15
Ulwimbo lwa Musa
1 Lyeryo Musa, naꞌbaabo Bahisiraheeri booshi, banayimbira Nahano yulu lwimbo:
«Ngayimbira Nahano, bwo ye kwaniini ukuhuuzibwa bweneene.
Ifwarasi na ábali mu zigendera kwo, keera abakamiza mu nyaaja.
2 «Nahano ye misi yani.
Ye nganakizi yimbira inyimbo zoꞌbwivuge.
Yehe ye Rurema wani, ye na Rurema wa daata.
Kwokwo, ngakizi múyivuga, na ngizi múhuuza.
3 Nahano ye ndwani.
Ee! Iziina lyage, ye Nahano.
4 «Nahano keera abindikira abasirikaani ba Faraho mu Nyaaja Ndukula.
Booshi naꞌbakulu baabo bakamira mwo, kuguma naꞌmagaare.
5 Ee! Amabenga gaꞌmiiji keera gababindikira,
banaholobera ngiꞌbuye, halinde banakamira mu nyaaja.
6 «E Nahano, ukuboko kwawe kweꞌlulyo, keera kwakola ku misi ya kahebuuza.
Na ku njira yakwo, keera wasivya abagoma baawe.
7 Ku bushobozi bwawe bwaꞌkahebuuza, watindimaza abagoma baawe.
Na ku buraakari bwawe, uli mu bajigiivya nga byula.
8 Umuuka gukalyoka mu mazuulu gaawe, amiiji ganayihonga haguma.
Imidunda, yanayimanga nga bikombo.
Amabenga ga mu nyaaja, ganayuma.
9 Uyo mugoma ashuba mu yihaya, ti: “Ngabakulikira, halinde mbabindike.
Na ngabe neꞌbindu byabo, halinde inyoota imale.
Ee! Tugayomola ingooti ziitu, halinde tunabaminike naꞌmaboko giitu.”
10 Kundu bakadeta kwokwo, wanafuuha umuuka, inyaaja yanababwikira.
Banaholobera mwo nga kyuma kyoꞌrusasi, amiiji ganababindikira.
11 «E Nahano, mu biri mu yikumbwa, nyandi úli nga wehe?
Nyandi úli mwoꞌbweru bwaꞌkahebuuza?
Nyandi úli mu yobohwa mu bulangashane?
Nyandi úli mu gira ibitangaaza mwene yibi?
12 Ikyanya ukagolola ukuboko kwawe kweꞌlulyo,
ikihugo kyanamira abagoma biitu.
13 «Urukundo lwawe, lutahiiti imbeka.
Na ku njira yalwo, ugarongoora abandu baawe.
Keera wabaguluula.
Na ku bushobozi bwawe, ugabahisa ahandu haawe heeru.
14 Ikyanya ibinyamahanga bigayuvwa, bigajuguma, binafololokwe.
Abafirisiti bagagwatwa noꞌlushunguti.
15 Abatwali beꞌHedoomu, bagayoboha bweneene.
Abatungwa beꞌMohabu, bagalenga mweꞌkinyukura.
Abatuulaga booshi beꞌKaanani, imitima yabo igashenguka.
16 Bagagwatwa neꞌkyoba, noꞌlushunguti.
Yabo bandu, ikyanya bagaabona ubushobozi bwawe,
bagaaba munyerere ngiꞌbuye,
halinde abandu baawe balenge. Mukuba, keera wabaguluula.
17 E Nahano, ugabaleeta, bayiji tuula ku mugazi gwawe.
Yaho handu, ho wenyene ugatuula.
Haaho, ho ukabiika inyumba yawe nyeeru.
Ukanagiyubaka naꞌmaboko gaawe.
18 E Nahano, uyamiri uli mu twala, halinde imyaka neꞌmyakuula.»
19 Kwokwo, iri abasirikaani ba Faraho bakayitundira mu nyaaja, bali naꞌmagaare giꞌzibo goꞌkukululwa neꞌfwarasi, na ábâli kizi zigendera kwo, haaho-haaho Nahano anashubaania inyaaja, yanababindikira booshi. Si Abahisiraheeri boohe, bâli mali lenga mu nyaaja, áhakamiri.
20 Lyeryo, umuleevi Miryamu, mwali wa Harooni, anayabiira iminjegere. Abaabo bakazi, nabo banamúgombera neꞌgindi, banatondeera ukukina. 21 Miryamu anatondeera ukubayimbira:
«Muyimbire Nahano, úli mu kizi huuzibwa bweneene.
Ifwarasi na ábâli kizi zigendera kwo, abakamiza mu nyaaja.»
Amiiji malulu
22 Ikyanya Musa akalyosa Abahisiraheeri heꞌyo Nyaaja Ndukula, anabarongoora halinde mwiꞌshamba lyeꞌShuuri. Banahisa isiku zishatu, bali mu lyeryo ishamba, ndaanago miiji go bakalonga.
23 Neꞌri bakahika áhali mu buuzibwa Mara, banagwana haꞌmiiji. Haliko, gâli riiri malulu, kyanatuma batagaganywa. (Kyo kikatuma yaho handu hali mu buuzibwa Mara, kuli kudeta: bululu.)
24 Balya bandu, ikyanya bakabulirwa naꞌmiiji, booshi kuguma banatondeera ukuyidodombera Musa, ti: «Ewe! Bikagi leero byo tugaanywa?»
25 Ikyanya Musa akatabaaza Nahano, anamúyereka itavi lyeꞌkiti. Lirya itavi, Musa analiyabiira. Neꞌri akalitibulira mu miiji, ganayami luluuka.
Iri Abahisiraheeri bakaba bakiri i Mara, Nahano anabaheereza imaaja, bamenye ngiisi kwo akakyula. 26 Anadeta: «Niehe nie Nahano, Rurema winyu. Na ndi nie mu mùkiza. Kwokwo, iri mwangakizi yuvwiriza izu lyani ku bwitonde, ndagamùleetera ikiija, kundu nꞌgakireetera Abamiisiri. Ku yukwo, ikyanya ngakizi mùbwira igambo, mukwiriiri mukizi ndega amatwiri, munakizi gira íbikwaniini imbere lyani. Imaaja zaani, mukizi zisimbaha, nga ngiisi kwo nakyula.»
27 Ha nyuma, Abahisiraheeri banahika i Herimu. Na yaho, hâli riiri utudota ikumi na tubiri, kuguma neꞌbigazi makumi galinda, banashumbika hoofi naꞌmiiji.