19
Ikimombo
1 Rurema akambwira kwo nyimbire abaluzi baꞌBahisiraheeri luno lwimbo lweꞌkimombo:
2 «Nyoko, yâli riiri ndare yeꞌkitangaaza mu zaabo ndare.
Kundu âli tuuziri mu ndare ndangi,
âli kizi heereza abaana baage ibyokulya.
3 Uyo mwana weꞌndare, nyina anamúlera bwija,
halinde akizi ba kihagarusi.
Neꞌkyanya bâli kizi hiiva,
nyina anakizi múheta ukujanganula-janganula inyamiishwa,
kiri naꞌbandu.
4 Ha nyuma, imyazi yage, ibinyamahanga, byanagiyuvwa.
Kwokwo, banamútega ubuhya, banamúgwasa,
banamútwala mu kihugo kyeꞌMiisiri, bamúgwetiiri kwiꞌgera.
5 Uyo nyina, iri akabonaga kwo ataki hiiti umulangaaliro gwoꞌkushubi múbona,
anayabiira ugundi mwana wage, anamúyigiriza ukulangama.
6 Iyo ndare, nayo kwakundi yanakula, yanayiheta ku zaabo,
nayo yanatondeera ukukizi hiiva, iri inajanganula-janganula izindi nyamiishwa,
kiri naꞌbandu.
7 Ngiisi nzitiro zaꞌbandu bâli kizi yibisha mwo,
iyo ndare yanakizi gendi ziteera, inashereeze kuguma noꞌtwaya twamwo.
Ikyanya yâli kizi lunduma, ikihugo kinahuumirwe bweneene, kuguma na ábakituuziri mwo.
8 Iyo ndare nayo, yibyo binyamahanga byanalyokaga imbande zooshi, gira biyiji giteera.
Byanagiyajuulira kwoꞌlushenga,
halinde lwanagigwata.
9 Byanagibiika mu kitiri, ishwesirwi niꞌgera,
byanagitwala imunda mwami weꞌBabeeri.
Neꞌyo munda, byanagilasha mu nyumba yeꞌmbohe,
gira ikilundumo kyayo kitaki shubi yuvwikana mu migazi yeꞌHisiraheeri.»
10 «Uyo nyoko, âli riiri nga muzabibu mu ndalo, úgwâli byazirwi haꞌmiiji.
Yugwo muzabibu, ikyanya gukakizi longaga amiiji, gwanatongeka kweꞌbitumbwe bweneene.
11 Gwâli kizi tavika, halinde amatavi ganabaajwe mweꞌngoni yeꞌkyami.
Yugwo muzabibu, gukakulaga bweneene, ukuhima ibindi biti.
Na bwo gwâli riiri mula bweneene, gwanakizi tavika,
halinde abandu booshi banakizi gubona.
12 Kundu kwokwo, gulya muzabibu gwanayiji shikulwa ku buraakari,
gwanakabulirwa haashi.
Imbuusi ngayu ukulyoka isheere yanaguyumya.
Ibitumbwe byagwo, byanaholokera haashi,
naꞌmatavi gaagwo makomu, ganayuma, ganasingoolwa.
13 Buno, yugwo muzabibu gwanagendi byalwa mwiꞌshamba,
mu kihugo íkiyumuusiri, kizira miiji.
14 Umuliro, keera gwahuluka mwiꞌsina lyagwo,
gwanayami jigiivya ibitumbwe byagwo byoshi.
Mu matavi gaagwo, ndaalyo íriki kaniri, mbu libaajwe mweꞌngoni yeꞌkyami.
Yulwo lwimbo, luli lweꞌkimombo. Lunakwiriiri ukukizi yimbwa mu bigandaaro.»