1 Nahano anashubi mbwiraga kwokuno: 2 «E mwana woꞌmundu, umulandira gwoꞌmuzabibu, ka gwo mwija ukuhima ibiti bya mu lubako? 3 Ka mwangagulyosagya mweꞌmbahwa, munazilingaanie mweꞌkindu kirebe? Abandu, ka bangagukoleesa mu kugira imisumaari yoꞌkukizi manikira kweꞌbindu? Nanga maashi!

4 «Yugwo mulandira, gwangakoleesibwa naaho, mu kuyasa umuliro. Neꞌkyanya gwasingooka uluhande noꞌlundi, ikitolo kyeꞌkati nakyo kinajigimbe, iri ndaako kamaro guki hiiti. 5 Yugwo mulandira, ikyanya gutâli zaazi hiira, gutâli hiiti kamaro. Aahago! Ikyanya umuliro gugaaba keera gwagusingoolaga, ka itali yo haahe?

6 «Nie Rurema Nahamwinyu nadetaga kwokuno: Mu biti byoshi bya mu lubako, ndi mu koleesa umulandira gwoꞌmuzabibu nga shaali zoꞌkuyasa mwoꞌmuliro. Kwo na kwokwo, kwo ngagirira abandu beꞌYerusaleemu. 7 Ngabahana ngana-ngana! Na kundu bagaagira mbu batibite umuliro, si gugabajigiivya naaho. Neꞌkyanya ngaaba keera nabahana bweneene, lyo mugaamenya ku kasiisa kwo nie Nahano. 8 Bwo batâli zaazi ba bemeera imwani, ngahindula ikihugo kyabo, kibe kimaata.» Kwokwo, kwo Rurema Nahamwitu adesiri.