18
Yeturo agendi lamusa Musa
1 Shevyala Musa, iziina lyage Yeturo, umugingi weꞌMidyani, anayuvwa ngiisi kwo Rurema akatabaala Musa, naꞌBahisiraheeri booshi, mu kubalyosa mu kihugo kyeꞌMiisiri.
2 Ku yikyo kyanya, Musa âli mali gwanwa atuma mukaage wa Zipoora, naꞌbagala bombi, kwo bagendi tuula ha mwoꞌyo Yeturo. 3 Ifula, yâli kizi buuzibwa Girishoomu, bwo Musa akadeta: «Nꞌgatibitira mu kihugo kyeꞌmahanga.» 4 Na úgamúlonda, âli kizi buuzibwa Heryezeeri, bwo Musa akadeta: «Rurema wa bashokuluza baani ye kandabaala, anangiza mu maboko ga Faraho.»
5 Uyo Yeturo, banayijanwa na munyere wage, muka Musa, na bagala baabo bombi, halinde mwiꞌshamba, ho Musa âli shumbisiri, hanâli hoofi noꞌmugazi gwa Rurema. 6 Kwokwo, Yeturo anatuma indumwa imunda Musa, ti: «Nie shovyala, ngweti ngayija iyo munda uli. Tuli kuguma na mukaawe, na bagala biinyu bombi.»
7 Kwokwo, Musa anayimuka, gira agendi músanganira. Neꞌri akahikaga ho ali, anayinama, mu kumúheereza ulushaagwa, anamúnyunyuguta. Iri bakayusa ukulamusania, banayingira mwiꞌheema.
8 Musa anaganuulira shevyala ngiisi kwo Nahano akagira, mu kukiza Abahisiraheeri mu maboko ga Faraho, kiri naꞌbandi Bamiisiri booshi. Anamúlibuukira na galya makuba gooshi go bakalonga mu lugeezi, na ngiisi kwo Rurema akabakiza mwo.
9 Uyo Yeturo, iri akayuvwa ngiisi kwo Nahano akatabaala Abahisiraheeri, mu kubakiza mu maboko gaꞌBamiisiri, anashambaala ngana. 10 Anadeta: «Nahano ahuuzibwe! Keera akamùkiza mu maboko goꞌyo mwami Faraho, na mu gaꞌbandi Bamiisiri booshi. 11 Buno ngoli yiji kwo Nahano ye sumbiri íbiri mu yikumbwa byoshi. Mukuba, kundu yabo Bamiisiri bâli kizi libuza Abahisiraheeri bweneene ku kanyaaro, haliko ubuzinda akabaguluula mu maboko gaabo.»
12 Lyeryo, uyo Yeturo anatangira Rurema ituulo lyoꞌkusiriiza, kuguma naꞌgandi matuulo. Harooni, kuguma naꞌbashaaja baꞌBahisiraheeri, banayiji shangiira ibyokulya bo na Yeturo, bali imbere lya Rurema.
Abatwi beꞌmaaja batoolwa
(Bukengeeze 1.9-18)
13 Iri bukakya, Musa anabwatala ku kitumbi kyoꞌkutwira kweꞌmaaja. Abandu banakizi múzunguluka, ukulyokera shesheezi halinde kabigingwe, gira bayuvwe ngiisi kwo agabatwira imaaja.
14 Uyo Yeturo, iri akabonaga ngiisi kwo Musa agirira Abahisiraheeri, anamúbuuza: «Ewe! Kituma kikagi uli mu twa imaaja zaꞌbandu kwoku? Si ubwatiiri wenyene, naꞌbandu bakuzungulusiri, ukulyokera shesheezi halinde kabigingwe.»
15 Musa, ti: «Yabo bandu, íbitumiri bagweti baganyijira, gira bamenye ngiisi byo Rurema aloziizi. 16 Ikyanya bali mu hambanwa, bali mu kizi nyijira, gira ngizi bahambuula. Na ndi mu kizi bayigiriza imaaja za Rurema, bamenye ngiisi kwo akakyula.»
17 Ulya Yeturo anahanuula mukwi wage, ti: «E mwana wani, yibi byo ugweti ugaagira, bitali biija. 18 Yugu mukolwa gwoꞌkurongoora abandu, guli muzito bweneene, utanganagugira wenyene. Kwoku ugweti ugayiyumya, iri unayumya kiri na yaba bandu. 19 Leka nguhanuule, halinde Rurema yenyene mukizi yamanwa.
«Wehe, umukolwa gwawe gubaagage gwa kukizi yimangira abandu imbere lya Rurema, noꞌkukizi múleetera amagoorwa gaabo. 20 Unakizi bayigiriza imaaja zaage, bamenye ngiisi kwo akakyula. Unakizi bayerekeza na ngiisi kwo bangatuula, na ngiisi kwo bangakizi gira.
21 «Haliko ku gindi mikolwa, mu yaba bandu booshi, utoolage mwo ábakwaniini, banabe basimbahiri Rurema, batanabe boꞌkutulirwa. Yabo bandu, uheereze baguma ubutwali bwoꞌkuyimangira abandu kihumbi-kihumbi, naꞌbandi abandu igana-igana, kandi iri bandu makumi gataanu-gataanu, kandi iri bandu ikumi-kumi. 22 Yabo, babe bo bagakizi twira abandu imaaja. Ngiisi maaja ízigakizi bavwarukira, babe bo bagakizi zitwa. Haliko, ízangabakayira, banakuleetere zo.
«Kwokwo, lyo naawe imikolwa ígakuyanguhira, bwo mugaaba mukola mu tabaalanwa. 23 Iri wangagira kwokwo, nga kwo Rurema yenyene aloziizi, lyo utagayiluhya. Na yaba bandu nabo, lyo bangakizi taaha imitima ikoli yisiri mu nda.»
24 Musa, yiryo ihano lya shevyala, analiyuvwa bwija, analisimbaha. 25 Mu Bahisiraheeri, anatoola mwaꞌbandu ábakwaniini. Baguma, anabaheereza ubutwali bwoꞌkukizi rongoora abandu kihumbi-kihumbi. Naꞌbandi, igana-igana. Naꞌbandi, makumi gataanu-gataanu. Naꞌbandi, ikumi-kumi. 26 Yabo bandu, banaba bo bagakizi twa imaaja zaꞌbandu ngiisi kyanya. Ikyanya zâli kizi bakayira, banazitwalire Musa. Haliko, ikyanya zabavwarukira, banazitwe boonyene.
27 Ha nyuma, Musa anasezerana na shevyala. Shevyala, anataaha.