukulu lweꞌmbaluko yoꞌmwezi, lulengage duba,
kuguma noꞌlusiku lweꞌSabaato, lyo tukizi shubi guliisa ingano, iri tunagunga abakeni!
Tugakizi gungana ku bigero. Neꞌkishingo, tugakishonia.
Ee! Ukulooza noꞌkutalooza, tugakizi gungana!
6 Si kiri neꞌshekesheke zeꞌngano,
tugazifusha mweꞌngano nyija, tunaguliise byoshi kuguma.
Tugagulaga abakeni ku biraato bibiri, kandi iri ku harija niini,
banabaagage baja biitu.»
7 Nahano agweti agashiikiza kwokuno kwiꞌziina lyage:
«Yibyo byaꞌBahisiraheeri bagweti bagaakola, ndâye biyibagire!»
8 Bwo keera mukakolaga ibitalaalwe mwene yibyo, ikihugo kigajugumbana!
Abandu hooshi, bakolaga bagabululuka mu kigandaaro.
Ikihugo kyoshi kigajungubana.
Kigakizi heema ngoꞌlwiji Niire ku kyanya kyeꞌnvula.
Ha nyuma, kinashubi yema.
9 Rurema Nahamwitu adetaga kwokuno:
«Yulwo lusiku, ngasoosagya izuuba, kanakiri kalenge-renge.
Haaho mu kalenge-renge, ikihulu kinayidike mu kihugo.
10 Isiku ziinyu ngulu, ngazihindula, zibe za kigandaaro.
Na kundu muli mu yimba ku kisegengo, halikago mukola mugaalira ku kimombo.
Mugayambala ibyambalwa byeꞌkigandaaro.
Na bwo mugaaba mukoli jengiirwi, mugakunguula amatwe giinyu.
Ku yikyo kigandaaro, mugaaba nga úwafwirwa neꞌkininga.
Ulusiku lwoꞌkushibuuka, mugajengeerwa ngana-ngana!»
11 Rurema Nahamwitu adetaga kwokuno:
«Mu siku ízigaki yija, ngaleeta umwena mu kihugo.
Yugwo mwena, gutagaaba gwa kubula ibyokulya, kandi iri miiji.
Si mugaabula amagambo ga Nahano.
12 Yago magambo, abandu bagakizi gendi galooza,
bagalyoka ku nyaaja nguma, halinde ku yabo!
Banalyoke imbembe, halinde isheere, bataganalonga.
13 «Yulwo lusiku, abanyere, kundu bagaaba banonosiri, inyoota igabayandabusa.
Igayandabusa kiri neꞌmisore mitabana kwakundi.
14 Kundu imizimu yeꞌSamariya igweti igateezania ishoni,
si bagweti bagabiika indahiro ku maziina gaayo!
Baguma bali mu kizi deta: “Nga kwoꞌmuzimu gweꞌDaani ayamiragi ho!”
Abandi, ti: “Nga kwoꞌmuzimu gweꞌBeeri-Sheba ayamiragi ho!”
Yabo bandu, bagayitimbaga haashi, batanaki vyuke.»